| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༥. ཨཙེལཀཝགྒོ
5. Acelakavaggo
༡. ཨཙེལཀསིཀྑཱཔདཝཎྞནཱ
1. Acelakasikkhāpadavaṇṇanā
ཨཙེལཀསྶཱཏི ཡསྶ ཀསྶཙི པབྦཛྫཱསམཱཔནྣསྶ ནགྒསྶ། པརིབྦཱཛཀསྶཱཏི ཋཔེཏྭཱ བྷིཀྑུཉྩ སཱམཎེརཉྩ ཨཝསེསསྶ ཡསྶ ཀསྶཙི པབྦཛྫཱསམཱཔནྣསྶ། པརིབྦཱཛིཀཱཡཱཏི ཋཔེཏྭཱ བྷིཀྑུནིཾ, སིཀྑམཱནཾ, སཱམཎེརིཉྩ ཨཝསེསཱཡ ཡཱཡ ཀཱཡཙི པབྦཛྫཱསམཱཔནྣཱཡ། ཨེཏེ ཙ སབྦེ ཨཉྙཏིཏྠིཡཱ ཝེདིཏབྦཱ། ཏེནཱཧ ‘‘ཨེཏེསཾ ཨཙེལཀཱདཱིནཾ ཨཉྙཏིཏྠིཡཱན’’ནྟི།
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
ཏེསནྟི ཨཉྙཏིཏྠིཡཱནཾ། བྷཱཛནཾ ནིཀྑིཔིཏྭཱཏི ཨཱམིསབྷརིཏཾ བྷཱཛནཾ ནིཀྑིཔིཏྭཱ། བཱཧིརཱལེཔནྟི ཏེལཱདིཾ།
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
ཨཙེལཀཱདཡོ ཡསྨཱ, ཏིཏྠིཡཱཝ མཏཱ ཨིདྷ།
Acelakādayo yasmā, titthiyāva matā idha;
ཏསྨཱ ཏིཏྠིཡནཱམེན, ཏིཀཙྪེདོ ཀཏོ ཏཡོ༎
Tasmā titthiyanāmena, tikacchedo kato tayo.
ཨཏིཏྠིཡསྶ ནགྒསྶ, ཏཐཱ ཏིཏྠིཡལིངྒིནོ།
Atitthiyassa naggassa, tathā titthiyaliṅgino;
གཧཊྛསྶཱཔི བྷིཀྑུསྶ, ཀཔྤཏཱིཏི ཝིནིཙྪཡོ༎
Gahaṭṭhassāpi bhikkhussa, kappatīti vinicchayo.
ཨཏིཏྠིཡསྶ ཙིཏྟེན, ཏིཏྠིཡསྶ ཙ ལིངྒིནོ།
Atitthiyassa cittena, titthiyassa ca liṅgino;
སོཏཱཔནྣཱདིནོ དཱཏུཾ, ཀཔྤཏཱིཏཱིདྷ ནོ མཏི༎
Sotāpannādino dātuṃ, kappatītīdha no mati.
ཨཙེལཀསིཀྑཱཔདཝཎྞནཱ ནིཊྛིཏཱ།
Acelakasikkhāpadavaṇṇanā niṭṭhitā.
