| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၆၀. အဒသ္သနေ ဥက္ခေပနီယကမ္မဝိဝာဒကထာ
260. Adassane ukkhepanīyakammavivādakathā
၄၃၇. ဣဓ ပန, ဘိက္ခဝေ, ဘိက္ခု အာပတ္တိံ အာပဇ္ဇိတ္ဝာ န ဣစ္ဆတိ အာပတ္တိံ ပသ္သိတုံ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု အာပတ္တိံ အာပဇ္ဇိတ္ဝာ န ဣစ္ဆတိ အာပတ္တိံ ပသ္သိတုံ။ ဟန္ဒသ္သ မယံ အာပတ္တိယာ အဒသ္သနေ ဥက္ခေပနီယကမ္မံ ကရောမာ’’တိ။ တေ တသ္သ အာပတ္တိယာ အဒသ္သနေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂာ။ပေ.။ အဓမ္မေန သမဂ္ဂာ။ ဓမ္မေန ဝဂ္ဂာ။ ဓမ္မပတိရူပကေန ဝဂ္ဂာ။ ဓမ္မပတိရူပကေန သမဂ္ဂာ။ တတ္ရဋ္ဌော သင္ဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတ္ရ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝာဒိနော။ ဣမေ ပဉ္စ ဝာရာ သံခိတ္တာ။
437. Idha pana, bhikkhave, bhikkhu āpattiṃ āpajjitvā na icchati āpattiṃ passituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ passituṃ. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
အဒသ္သနေ ဥက္ခေပနီယကမ္မဝိဝာဒကထာ နိဋ္ဌိတာ။
Adassane ukkhepanīyakammavivādakathā niṭṭhitā.
