| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৬০. অদস্সনে উক্খেপনীযকম্মৰিৰাদকথা
260. Adassane ukkhepanīyakammavivādakathā
৪৩৭. ইধ পন, ভিক্খৰে, ভিক্খু আপত্তিং আপজ্জিত্ৰা ন ইচ্ছতি আপত্তিং পস্সিতুং। তত্র চে ভিক্খূনং এৰং হোতি – ‘‘অযং খো, আৰুসো, ভিক্খু আপত্তিং আপজ্জিত্ৰা ন ইচ্ছতি আপত্তিং পস্সিতুং। হন্দস্স মযং আপত্তিযা অদস্সনে উক্খেপনীযকম্মং করোমা’’তি। তে তস্স আপত্তিযা অদস্সনে উক্খেপনীযকম্মং করোন্তি – অধম্মেন ৰগ্গা…পে॰… অধম্মেন সমগ্গা… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা। তত্রট্ঠো সঙ্ঘো ৰিৰদতি – ‘‘অধম্মেন ৰগ্গকম্মং, অধম্মেন সমগ্গকম্মং, ধম্মেন ৰগ্গকম্মং, ধম্মপতিরূপকেন ৰগ্গকম্মং, ধম্মপতিরূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি। তত্র, ভিক্খৰে, যে তে ভিক্খূ এৰমাহংসু – ‘‘ধম্মপতিরূপকেন সমগ্গকম্ম’’ন্তি, যে চ তে ভিক্খূ এৰমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৰাদিনো। ইমে পঞ্চ ৰারা সংখিত্তা।
437. Idha pana, bhikkhave, bhikkhu āpattiṃ āpajjitvā na icchati āpattiṃ passituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ passituṃ. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
অদস্সনে উক্খেপনীযকম্মৰিৰাদকথা নিট্ঠিতা।
Adassane ukkhepanīyakammavivādakathā niṭṭhitā.
