| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၅. အဓိဂမသုတ္တဝဏ္ဏနာ
5. Adhigamasuttavaṇṇanā
၇၉. ပဉ္စမေ အာဂစ္ဆန္တိ ဧတေန ကုသလာ ဝာ အကုသလာ ဝာတိ အာဂမနံ, ကုသလာကုသလာနံ ဥပ္ပတ္တိကာရဏံ။ တတ္ထ ကုသလောတိ အာဂမနကုသလော။ ဧဝံ ဓမ္မေ မနသိကရောတော ကုသလာ ဝာ အကုသလာ ဝာ ဓမ္မာ အဘိဝဍ္ဎန္တီတိ ဧဝံ ဇာနန္တော။ အပဂစ္ဆန္တိ ကုသလာ ဝာ အကုသလာ ဝာ ဧတေနာတိ အပဂမနံ။ တေသံ ဧဝ အနုပ္ပတ္တိကာရဏံ, တတ္ထ ကုသလောတိ အပဂမနကုသလော။ ဧဝံ ဓမ္မေ မနသိကရောတော ကုသလာ ဝာ အကုသလာ ဝာ ဓမ္မာ နာဘိဝဍ္ဎန္တီတိ ဧဝံ ဇာနန္တော။ ဥပာယကုသလောတိ ဌာနုပ္ပတ္တိကပညာသမန္နာဂတော။ ဣဒဉ္စ အစ္စာယိကကိစ္စေ ဝာ ဘယေ ဝာ ဥပ္ပန္နေ တသ္သ တိကိစ္ဆနတ္ထံ ဌာနုပ္ပတ္တိယာ ကာရဏဇာနနဝသေန ဝေဒိတဗ္ဗံ။
79. Pañcame āgacchanti etena kusalā vā akusalā vāti āgamanaṃ, kusalākusalānaṃ uppattikāraṇaṃ. Tattha kusaloti āgamanakusalo. Evaṃ dhamme manasikaroto kusalā vā akusalā vā dhammā abhivaḍḍhantīti evaṃ jānanto. Apagacchanti kusalā vā akusalā vā etenāti apagamanaṃ. Tesaṃ eva anuppattikāraṇaṃ, tattha kusaloti apagamanakusalo. Evaṃ dhamme manasikaroto kusalā vā akusalā vā dhammā nābhivaḍḍhantīti evaṃ jānanto. Upāyakusaloti ṭhānuppattikapaññāsamannāgato. Idañca accāyikakicce vā bhaye vā uppanne tassa tikicchanatthaṃ ṭhānuppattiyā kāraṇajānanavasena veditabbaṃ.
အဓိဂမသုတ္တဝဏ္ဏနာ နိဋ္ဌိတာ။
Adhigamasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. အဓိဂမသုတ္တံ • 5. Adhigamasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. အဓိဂမသုတ္တဝဏ္ဏနာ • 5. Adhigamasuttavaṇṇanā
