| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៨. អព្យាកតកថាវណ្ណនា
8. Abyākatakathāvaṇṇanā
៩០១-៩០២. ឥទានិ អព្យាកតកថា នាម ហោតិ។ តត្ថ ‘‘អត្ថេសា, ភិក្ខវេ, ចេតនា, សា ច ខោ អព្ពោហារិកា’’តិ (បារា. ២៣៥) វចនតោ ‘‘សព្ពំ សុបិនគតស្ស ចិត្តំ អព្យាកត’’ន្តិ យេសំ លទ្ធិ, សេយ្យថាបិ ឯកច្ចានំ ឧត្តរាបថកានញ្ញេវ, តេ សន្ធាយ បុច្ឆា សកវាទិស្ស, បដិញ្ញា ឥតរស្ស។ សេសមេត្ថ យថា បាឡិមេវ និយ្យាតិ។ សុបិនគតស្ស ចិត្តំ អព្ពោហារិកន្តិ ឥទំ អាបត្តិំ សន្ធាយ វុត្តំ។ សុបិនគតស្ស ហិ បាណាតិបាតាទិវសេន កិញ្ចាបិ អកុសលចិត្តំ បវត្តតិ, វត្ថុវិកោបនំ បន នត្ថីតិ ន សក្កា តត្ថ អាបត្តិំ បញ្ញបេតុំ។ ឥមិនា ការណេន តំ អព្ពោហារិកំ, ន អព្យាកតត្តាតិ។
901-902. Idāni abyākatakathā nāma hoti. Tattha ‘‘atthesā, bhikkhave, cetanā, sā ca kho abbohārikā’’ti (pārā. 235) vacanato ‘‘sabbaṃ supinagatassa cittaṃ abyākata’’nti yesaṃ laddhi, seyyathāpi ekaccānaṃ uttarāpathakānaññeva, te sandhāya pucchā sakavādissa, paṭiññā itarassa. Sesamettha yathā pāḷimeva niyyāti. Supinagatassa cittaṃ abbohārikanti idaṃ āpattiṃ sandhāya vuttaṃ. Supinagatassa hi pāṇātipātādivasena kiñcāpi akusalacittaṃ pavattati, vatthuvikopanaṃ pana natthīti na sakkā tattha āpattiṃ paññapetuṃ. Iminā kāraṇena taṃ abbohārikaṃ, na abyākatattāti.
អព្យាកតកថាវណ្ណនា។
Abyākatakathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (២១៥) ៨. អព្យាកតកថា • (215) 8. Abyākatakathā
