| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៤៦. អទស្សនេ ឧក្ខេបនីយកម្មកថា
246. Adassane ukkhepanīyakammakathā
៤១៥. ឥធ បន, ភិក្ខវេ, ភិក្ខុ អាបត្តិំ អាបជ្ជិត្វា ន ឥច្ឆតិ អាបត្តិំ បស្សិតុំ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ អាបត្តិំ អាបជ្ជិត្វា ន ឥច្ឆតិ អាបត្តិំ បស្សិតុំ។ ហន្ទស្ស មយំ អាបត្តិយា អទស្សនេ ឧក្ខេបនីយកម្មំ ករោមា’’តិ។ តេ តស្ស អាបត្តិយា អទស្សនេ ឧក្ខេបនីយកម្មំ ករោន្តិ – អធម្មេន វគ្គា។ សោ តម្ហា អាវាសា អញ្ញំ អាវាសំ គច្ឆតិ។ តត្ថបិ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន អាបត្តិយា អទស្សនេ ឧក្ខេបនីយកម្មកតោ អធម្មេន វគ្គេហិ។ ហន្ទស្ស មយំ អាបត្តិយា អទស្សនេ ឧក្ខេបនីយកម្មំ ករោមា’’តិ។ តេ តស្ស អាបត្តិយា អទស្សនេ ឧក្ខេបនីយកម្មំ ករោន្តិ – អធម្មេន សមគ្គា…បេ.… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា…បេ.…។
415. Idha pana, bhikkhave, bhikkhu āpattiṃ āpajjitvā na icchati āpattiṃ passituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ passituṃ. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena āpattiyā adassane ukkhepanīyakammakato adhammena vaggehi. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
ចក្កំ កាតព្ពំ។
Cakkaṃ kātabbaṃ.
អទស្សនេ ឧក្ខេបនីយកម្មកថា និដ្ឋិតា។
Adassane ukkhepanīyakammakathā niṭṭhitā.
