| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
೫. ಅಚೇಲಕವಗ್ಗೋ
5. Acelakavaggo
೧. ಅಚೇಲಕಸಿಕ್ಖಾಪದವಣ್ಣನಾ
1. Acelakasikkhāpadavaṇṇanā
ಅಚೇಲಕಸ್ಸಾತಿ ಯಸ್ಸ ಕಸ್ಸಚಿ ಪಬ್ಬಜ್ಜಾಸಮಾಪನ್ನಸ್ಸ ನಗ್ಗಸ್ಸ। ಪರಿಬ್ಬಾಜಕಸ್ಸಾತಿ ಠಪೇತ್ವಾ ಭಿಕ್ಖುಞ್ಚ ಸಾಮಣೇರಞ್ಚ ಅವಸೇಸಸ್ಸ ಯಸ್ಸ ಕಸ್ಸಚಿ ಪಬ್ಬಜ್ಜಾಸಮಾಪನ್ನಸ್ಸ। ಪರಿಬ್ಬಾಜಿಕಾಯಾತಿ ಠಪೇತ್ವಾ ಭಿಕ್ಖುನಿಂ, ಸಿಕ್ಖಮಾನಂ, ಸಾಮಣೇರಿಞ್ಚ ಅವಸೇಸಾಯ ಯಾಯ ಕಾಯಚಿ ಪಬ್ಬಜ್ಜಾಸಮಾಪನ್ನಾಯ। ಏತೇ ಚ ಸಬ್ಬೇ ಅಞ್ಞತಿತ್ಥಿಯಾ ವೇದಿತಬ್ಬಾ। ತೇನಾಹ ‘‘ಏತೇಸಂ ಅಚೇಲಕಾದೀನಂ ಅಞ್ಞತಿತ್ಥಿಯಾನ’’ನ್ತಿ।
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
ತೇಸನ್ತಿ ಅಞ್ಞತಿತ್ಥಿಯಾನಂ। ಭಾಜನಂ ನಿಕ್ಖಿಪಿತ್ವಾತಿ ಆಮಿಸಭರಿತಂ ಭಾಜನಂ ನಿಕ್ಖಿಪಿತ್ವಾ। ಬಾಹಿರಾಲೇಪನ್ತಿ ತೇಲಾದಿಂ।
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
ಅಚೇಲಕಾದಯೋ ಯಸ್ಮಾ, ತಿತ್ಥಿಯಾವ ಮತಾ ಇಧ।
Acelakādayo yasmā, titthiyāva matā idha;
ತಸ್ಮಾ ತಿತ್ಥಿಯನಾಮೇನ, ತಿಕಚ್ಛೇದೋ ಕತೋ ತಯೋ॥
Tasmā titthiyanāmena, tikacchedo kato tayo.
ಅತಿತ್ಥಿಯಸ್ಸ ನಗ್ಗಸ್ಸ, ತಥಾ ತಿತ್ಥಿಯಲಿಙ್ಗಿನೋ।
Atitthiyassa naggassa, tathā titthiyaliṅgino;
ಗಹಟ್ಠಸ್ಸಾಪಿ ಭಿಕ್ಖುಸ್ಸ, ಕಪ್ಪತೀತಿ ವಿನಿಚ್ಛಯೋ॥
Gahaṭṭhassāpi bhikkhussa, kappatīti vinicchayo.
ಅತಿತ್ಥಿಯಸ್ಸ ಚಿತ್ತೇನ, ತಿತ್ಥಿಯಸ್ಸ ಚ ಲಿಙ್ಗಿನೋ।
Atitthiyassa cittena, titthiyassa ca liṅgino;
ಸೋತಾಪನ್ನಾದಿನೋ ದಾತುಂ, ಕಪ್ಪತೀತೀಧ ನೋ ಮತಿ॥
Sotāpannādino dātuṃ, kappatītīdha no mati.
ಅಚೇಲಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Acelakasikkhāpadavaṇṇanā niṭṭhitā.
