| Library / Tipiṭaka / ತಿಪಿಟಕ • Tipiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga |
೮-೯-೧೦. ಅಟ್ಠಮ-ನವಮ-ದಸಮಸಿಕ್ಖಾಪದಂ
8-9-10. Aṭṭhama-navama-dasamasikkhāpadaṃ
೧೨೧೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಸಿಕ್ಖಮಾನಾಯ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ…ಪೇ॰… ಸಾಮಣೇರಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ…ಪೇ॰… ಗಿಹಿನಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ। ಮನುಸ್ಸಾ ವಿಹಾರಚಾರಿಕಂ ಆಹಿಣ್ಡನ್ತಾ ಪಸ್ಸಿತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ। ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ॰… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಕಥಞ್ಹಿ ನಾಮ ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪೀತಿ…ಪೇ॰… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪೀತಿ? ‘‘ಸಚ್ಚಂ, ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ…ಪೇ॰… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –
1210. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo sikkhamānāya ummaddāpentipi parimaddāpentipi…pe… sāmaṇeriyā ummaddāpentipi parimaddāpentipi…pe… gihiniyā ummaddāpentipi parimaddāpentipi. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo gihiniyā ummaddāpessantipi parimaddāpessantipi, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhuniyo gihiniyā ummaddāpessantipi parimaddāpessantipīti…pe… saccaṃ kira, bhikkhave, bhikkhuniyo gihiniyā ummaddāpentipi parimaddāpentipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo gihiniyā ummaddāpessantipi parimaddāpessantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
೧೨೧೧. ‘‘ಯಾ ಪನ ಭಿಕ್ಖುನೀ (ಸಿಕ್ಖಮಾನಾಯ…ಪೇ॰… ಸಾಮಣೇರಿಯಾ…ಪೇ॰…) ಗಿಹಿನಿಯಾ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯ’’ನ್ತಿ।
1211.‘‘Yā pana bhikkhunī (sikkhamānāya…pe… sāmaṇeriyā…pe…) gihiniyā ummaddāpeyya vā parimaddāpeyya vā, pācittiya’’nti.
೧೨೧೨. ಯಾ ಪನಾತಿ ಯಾ ಯಾದಿಸಾ…ಪೇ॰… ಭಿಕ್ಖುನೀತಿ…ಪೇ॰… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ।
1212.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ಸಿಕ್ಖಮಾನಾ ನಾಮ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಾ।
Sikkhamānā nāma dve vassāni chasu dhammesu sikkhitasikkhā.
ಸಾಮಣೇರೀ ನಾಮ ದಸಸಿಕ್ಖಾಪದಿಕಾ।
Sāmaṇerī nāma dasasikkhāpadikā.
ಗಿಹಿನೀ ನಾಮ ಅಗಾರಿನೀ ವುಚ್ಚತಿ।
Gihinī nāma agārinī vuccati.
ಉಮ್ಮದ್ದಾಪೇಯ್ಯ ವಾತಿ ಉಮ್ಮದ್ದಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ।
Ummaddāpeyyavāti ummaddāpeti, āpatti pācittiyassa.
ಪರಿಮದ್ದಾಪೇಯ್ಯ ವಾತಿ ಸಮ್ಬಾಹಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ।
Parimaddāpeyya vāti sambāhāpeti, āpatti pācittiyassa.
೧೨೧೩. ಅನಾಪತ್ತಿ ಗಿಲಾನಾಯ 1, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ।
1213. Anāpatti gilānāya 2, āpadāsu, ummattikāya, ādikammikāyāti.
ಅಟ್ಠಮ ನವಮ ದಸಮಸಿಕ್ಖಾಪದಾನಿ ನಿಟ್ಠಿತಾನಿ।
Aṭṭhama navama dasamasikkhāpadāni niṭṭhitāni.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ೮-೯-೧೦. ಅಟ್ಠಮನವಮದಸಮಸಿಕ್ಖಾಪದವಣ್ಣನಾ • 8-9-10. Aṭṭhamanavamadasamasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೮-೧೦. ಅಟ್ಠಮಾದಿಸಿಕ್ಖಾಪದಂ • 8-10. Aṭṭhamādisikkhāpadaṃ
