4. Abbhañjanadāyakattheraapadānaṃ

14.

‘‘Koṇḍaññassa bhagavato, vītarāgassa tādino;

Ākāsasamacittassa ², nippapañcassa jhāyino.

15.

‘‘Sabbamohātivattassa, sabbalokahitesino;

Abbhañjanaṃ mayā dinnaṃ, dvipadindassa tādino.

16.

‘‘Aparimeyye ito kappe, abbhañjanamadaṃ tadā ⁴;

Duggatiṃ nābhijānāmi, abbhañjanassidaṃ phalaṃ.

17.

‘‘Ito pannarase kappe, cirappo nāma khattiyo;

Sattaratanasampanno, cakkavattī mahabbalo.

18.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā abbhañjanadāyako thero imā gāthāyo abhāsitthāti.

Abbhañjanadāyakattherassāpadānaṃ catutthaṃ.