| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១១. អភិជានន្តសតិបញ្ហោ
11. Abhijānantasatipañho
១១. រាជា អាហ ‘‘ភន្តេ នាគសេន, សព្ពា សតិ អភិជានន្តី ឧប្បជ្ជតិ , ឧទាហុ កដុមិកាវ សតី’’តិ? ‘‘អភិជានន្តីបិ, មហារាជ, កដុមិកាបិ សតី’’តិ។ ‘‘ឯវញ្ហិ ខោ, ភន្តេ នាគសេន, សព្ពា សតិ អភិជានន្តី, នត្ថិ កដុមិកា សតី’’តិ? ‘‘យទិ នត្ថិ, មហារាជ, កដុមិកា សតិ, នត្ថិ កិញ្ចិ សិប្បិកានំ កម្មាយតនេហិ វា សិប្បាយតនេហិ វា វិជ្ជាដ្ឋានេហិ វា ករណីយំ, និរត្ថកា អាចរិយា, យស្មា ច ខោ, មហារាជ, អត្ថិ កដុមិកា សតិ, តស្មា អត្ថិ កម្មាយតនេហិ វា សិប្បាយតនេហិ វា វិជ្ជាដ្ឋានេហិ វា ករណីយំ, អត្ថោ ច អាចរិយេហី’’តិ។
11. Rājā āha ‘‘bhante nāgasena, sabbā sati abhijānantī uppajjati , udāhu kaṭumikāva satī’’ti? ‘‘Abhijānantīpi, mahārāja, kaṭumikāpi satī’’ti. ‘‘Evañhi kho, bhante nāgasena, sabbā sati abhijānantī, natthi kaṭumikā satī’’ti? ‘‘Yadi natthi, mahārāja, kaṭumikā sati, natthi kiñci sippikānaṃ kammāyatanehi vā sippāyatanehi vā vijjāṭṭhānehi vā karaṇīyaṃ, niratthakā ācariyā, yasmā ca kho, mahārāja, atthi kaṭumikā sati, tasmā atthi kammāyatanehi vā sippāyatanehi vā vijjāṭṭhānehi vā karaṇīyaṃ, attho ca ācariyehī’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
អភិជានន្តសតិបញ្ហោ ឯកាទសមោ។
Abhijānantasatipañho ekādasamo.
សតិវគ្គោ ឆដ្ឋោ។
Sativaggo chaṭṭho.
ឥមស្មិំ វគ្គេ ឯកាទស បញ្ហា។
Imasmiṃ vagge ekādasa pañhā.
