| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༥༣. ཨདསྶནེ ཨུཀྑེཔནཱིཡཀམྨཔཊིཔྤསྶདྡྷིཀཐཱ
253. Adassane ukkhepanīyakammapaṭippassaddhikathā
༤༢༦. ཨིདྷ པན, བྷིཀྑཝེ, བྷིཀྑུ སངྒྷེན ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཨཱཔཏྟིཡཱ ཨདསྶནེ ཨུཀྑེཔནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ སངྒྷེན ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཨཱཔཏྟིཡཱ ཨདསྶནེ ཨུཀྑེཔནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཧནྡསྶ མཡཾ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ པཊིཔྤསྶམྦྷེནྟི – ཨདྷམྨེན ཝགྒཱ། སོ ཏམྷཱ ཨཱཝཱསཱ ཨཉྙཾ ཨཱཝཱསཾ གཙྪཏི། ཏཏྠཔི བྷིཀྑཱུནཾ ཨེཝཾ ཧོཏི – ‘‘ཨིམསྶ ཁོ, ཨཱཝུསོ, བྷིཀྑུནོ སངྒྷེན ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ པཊིཔྤསྶདྡྷཾ ཨདྷམྨེན ཝགྒེཧི། ཧནྡསྶ མཡཾ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨཾ པཊིཔྤསྶམྦྷེནྟི – ཨདྷམྨེན སམགྒཱ…པེ॰… དྷམྨེན ཝགྒཱ… དྷམྨཔཏིརཱུཔཀེན ཝགྒཱ… དྷམྨཔཏིརཱུཔཀེན སམགྒཱ…པེ॰…།
426. Idha pana, bhikkhave, bhikkhu saṅghena āpattiyā adassane ukkhepanīyakammakato sammā vattati, lomaṃ pāteti, netthāraṃ vattati, āpattiyā adassane ukkhepanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena āpattiyā adassane ukkhepanīyakammakato sammā vattati, lomaṃ pāteti, netthāraṃ vattati, āpattiyā adassane ukkhepanīyassa kammassa paṭippassaddhiṃ yācati. Handassa mayaṃ āpattiyā adassane ukkhepanīyakammaṃ paṭippassambhemā’’ti. Te tassa āpattiyā adassane ukkhepanīyakammaṃ paṭippassambhenti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘imassa kho, āvuso, bhikkhuno saṅghena āpattiyā adassane ukkhepanīyakammaṃ paṭippassaddhaṃ adhammena vaggehi. Handassa mayaṃ āpattiyā adassane ukkhepanīyakammaṃ paṭippassambhemā’’ti. Te tassa āpattiyā adassane ukkhepanīyakammaṃ paṭippassambhenti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
ཙཀྐཾ ཀཱཏབྦཾ།
Cakkaṃ kātabbaṃ.
ཨདསྶནེ ཨུཀྑེཔནཱིཡཀམྨཔཊིཔྤསྶདྡྷིཀཐཱ ནིཊྛིཏཱ།
Adassane ukkhepanīyakammapaṭippassaddhikathā niṭṭhitā.
