| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
૫. અચેલકવગ્ગો
5. Acelakavaggo
૧. અચેલકસિક્ખાપદવણ્ણના
1. Acelakasikkhāpadavaṇṇanā
અચેલકસ્સાતિ યસ્સ કસ્સચિ પબ્બજ્જાસમાપન્નસ્સ નગ્ગસ્સ. પરિબ્બાજકસ્સાતિ ઠપેત્વા ભિક્ખુઞ્ચ સામણેરઞ્ચ અવસેસસ્સ યસ્સ કસ્સચિ પબ્બજ્જાસમાપન્નસ્સ. પરિબ્બાજિકાયાતિ ઠપેત્વા ભિક્ખુનિં, સિક્ખમાનં, સામણેરિઞ્ચ અવસેસાય યાય કાયચિ પબ્બજ્જાસમાપન્નાય. એતે ચ સબ્બે અઞ્ઞતિત્થિયા વેદિતબ્બા. તેનાહ ‘‘એતેસં અચેલકાદીનં અઞ્ઞતિત્થિયાન’’ન્તિ.
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
તેસન્તિ અઞ્ઞતિત્થિયાનં. ભાજનં નિક્ખિપિત્વાતિ આમિસભરિતં ભાજનં નિક્ખિપિત્વા. બાહિરાલેપન્તિ તેલાદિં.
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
અચેલકાદયો યસ્મા, તિત્થિયાવ મતા ઇધ;
Acelakādayo yasmā, titthiyāva matā idha;
તસ્મા તિત્થિયનામેન, તિકચ્છેદો કતો તયો.
Tasmā titthiyanāmena, tikacchedo kato tayo.
અતિત્થિયસ્સ નગ્ગસ્સ, તથા તિત્થિયલિઙ્ગિનો;
Atitthiyassa naggassa, tathā titthiyaliṅgino;
ગહટ્ઠસ્સાપિ ભિક્ખુસ્સ, કપ્પતીતિ વિનિચ્છયો.
Gahaṭṭhassāpi bhikkhussa, kappatīti vinicchayo.
અતિત્થિયસ્સ ચિત્તેન, તિત્થિયસ્સ ચ લિઙ્ગિનો;
Atitthiyassa cittena, titthiyassa ca liṅgino;
સોતાપન્નાદિનો દાતું, કપ્પતીતીધ નો મતિ.
Sotāpannādino dātuṃ, kappatītīdha no mati.
અચેલકસિક્ખાપદવણ્ણના નિટ્ઠિતા.
Acelakasikkhāpadavaṇṇanā niṭṭhitā.
