| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
५. अचेलकवग्गो
5. Acelakavaggo
१. अचेलकसिक्खापदवण्णना
1. Acelakasikkhāpadavaṇṇanā
अचेलकस्साति यस्स कस्सचि पब्बज्जासमापन्नस्स नग्गस्स। परिब्बाजकस्साति ठपेत्वा भिक्खुञ्च सामणेरञ्च अवसेसस्स यस्स कस्सचि पब्बज्जासमापन्नस्स। परिब्बाजिकायाति ठपेत्वा भिक्खुनिं, सिक्खमानं, सामणेरिञ्च अवसेसाय याय कायचि पब्बज्जासमापन्नाय। एते च सब्बे अञ्ञतित्थिया वेदितब्बा। तेनाह ‘‘एतेसं अचेलकादीनं अञ्ञतित्थियान’’न्ति।
Acelakassāti yassa kassaci pabbajjāsamāpannassa naggassa. Paribbājakassāti ṭhapetvā bhikkhuñca sāmaṇerañca avasesassa yassa kassaci pabbajjāsamāpannassa. Paribbājikāyāti ṭhapetvā bhikkhuniṃ, sikkhamānaṃ, sāmaṇeriñca avasesāya yāya kāyaci pabbajjāsamāpannāya. Ete ca sabbe aññatitthiyā veditabbā. Tenāha ‘‘etesaṃ acelakādīnaṃ aññatitthiyāna’’nti.
तेसन्ति अञ्ञतित्थियानं। भाजनं निक्खिपित्वाति आमिसभरितं भाजनं निक्खिपित्वा। बाहिरालेपन्ति तेलादिं।
Tesanti aññatitthiyānaṃ. Bhājanaṃ nikkhipitvāti āmisabharitaṃ bhājanaṃ nikkhipitvā. Bāhirālepanti telādiṃ.
अचेलकादयो यस्मा, तित्थियाव मता इध।
Acelakādayo yasmā, titthiyāva matā idha;
तस्मा तित्थियनामेन, तिकच्छेदो कतो तयो॥
Tasmā titthiyanāmena, tikacchedo kato tayo.
अतित्थियस्स नग्गस्स, तथा तित्थियलिङ्गिनो।
Atitthiyassa naggassa, tathā titthiyaliṅgino;
गहट्ठस्सापि भिक्खुस्स, कप्पतीति विनिच्छयो॥
Gahaṭṭhassāpi bhikkhussa, kappatīti vinicchayo.
अतित्थियस्स चित्तेन, तित्थियस्स च लिङ्गिनो।
Atitthiyassa cittena, titthiyassa ca liṅgino;
सोतापन्नादिनो दातुं, कप्पतीतीध नो मति॥
Sotāpannādino dātuṃ, kappatītīdha no mati.
अचेलकसिक्खापदवण्णना निट्ठिता।
Acelakasikkhāpadavaṇṇanā niṭṭhitā.
