| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૭. અડ્ડકરણસુત્તં
7. Aḍḍakaraṇasuttaṃ
૧૧૮. સાવત્થિનિદાનં . એકમન્તં નિસિન્નો ખો રાજા પસેનદિ કોસલો ભગવન્તં એતદવોચ – ‘‘ઇધાહં, ભન્તે, અડ્ડકરણે 1 નિસિન્નો પસ્સામિ ખત્તિયમહાસાલેપિ બ્રાહ્મણમહાસાલેપિ ગહપતિમહાસાલેપિ અડ્ઢે મહદ્ધને મહાભોગે પહૂતજાતરૂપરજતે પહૂતવિત્તૂપકરણે પહૂતધનધઞ્ઞે કામહેતુ કામનિદાનં કામાધિકરણં સમ્પજાનમુસા ભાસન્તે. તસ્સ મય્હં, ભન્તે, એતદહોસિ – ‘અલં દાનિ મે અડ્ડકરણેન, ભદ્રમુખો દાનિ અડ્ડકરણેન પઞ્ઞાયિસ્સતી’’’તિ.
118. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, aḍḍakaraṇe 2 nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṃ kāmādhikaraṇaṃ sampajānamusā bhāsante. Tassa mayhaṃ, bhante, etadahosi – ‘alaṃ dāni me aḍḍakaraṇena, bhadramukho dāni aḍḍakaraṇena paññāyissatī’’’ti.
‘‘(એવમેતં, મહારાજ, એવમેતં મહારાજ!) 3 યેપિ તે, મહારાજ, ખત્તિયમહાસાલા બ્રાહ્મણમહાસાલા ગહપતિમહાસાલા અડ્ઢા મહદ્ધના મહાભોગા પહૂતજાતરૂપરજતા પહૂતવિત્તૂપકરણા પહૂતધનધઞ્ઞા કામહેતુ કામનિદાનં કામાધિકરણં સમ્પજાનમુસા ભાસન્તિ; તેસં તં ભવિસ્સતિ દીઘરત્તં અહિતાય દુક્ખાયા’’તિ. ઇદમવોચ…પે॰…
‘‘(Evametaṃ, mahārāja, evametaṃ mahārāja!) 4 Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṃ kāmādhikaraṇaṃ sampajānamusā bhāsanti; tesaṃ taṃ bhavissati dīgharattaṃ ahitāya dukkhāyā’’ti. Idamavoca…pe…
‘‘સારત્તા કામભોગેસુ, ગિદ્ધા કામેસુ મુચ્છિતા;
‘‘Sārattā kāmabhogesu, giddhā kāmesu mucchitā;
અતિસારં ન બુજ્ઝન્તિ, મચ્છા ખિપ્પંવ ઓડ્ડિતં;
Atisāraṃ na bujjhanti, macchā khippaṃva oḍḍitaṃ;
પચ્છાસં કટુકં હોતિ, વિપાકો હિસ્સ પાપકો’’તિ.
Pacchāsaṃ kaṭukaṃ hoti, vipāko hissa pāpako’’ti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૭. અડ્ડકરણસુત્તવણ્ણના • 7. Aḍḍakaraṇasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૭. અડ્ડકરણસુત્તવણ્ણના • 7. Aḍḍakaraṇasuttavaṇṇanā
