| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. অভিসমযন্তরাযকরপঞ্হো
7. Abhisamayantarāyakarapañho
৭. ‘‘ভন্তে নাগসেন, ইধ যো কোচি গিহী পারাজিকং অজ্ঝাপন্নো ভৰেয্য, সো অপরেন সমযেন পব্বাজেয্য, অত্তনাপি সো ন জানেয্য ‘গিহিপারাজিকং অজ্ঝাপন্নোস্মী’তি, নপি তস্স অঞ্ঞো কোচি আচিক্খেয্য ‘গিহিপারাজিকং অজ্ঝাপন্নোসী’তি। সো চ তথত্তায পটিপজ্জেয্য, অপি নু তস্স ধম্মাভিসমযো ভৰেয্যা’’তি? ‘‘ন হি, মহারাজা’’তি। ‘‘কেন, ভন্তে, কারণেনা’’তি? ‘‘যো তস্স হেতু ধম্মাভিসমযায, সো তস্স সমুচ্ছিন্নো, তস্মা ধম্মাভিসমযো ন ভৰতী’’তি।
7. ‘‘Bhante nāgasena, idha yo koci gihī pārājikaṃ ajjhāpanno bhaveyya, so aparena samayena pabbājeyya, attanāpi so na jāneyya ‘gihipārājikaṃ ajjhāpannosmī’ti, napi tassa añño koci ācikkheyya ‘gihipārājikaṃ ajjhāpannosī’ti. So ca tathattāya paṭipajjeyya, api nu tassa dhammābhisamayo bhaveyyā’’ti? ‘‘Na hi, mahārājā’’ti. ‘‘Kena, bhante, kāraṇenā’’ti? ‘‘Yo tassa hetu dhammābhisamayāya, so tassa samucchinno, tasmā dhammābhisamayo na bhavatī’’ti.
‘‘ভন্তে নাগসেন, তুম্হে ভণথ ‘জানন্তস্স কুক্কুচ্চং হোতি, কুক্কুচ্চে সতি আৰরণং হোতি, আৰটে চিত্তে ধম্মাভিসমযো ন হোতী’তি। ইমস্স পন অজানন্তস্স অকুক্কুচ্চজাতস্স সন্তচিত্তস্স ৰিহরতো কেন কারণেন ধম্মাভিসমযো ন হোতি, ৰিসমেন ৰিসমেনেসো পঞ্হো গচ্ছতি, চিন্তেত্ৰা ৰিসজ্জেথা’’তি।
‘‘Bhante nāgasena, tumhe bhaṇatha ‘jānantassa kukkuccaṃ hoti, kukkucce sati āvaraṇaṃ hoti, āvaṭe citte dhammābhisamayo na hotī’ti. Imassa pana ajānantassa akukkuccajātassa santacittassa viharato kena kāraṇena dhammābhisamayo na hoti, visamena visameneso pañho gacchati, cintetvā visajjethā’’ti.
‘‘রুহতি , মহারাজ, সুকট্ঠে সুকললে মণ্ডখেত্তে সারদং সুখসযিতং বীজ’’ন্তি? ‘‘আম, ভন্তে’’তি। ‘‘অপি নু, মহারাজ, তঞ্ঞেৰ বীজং ঘনসেলসিলাতলে রুহেয্যা’’তি? ‘‘ন হি, ভন্তে’’তি। ‘‘কিস্স পন, মহারাজ, তঞ্ঞেৰ বীজং কললে রুহতি, কিস্স ঘনসেলে ন রুহতী’’তি? ‘‘নত্থি, ভন্তে, তস্স বীজস্স রুহনায ঘনসেলে হেতু, অহেতুনা বীজং ন রুহতী’’তি। ‘‘এৰমেৰ খো, মহারাজ, যেন হেতুনা তস্স ধম্মাভিসমযো ভৰেয্য, সো তস্স হেতু সমুচ্ছিন্নো, অহেতুনা ধম্মাভিসমযো ন হোতি।
‘‘Ruhati , mahārāja, sukaṭṭhe sukalale maṇḍakhette sāradaṃ sukhasayitaṃ bīja’’nti? ‘‘Āma, bhante’’ti. ‘‘Api nu, mahārāja, taññeva bījaṃ ghanaselasilātale ruheyyā’’ti? ‘‘Na hi, bhante’’ti. ‘‘Kissa pana, mahārāja, taññeva bījaṃ kalale ruhati, kissa ghanasele na ruhatī’’ti? ‘‘Natthi, bhante, tassa bījassa ruhanāya ghanasele hetu, ahetunā bījaṃ na ruhatī’’ti. ‘‘Evameva kho, mahārāja, yena hetunā tassa dhammābhisamayo bhaveyya, so tassa hetu samucchinno, ahetunā dhammābhisamayo na hoti.
‘‘যথা ৰা পন, মহারাজ, দণ্ডলেড্ডুলগুল়মুগ্গরা পথৰিযা ঠানমুপগচ্ছন্তি, অপি নু, মহারাজ, তে যেৰ দণ্ডলেড্ডুলগুল়মুগ্গরা গগনে ঠানমুপগচ্ছন্তী’’তি? ‘‘ন হি ভন্তে’’তি। ‘‘কিং পনেত্থ, মহারাজ, কারণং, যেন কারণেন তে যেৰ দণ্ডলেড্ডুলগুল়মুগ্গরা পথৰিযা ঠানমুপগচ্ছন্তি, কেন কারণেন গগনে ন তিট্ঠন্তী’’তি? ‘‘নত্থি, ভন্তে, তেসং দণ্ডলেড্ডুলগুল়মুগ্গরানং পতিট্ঠানায আকাসে হেতু, অহেতুনা ন তিট্ঠন্তী’’তি । ‘‘এৰমেৰ খো, মহারাজ, তস্স তেন দোসেন অভিসমযহেতু সমুচ্ছিন্নো, হেতুসমুগ্ঘাতে অহেতুনা অভিসমযো ন হোতীতি।
‘‘Yathā vā pana, mahārāja, daṇḍaleḍḍulaguḷamuggarā pathaviyā ṭhānamupagacchanti, api nu, mahārāja, te yeva daṇḍaleḍḍulaguḷamuggarā gagane ṭhānamupagacchantī’’ti? ‘‘Na hi bhante’’ti. ‘‘Kiṃ panettha, mahārāja, kāraṇaṃ, yena kāraṇena te yeva daṇḍaleḍḍulaguḷamuggarā pathaviyā ṭhānamupagacchanti, kena kāraṇena gagane na tiṭṭhantī’’ti? ‘‘Natthi, bhante, tesaṃ daṇḍaleḍḍulaguḷamuggarānaṃ patiṭṭhānāya ākāse hetu, ahetunā na tiṭṭhantī’’ti . ‘‘Evameva kho, mahārāja, tassa tena dosena abhisamayahetu samucchinno, hetusamugghāte ahetunā abhisamayo na hotīti.
‘‘যথা ৰা পন, মহারাজ, থলে অগ্গি জলতি, অপি নু খো, মহারাজ, সো যেৰ অগ্গি উদকে জলতী’’তি? ‘‘ন হি, ভন্তে’’তি। ‘‘কিং পনেত্থ, মহারাজ, কারণং, যেন কারণেন সো যেৰ অগ্গি থলে জলতি, কেন কারণেন উদকে ন জলতী’’তি? ‘‘নত্থি, ভন্তে, অগ্গিস্স জলনায উদকে হেতু, অহেতুনা ন জলতী’’তি। ‘‘এৰমেৰ খো, মহারাজ, তস্স তেন দোসেন অভিসমযহেতু সমুচ্ছিন্নো, হেতুসমুগ্ঘাতে অহেতুনা ধম্মাভিসমযো ন হোতী’’তি।
‘‘Yathā vā pana, mahārāja, thale aggi jalati, api nu kho, mahārāja, so yeva aggi udake jalatī’’ti? ‘‘Na hi, bhante’’ti. ‘‘Kiṃ panettha, mahārāja, kāraṇaṃ, yena kāraṇena so yeva aggi thale jalati, kena kāraṇena udake na jalatī’’ti? ‘‘Natthi, bhante, aggissa jalanāya udake hetu, ahetunā na jalatī’’ti. ‘‘Evameva kho, mahārāja, tassa tena dosena abhisamayahetu samucchinno, hetusamugghāte ahetunā dhammābhisamayo na hotī’’ti.
‘‘ভন্তে নাগসেন, পুনপেতং অত্থং চিন্তেহি, ন মে তত্থ চিত্তসঞ্ঞত্তি ভৰতি, অজানন্তস্স অসতি কুক্কুচ্চে আৰরণং হোতীতি, কারণেন মং সঞ্ঞাপেহী’’তি। ‘‘অপি নু, মহারাজ, ৰিসং হলাহলং অজানন্তেন খাযিতং জীৰিতং হরতী’’তি? ‘‘আম, ভন্তে’’তি। ‘‘এৰমেৰ খো, মহারাজ, অজানন্তেনপি কতং পাপং অভিসমযন্তরাযকরং হোতি।
‘‘Bhante nāgasena, punapetaṃ atthaṃ cintehi, na me tattha cittasaññatti bhavati, ajānantassa asati kukkucce āvaraṇaṃ hotīti, kāraṇena maṃ saññāpehī’’ti. ‘‘Api nu, mahārāja, visaṃ halāhalaṃ ajānantena khāyitaṃ jīvitaṃ haratī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘অপি নু, মহারাজ, অগ্গি অজানিত্ৰা অক্কমন্তং ডহতী’’তি? ‘‘আম, ভন্তে’’তি। ‘‘এৰমেৰ খো, মহারাজ, অজানন্তেনপি কতং পাপং অভিসমযন্তরাযকরং হোতি।
‘‘Api nu, mahārāja, aggi ajānitvā akkamantaṃ ḍahatī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘অপি নু, মহারাজ, অজানন্তং আসীৰিসো ডংসিত্ৰা জীৰিতং হরতী’’তি? ‘‘আম, ভন্তে’’তি। ‘‘এৰমেৰ খো, মহারাজ, অজানন্তেনপি কতং পাপং অভিসমযন্তরাযকরং হোতি।
‘‘Api nu, mahārāja, ajānantaṃ āsīviso ḍaṃsitvā jīvitaṃ haratī’’ti? ‘‘Āma, bhante’’ti. ‘‘Evameva kho, mahārāja, ajānantenapi kataṃ pāpaṃ abhisamayantarāyakaraṃ hoti.
‘‘ননু, মহারাজ, কালিঙ্গরাজা সমণকোলঞ্ঞো সত্তরতনপরিকিণ্ণো হত্থিরতনমভিরুয্হ কুলদস্সনায গচ্ছন্তো অজানন্তোপি নাসক্খি বোধিমণ্ডস্স উপরিতো গন্তুং, ইদমেত্থ, মহারাজ, কারণং, যেন কারণেন অজানন্তেনপি কতং পাপং অভিসমযন্তরাযকরং হোতী’’তি? ‘‘জিনভাসিতং , ভন্তে নাগসেন, কারণং ন সক্কা পটিক্কোসিতুং, এসোৰেতস্স অত্থো তথা সম্পটিচ্ছামী’’তি।
‘‘Nanu, mahārāja, kāliṅgarājā samaṇakolañño sattaratanaparikiṇṇo hatthiratanamabhiruyha kuladassanāya gacchanto ajānantopi nāsakkhi bodhimaṇḍassa uparito gantuṃ, idamettha, mahārāja, kāraṇaṃ, yena kāraṇena ajānantenapi kataṃ pāpaṃ abhisamayantarāyakaraṃ hotī’’ti? ‘‘Jinabhāsitaṃ , bhante nāgasena, kāraṇaṃ na sakkā paṭikkosituṃ, esovetassa attho tathā sampaṭicchāmī’’ti.
অভিসমযন্তরাযকরপঞ্হো সত্তমো।
Abhisamayantarāyakarapañho sattamo.
