| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೧೧. ಅಭಿಜಾನನ್ತಸತಿಪಞ್ಹೋ
11. Abhijānantasatipañho
೧೧. ರಾಜಾ ಆಹ ‘‘ಭನ್ತೇ ನಾಗಸೇನ, ಸಬ್ಬಾ ಸತಿ ಅಭಿಜಾನನ್ತೀ ಉಪ್ಪಜ್ಜತಿ , ಉದಾಹು ಕಟುಮಿಕಾವ ಸತೀ’’ತಿ? ‘‘ಅಭಿಜಾನನ್ತೀಪಿ, ಮಹಾರಾಜ, ಕಟುಮಿಕಾಪಿ ಸತೀ’’ತಿ। ‘‘ಏವಞ್ಹಿ ಖೋ, ಭನ್ತೇ ನಾಗಸೇನ, ಸಬ್ಬಾ ಸತಿ ಅಭಿಜಾನನ್ತೀ, ನತ್ಥಿ ಕಟುಮಿಕಾ ಸತೀ’’ತಿ? ‘‘ಯದಿ ನತ್ಥಿ, ಮಹಾರಾಜ, ಕಟುಮಿಕಾ ಸತಿ, ನತ್ಥಿ ಕಿಞ್ಚಿ ಸಿಪ್ಪಿಕಾನಂ ಕಮ್ಮಾಯತನೇಹಿ ವಾ ಸಿಪ್ಪಾಯತನೇಹಿ ವಾ ವಿಜ್ಜಾಟ್ಠಾನೇಹಿ ವಾ ಕರಣೀಯಂ, ನಿರತ್ಥಕಾ ಆಚರಿಯಾ, ಯಸ್ಮಾ ಚ ಖೋ, ಮಹಾರಾಜ, ಅತ್ಥಿ ಕಟುಮಿಕಾ ಸತಿ, ತಸ್ಮಾ ಅತ್ಥಿ ಕಮ್ಮಾಯತನೇಹಿ ವಾ ಸಿಪ್ಪಾಯತನೇಹಿ ವಾ ವಿಜ್ಜಾಟ್ಠಾನೇಹಿ ವಾ ಕರಣೀಯಂ, ಅತ್ಥೋ ಚ ಆಚರಿಯೇಹೀ’’ತಿ।
11. Rājā āha ‘‘bhante nāgasena, sabbā sati abhijānantī uppajjati , udāhu kaṭumikāva satī’’ti? ‘‘Abhijānantīpi, mahārāja, kaṭumikāpi satī’’ti. ‘‘Evañhi kho, bhante nāgasena, sabbā sati abhijānantī, natthi kaṭumikā satī’’ti? ‘‘Yadi natthi, mahārāja, kaṭumikā sati, natthi kiñci sippikānaṃ kammāyatanehi vā sippāyatanehi vā vijjāṭṭhānehi vā karaṇīyaṃ, niratthakā ācariyā, yasmā ca kho, mahārāja, atthi kaṭumikā sati, tasmā atthi kammāyatanehi vā sippāyatanehi vā vijjāṭṭhānehi vā karaṇīyaṃ, attho ca ācariyehī’’ti.
‘‘ಕಲ್ಲೋಸಿ, ಭನ್ತೇ ನಾಗಸೇನಾ’’ತಿ।
‘‘Kallosi, bhante nāgasenā’’ti.
ಅಭಿಜಾನನ್ತಸತಿಪಞ್ಹೋ ಏಕಾದಸಮೋ।
Abhijānantasatipañho ekādasamo.
ಸತಿವಗ್ಗೋ ಛಟ್ಠೋ।
Sativaggo chaṭṭho.
ಇಮಸ್ಮಿಂ ವಗ್ಗೇ ಏಕಾದಸ ಪಞ್ಹಾ।
Imasmiṃ vagge ekādasa pañhā.
