Adhyatma Upanishad of Shukla Yajurveda

adhyātmopaniṣat

yatrāntaryāmyādibhedastattvato na hi yujyate ।
nirbhedaṃ paramādvaitaṃ svamātramavaśiṣyate ॥

oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥

hariḥ oṃ ॥ antaḥśarīre nihito guhāyāmaja eko nityamasya
pṛthivī śarīraṃ yaḥ pṛthivīmantare saṃcaranyaṃ pṛthivī na veda ।
yasyāpaḥśarīraṃ yo apo'ntare saṃcaranyamāpo na viduḥ ।
yasya tejaḥ śarīraṃ yastejo'ntare saṃcaranyaṃ tejo na veda ।
yasya vāyuḥ śarīraṃ yo vāyumantare saṃcaranyaṃ vāyurna veda ।
yasyākāśaḥ śarīraṃ ya ākāśamantare saṃcaranyamākāśo na veda ।
yasya manaḥ śarīraṃ yo mano'ntare saṃcaranyaṃ mano na veda ।
yasya buddhiḥ śarīraṃ yo buddhimantare saṃcaranyaṃ buddhirna veda ।
yasyāhaṃkāraḥ śarīraṃ yo'haṃkāramantare saṃcaranyamahaṃkāro na veda ।
yasya cittaṃ śarīraṃ yaścittamantare saṃcaranyaṃ cittaṃ na veda ।
yasyāvyaktaṃ śarīraṃ yo'vyaktamantare saṃcaranyamavyaktaṃ na veda ।
yasyākṣaraṃ śarīraṃ yo'kṣaramantare saṃcaranyamkṣaraṃ na veda ।
yasya mṛyuḥ śarīraṃ yo mṛtyumantare saṃcaranyaṃ mṛtyurna veda ।
sa eṣa sarvabhūtāntarātmāpahatapāpmā divyo deva eko nārāyaṇaḥ ।
ahaṃ mameti yo bhāvo dehākṣādāvanātmani । adhyāso'yaṃ nirastavyo
viduṣā brahmaniṣṭhayā ॥ 1॥

jñātvā svaṃ pratyagātmānaṃ buddhitadvṛttisākṣiṇam ।
so'hamityeva tadvṛttyā svānyatrātmyamātmanaḥ ॥ 2॥

lokānuvartanaṃ tyaktvā tyaktvā dehānuvartanam ।
śāstrānuvartanaṃ tyaktvā svādhyāsāpanayaṃ kuru ॥ 3॥

svātmanyeva sadā sthityā mano naśyati yoginaḥ ।
yuktyā śrutyā svānubhūtyā jñātvā sārvātmyamātmanaḥ ॥ 4॥

nidrāyā lokavārtāyāḥ śabdāderātmavismṛteḥ ।
kvacinnavasaraṃ dattvā cintayātmānamātmani ॥ 5॥

mātāpitrormalodbhūtaṃ malamāṃsamayaṃ vapuḥ ।
tyaktvā caṇḍālavaddūraṃ brahmabhūya kṛtī bhava ॥ 6॥

ghaṭākāśaṃ mahākāśa ivātmānaṃ parātmani ।
vilāpyākhaṇḍabhāvena tūṣṇīṃ bhava sadā mune ॥ 7॥

svaprakāśamadhiṣṭhānaṃ svayaṃbhūya sadātmanā ।
brahmāṇḍamapi piṇḍāṇḍaṃ tyajyatāṃ malabhāṇḍavat ॥ 8॥

cidātmani sadānande deharūḍhāmahaṃdhiyam ।
niveśya liṅgamutsṛjya kevalo bhava sarvadā ॥ 9॥

yatraiṣa jagadābhāso darpaṇāntaḥpuraṃ yathā ।
tadbrahmāhamiti jñātvā kṛtakṛtyo bhavānagha ॥ 10॥

ahaṃkāragrahānmuktaḥ svarūpamupapadyate ।
candravadvimalaḥ pūrṇaḥ sadānandaḥ svayaṃprabhaḥ ॥ 11॥

kriyānāśādbhaveccintānāśo'smādvāsanākṣayaḥ ।
vāsanāprakṣayo mokṣaḥ sā jīvanmuktiriṣyate ॥ 12॥

sarvatra sarvataḥ sarvabrahmamātrāvalokanam ।
sadbhāvabhāvānādāḍhyādvāsanālayamaśnute ॥ 13॥

pramādo brahmaniṣṭhāyāṃ na kartavya kadācana ।
pramādo mṛtyurityāhurvidyāyāṃ brahmavādinaḥ ॥ 14॥

yathāpakṛṣṭaṃ śaivālaṃ kṣaṇamātraṃ na tiṣṭhati ।
āvṛṇoti tathā māyā prājñaṃ vāpi parāṅmukham ॥ 15॥

jīvato yasya kaivalyaṃ videho'pi sa kevalaḥ ।
samādhiniṣṭhatāmetya nirvikalpo bhavānagha ॥ 16॥

ajñānahṛdayagrantherniḥśeṣavilayastadā ।
samādhinā vikalpena yadādvaitātmadarśanam ॥ 17॥

atrātmatvaṃ dṛḍhīkurvannahamādiṣu saṃtyajan ।
udāsīnatayā teṣu tiṣṭhedghaṭapaṭādivat ॥ 18॥

brahmādistambaparyantaṃ mṛṣāmātrā upādhayaḥ ।
tataḥ pūrṇaṃ svamātmānaṃ paśyedekātmanā sthitam ॥ 19॥

svayaṃ brahmā svayaṃ viṣṇuḥ svayamindraḥ svayaṃ śivaḥ ।
svayaṃ viśvamidaṃ sarvaṃ svasmādanyanna kiṃcana ॥ 20॥

svātmanyāropitā śeṣābhāsavastunirāsataḥ ।
svayameva paraṃbrahma pūrṇamadvayamakriyam ॥ 21॥

asatkalpo vikalpo'yaṃ viśvamityekavastuni ।
nirvikāre nirākāre nirviśeṣe bhidā kutaḥ ॥ 22॥

draṣṭṛdarśanadṛśyādibhāvaśūnye nirāmaye ।
kalpārṇava ivātyantaṃ paripūrṇe cidātmani ॥ 23॥

tejasīva tamo yatra vilīnaṃ bhrāntikāraṇam ।
advitīye pare tattve nirviśeṣe bhidā kutaḥ ॥ 24॥

ekātmake pare tattve bhedakartā kathaṃ vaset ।
suṣuptau sukhamātrāyāṃ bhedaḥ kenāvalokitaḥ ॥ 25॥

cittamūlo vikalpo'yaṃ cittābhāve na kaścana ।
ataścittaṃ samādheyi pratyagrūpe parātmani ॥ 26॥

akhaṇḍānandamātmānaṃ vijñāya svasvarūpataḥ ।
bahirantaḥ sadānandarasāsvādanamātmani ॥ 27॥

vairāgyasya phalaṃ bodho bodhasyoparatiḥ phalam ।
svānandānubhavacchāntireṣaivoparateḥ phalam ॥ 28॥

yadyuttarottarābhāve pūrvarūpaṃ tu niṣphalam ।
nivṛttiḥ paramā tṛptirānando'nupamaḥ svataḥ ॥ 29॥

māyopādhirjagadyoniḥ sarvajñatvādilakṣaṇaḥ ।
pārokṣyaśabalaḥ satyādyātmakastatpadābhidhaḥ ॥ 30॥

ālambanatayā bhāti yo'smatpratyayaśabdayoḥ ।
antaḥkaraṇasaṃbhinnabodhaḥ sa tvaṃpadābhidhaḥ ॥ 31॥

māyāvidye vihāyaiva upādhī parajīvayoḥ ।
akhaṇḍaṃ saccidānandaṃ paraṃ brahma vilakṣyate ॥ 32॥

itthaṃ vākyaistathārthānusandhānaṃ śravaṇaṃ bhavet ।
yuktyā saṃbhāvitatvānusandhānaṃ mananaṃ tu tat ॥ 33॥

tābhyaṃ nirvicikitse'rthe cetasaḥ sthāpitasya yat ।
ekatānatvametaddhi nididhyāsanamucyate ॥ 34॥

dhyātṛdhyāne parityajya kramāddhyeyaikagocaram ।
nivātadīpavaccittaṃ samādhirabhidhīyate ॥ 35॥

vṛttayastu tadānīmapyajñātā ātmagocarāḥ ।
smaraṇādanumīyante vyutthitasya samutthitāḥ ॥ 36॥

anādāviha saṃsāre saṃcitāḥ karmakoṭayaḥ ।
anena vilayaṃ yānti śuddho dharmo vivardhate ॥ 37॥

dharmameghamimaṃ prāhuḥ samādhiṃ yogavittamāḥ ।
varṣatyeṣa yathā dharmāmṛtadhārāḥ sahasraśaḥ ॥ 38॥

amunā vāsanājāle niḥśeṣaṃ pravilāpite ।
samūlonmūlite puṇyapāpākhye karmasaṃcaye ॥ 39॥

vākyamapratibaddhaṃ satprākparokṣāvabhāsite ।
karāmalakamavadbodhaparokṣaṃ prasūyate ॥ 40॥

vāsanānudayo bhogye vairāgyasya tadāvadhiḥ ।
ahaṃbhāvodayābhāvo bodhasya paramāvadhiḥ ॥ 41॥

līnavṛtteranutpattirmaryādoparatestu sā ।
sthitaprajño yatirayaṃ yaḥ sadānandamaśnute ॥ 42॥

brahmaṇyeva vilīnātmā nirvikāro viniṣkriyaḥ ।
brahmātmanoḥ śodhitayorekabhāvāvagāhini ॥ 43॥

nirvikalpā ca cinmātrā vṛttiḥ prajñeti kathyate ।
sā sarvadā bhavedyasya sa jīvanmukta iṣyate ॥ 44॥

dehendriyeṣvahaṃbhāva idaṃbhāvastadanyake ।
yasya no bhavataḥ kvāpi sa jīvanmukta iṣyate ॥ 45॥

na pratyagbrahmaṇorbhedaṃ kadāpi brahmasargayoḥ ।
prajñayā yo vijānāti sa jīvanmukta iṣyate ॥ 46॥

sādhubhiḥ pūjyamāne'sminpīḍyamāne'pi durjanaiḥ ।
samabhāvo bhavedyasya sa jīvanmukta iṣyate ॥ 47॥

vijñātabrahmatattvasya yathāpūrvaṃ na saṃsṛtiḥ ।
asti cenna sa vijñātabrahmabhāvo bahirmukhaḥ ॥ 48॥

sukhādyanubhavo yāvattāvatprārabdhamiṣyate ।
phalodayaḥ kriyāpūrvo niṣkriyo nahi kutracit ॥ 49॥

ahaṃ brahmeti vijñānātkalpakoṭiśatārjitam ।
saṃcitaṃ vilayaṃ yāti prabodhātsvapnakarmavat ॥ 50॥

svamasaṅgamudāsīnaṃ parijñāya nabho yathā ।
na śliṣyate yatiḥ kiṃcitkadācidbhāvikarmabhiḥ ॥ 51॥

na nabho ghaṭayogena surāgandhena lipyate ।
tathātmopādhiyogena taddharme naiva lipyate ॥ 52॥

jñānodayātpurārabdhaṃ karma jñānānna naśyati ।
adattvā svaphalaṃ lakṣyamuddiśyotsṛṣṭabāṇavat ॥ 53॥

vyāghrabuddhyā vinirmukto bāṇaḥ paścāttu gomatau ।
na tiṣṭhati bhinattyeva lakṣyaṃ vegena nirbharam ॥ 54॥

ajaro'smyamaro'smīti ya ātmānaṃ prapadyate ।
tadātmanā tiṣṭhato'sya kutaḥ prārabdhakalpanā ॥ 55॥

prārabdhaṃ siddhyati tadā yadā dehātmanā sthitiḥ ।
dehātmabhāvo naiveṣṭaḥ prārabdhaṃ tyajyatāmataḥ ॥ 56॥

prārabdhakalpanāpyasya dehasya bhrāntireva hi ॥ 57॥

adhyastasya kutastattvamasatyasya kuto janiḥ ।
ajātasya kuto nāśaḥ prārabdhamasataḥ kutaḥ ॥ 58॥

jñānenājñānakāryasya samūlasya layo yadi ।
tiṣṭhatyayaṃ kathaṃ deha iti śaṅkāvato jaḍān ।
samādhātuṃ bāhyadṛṣṭyā prārabdhaṃ vadati śrutiḥ ॥ 59॥

na tu dehādisatyatvabodhanāya vipaścitām ।
paripūrṇamanādyantamaprameyamavikriyam ॥ 60॥

sadghanaṃ cidghanaṃ nityamānandaghanamavyayam ।
pratyagekarasaṃ pūrṇamanantaṃ sarvatomukham ॥ 61॥

aheyamanupādeyamanādheyamanāśrayam ।
nirguṇaṃ niṣkriyaṃ sūkṣmaṃ nirvikalpaṃ nirañjanam ॥ 62॥

anirūpyasvarūpaṃ yanmanovācāmagocaram ।
satsamṛddhaṃ svataḥsiddhaṃ śuddhaṃ buddhamanodṛśam ॥ 63॥

svānubhūtyā svayaṃ jñātvā svamātmānamakhaṇḍitam ।
sa siddhaḥ susukhaṃ tiṣṭha nirvikalpātmanātmani ॥ 64॥

kva gataṃ kena vā nītaṃ kutra līnamidaṃ jagat ।
adhunaiva mayā dṛṣṭaṃ nāsti kiṃ mahadadbhutam ॥ 65॥

kiṃ heyaṃ kimupādeyaṃ kimanyatkiṃ vilakṣaṇam ।
akhaṇḍānandapīyūṣapūrṇabrahmamahārṇave ॥ 66॥

na kiṃcidatra paśyāmi na śṛṇomi na vedmyaham ।
svātmanaiva sadānandarūpeṇāsmi svalakṣaṇaḥ ॥ 67॥

asaṅgo'hamanaṅgo'hamaliṅgo'haṃ hariḥ ।
praśānto'hamananto'haṃ paripūrṇaścirantanaḥ ॥ 68॥

akartāhamabhoktāhamavikāro'hamavyayaḥ ।
śuddha bodhasvarūpo'haṃ kevalo'haṃ sadāśivaḥ ॥ 69॥

etāṃ vidyāmapāntaratamāya dadau । apāntaratamo brahmaṇe dadau ।
brahmā ghorāṅgirase dadau । ghorāṅgirā raikvāya dadau । raikvo rāmāya dadau ।
rāmaḥ sarvebhyo bhūtebhyo dadāvityetannirvāṇānuśāsanaṃ
vedānuśāsanaṃ vedānuśāsanamityupaniṣat ॥

oṃ pūrṇamadaḥ pūrṇamidaṃ pūrṇātpūrṇamudacyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥ hariḥ oṃ tatsat ॥

iti adhyātmopaniṣatsamāptā ॥