| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౭. అడ్డకరణసుత్తం
7. Aḍḍakaraṇasuttaṃ
౧౧౮. సావత్థినిదానం . ఏకమన్తం నిసిన్నో ఖో రాజా పసేనది కోసలో భగవన్తం ఏతదవోచ – ‘‘ఇధాహం, భన్తే, అడ్డకరణే 1 నిసిన్నో పస్సామి ఖత్తియమహాసాలేపి బ్రాహ్మణమహాసాలేపి గహపతిమహాసాలేపి అడ్ఢే మహద్ధనే మహాభోగే పహూతజాతరూపరజతే పహూతవిత్తూపకరణే పహూతధనధఞ్ఞే కామహేతు కామనిదానం కామాధికరణం సమ్పజానముసా భాసన్తే. తస్స మయ్హం, భన్తే, ఏతదహోసి – ‘అలం దాని మే అడ్డకరణేన, భద్రముఖో దాని అడ్డకరణేన పఞ్ఞాయిస్సతీ’’’తి.
118. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, aḍḍakaraṇe 2 nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṃ kāmādhikaraṇaṃ sampajānamusā bhāsante. Tassa mayhaṃ, bhante, etadahosi – ‘alaṃ dāni me aḍḍakaraṇena, bhadramukho dāni aḍḍakaraṇena paññāyissatī’’’ti.
‘‘(ఏవమేతం, మహారాజ, ఏవమేతం మహారాజ!) 3 యేపి తే, మహారాజ, ఖత్తియమహాసాలా బ్రాహ్మణమహాసాలా గహపతిమహాసాలా అడ్ఢా మహద్ధనా మహాభోగా పహూతజాతరూపరజతా పహూతవిత్తూపకరణా పహూతధనధఞ్ఞా కామహేతు కామనిదానం కామాధికరణం సమ్పజానముసా భాసన్తి; తేసం తం భవిస్సతి దీఘరత్తం అహితాయ దుక్ఖాయా’’తి. ఇదమవోచ…పే॰…
‘‘(Evametaṃ, mahārāja, evametaṃ mahārāja!) 4 Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṃ kāmādhikaraṇaṃ sampajānamusā bhāsanti; tesaṃ taṃ bhavissati dīgharattaṃ ahitāya dukkhāyā’’ti. Idamavoca…pe…
‘‘సారత్తా కామభోగేసు, గిద్ధా కామేసు ముచ్ఛితా;
‘‘Sārattā kāmabhogesu, giddhā kāmesu mucchitā;
అతిసారం న బుజ్ఝన్తి, మచ్ఛా ఖిప్పంవ ఓడ్డితం;
Atisāraṃ na bujjhanti, macchā khippaṃva oḍḍitaṃ;
పచ్ఛాసం కటుకం హోతి, విపాకో హిస్స పాపకో’’తి.
Pacchāsaṃ kaṭukaṃ hoti, vipāko hissa pāpako’’ti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౭. అడ్డకరణసుత్తవణ్ణనా • 7. Aḍḍakaraṇasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౭. అడ్డకరణసుత్తవణ్ణనా • 7. Aḍḍakaraṇasuttavaṇṇanā
