| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൫. അചേലകവഗ്ഗോ
5. Acelakavaggo
൧. അചേലകസിക്ഖാപദവണ്ണനാ
1. Acelakasikkhāpadavaṇṇanā
അചേലകസ്സാതി യസ്സ കസ്സചി പബ്ബജ്ജാസമാപന്നസ്സ നഗ്ഗസ്സ. പരിബ്ബാജകസ്സാതി ഠപേത്വാ ഭിക്ഖുഞ്ച സാമണേരഞ്ച അവസേസസ്സ യസ്സ കസ്സചി പബ്ബജ്ജാസമാപന്നസ്സ. പരിബ്ബാജികായാതി ഠപേത്വാ ഭിക്ഖുനിം, സിക്ഖമാനം, സാമണേരിഞ്ച അവസേസായ യായ കായചി പബ്ബജ്ജാസമാപന്നായ. ഏതേ ച സബ്ബേ അഞ്ഞതിത്ഥിയാ വേദിതബ്ബാ. തേനാഹ ‘‘ഏതേസം അചേലകാദീനം അഞ്ഞതിത്ഥിയാന’’ന്തി.
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
തേസന്തി അഞ്ഞതിത്ഥിയാനം. ഭാജനം നിക്ഖിപിത്വാതി ആമിസഭരിതം ഭാജനം നിക്ഖിപിത്വാ. ബാഹിരാലേപന്തി തേലാദിം.
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
അചേലകാദയോ യസ്മാ, തിത്ഥിയാവ മതാ ഇധ;
Acelakādayo yasmā, titthiyāva matā idha;
തസ്മാ തിത്ഥിയനാമേന, തികച്ഛേദോ കതോ തയോ.
Tasmā titthiyanāmena, tikacchedo kato tayo.
അതിത്ഥിയസ്സ നഗ്ഗസ്സ, തഥാ തിത്ഥിയലിങ്ഗിനോ;
Atitthiyassa naggassa, tathā titthiyaliṅgino;
ഗഹട്ഠസ്സാപി ഭിക്ഖുസ്സ, കപ്പതീതി വിനിച്ഛയോ.
Gahaṭṭhassāpi bhikkhussa, kappatīti vinicchayo.
അതിത്ഥിയസ്സ ചിത്തേന, തിത്ഥിയസ്സ ച ലിങ്ഗിനോ;
Atitthiyassa cittena, titthiyassa ca liṅgino;
സോതാപന്നാദിനോ ദാതും, കപ്പതീതീധ നോ മതി.
Sotāpannādino dātuṃ, kappatītīdha no mati.
അചേലകസിക്ഖാപദവണ്ണനാ നിട്ഠിതാ.
Acelakasikkhāpadavaṇṇanā niṭṭhitā.
