| Library / Tipiṭaka / તિપિટક • Tipiṭaka / મહાવિભઙ્ગ-અટ્ઠકથા • Mahāvibhaṅga-aṭṭhakathā |
૫. અચેલકવગ્ગો
5. Acelakavaggo
૧. અચેલકસિક્ખાપદવણ્ણના
1. Acelakasikkhāpadavaṇṇanā
૨૬૯. અચેલકવગ્ગસ્સ ૯ પઠમસિક્ખાપદે – પરિવેસનન્તિ પરિવિસનટ્ઠાનં. પરિબ્બાજકસમાપન્નોતિ પબ્બજ્જં સમાપન્નો. દેતિ આપત્તિ પાચિત્તિયસ્સાતિ સમતિત્તિકં યાગુપત્તં એકપયોગેન દેતિ, એકં પાચિત્તિયં. અવચ્છિન્દિત્વા અવચ્છિન્દિત્વા દેતિ, પયોગે પયોગે પાચિત્તિયં. એસેવ નયો પૂવભત્તાદીસુ. તિત્થિયે અતિત્થિયસઞ્ઞીતિ માતા વા પિતા વા તિત્થિયેસુ પબ્બજતિ, તેસં માતાપિતુસઞ્ઞાય દેન્તસ્સાપિ પાચિત્તિયમેવ હોતિ. દાપેતીતિ અનુપસમ્પન્નેન દાપેતિ.
269. Acelakavaggassa 9 paṭhamasikkhāpade – parivesananti parivisanaṭṭhānaṃ. Paribbājakasamāpannoti pabbajjaṃ samāpanno. Deti āpatti pācittiyassāti samatittikaṃ yāgupattaṃ ekapayogena deti, ekaṃ pācittiyaṃ. Avacchinditvā avacchinditvā deti, payoge payoge pācittiyaṃ. Eseva nayo pūvabhattādīsu. Titthiye atitthiyasaññīti mātā vā pitā vā titthiyesu pabbajati, tesaṃ mātāpitusaññāya dentassāpi pācittiyameva hoti. Dāpetīti anupasampannena dāpeti.
૨૭૩. ઉપનિક્ખિપિત્વા દેતીતિ તથારૂપે ભાજને ઠપેત્વા તં ભાજનં તેસં સન્તિકે ભૂમિયં નિક્ખિપિત્વા દેતિ, તેસં વા ભાજનં નિક્ખિપાપેત્વા તત્થ દેતિ, પત્તં આધારકે વા ભૂમિયં વા ઠપેત્વાપિ ‘‘ઇતો ગણ્હથા’’તિ વત્તું વટ્ટતિ. સચે તિત્થિયો વદતિ ‘‘મય્હં નામ ઇદં સન્તકં, ઇધ ન આકિરથા’’તિ આકિરિતબ્બં. તસ્સ સન્તકત્તા સહત્થા દાનં નામ ન હોતિ. સેસમેત્થ ઉત્તાનમેવ.
273.Upanikkhipitvā detīti tathārūpe bhājane ṭhapetvā taṃ bhājanaṃ tesaṃ santike bhūmiyaṃ nikkhipitvā deti, tesaṃ vā bhājanaṃ nikkhipāpetvā tattha deti, pattaṃ ādhārake vā bhūmiyaṃ vā ṭhapetvāpi ‘‘ito gaṇhathā’’ti vattuṃ vaṭṭati. Sace titthiyo vadati ‘‘mayhaṃ nāma idaṃ santakaṃ, idha na ākirathā’’ti ākiritabbaṃ. Tassa santakattā sahatthā dānaṃ nāma na hoti. Sesamettha uttānameva.
એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
અચેલકસિક્ખાપદં પઠમં.
Acelakasikkhāpadaṃ paṭhamaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૫. અચેલકવગ્ગો • 5. Acelakavaggo
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૧. અચેલકસિક્ખાપદવણ્ણના • 1. Acelakasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૧. અચેલકસિક્ખાપદવણ્ણના • 1. Acelakasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. અચેલકસિક્ખાપદવણ્ણના • 1. Acelakasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૧. અચેલકસિક્ખાપદ-અત્થયોજના • 1. Acelakasikkhāpada-atthayojanā
