| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
३-१०. सुवण्णनिक्खसुत्तादिअट्ठकं
3-10. Suvaṇṇanikkhasuttādiaṭṭhakaṃ
१६९. सावत्थियं विहरति…पे॰… ‘‘इधाहं , भिक्खवे, एकच्चं पुग्गलं एवं चेतसा चेतो परिच्च पजानामि – ‘न चायमायस्मा सुवण्णनिक्खस्सापि हेतु…पे॰… सुवण्णनिक्खसतस्सापि हेतु… सिङ्गीनिक्खस्सापि हेतु… सिङ्गीनिक्खसतस्सापि हेतु… पथवियापि जातरूपपरिपूराय हेतु… आमिसकिञ्चिक्खहेतुपि… जीवितहेतुपि… जनपदकल्याणियापि हेतु सम्पजानमुसा भासेय्या’ति। तमेनं पस्सामि अपरेन समयेन लाभसक्कारसिलोकेन अभिभूतं परियादिण्णचित्तं सम्पजानमुसा भासन्तं। एवं दारुणो खो, भिक्खवे, लाभसक्कारसिलोको…पे॰… एवञ्हि वो, भिक्खवे, सिक्खितब्ब’’न्ति। दसमं।
169. Sāvatthiyaṃ viharati…pe… ‘‘idhāhaṃ , bhikkhave, ekaccaṃ puggalaṃ evaṃ cetasā ceto paricca pajānāmi – ‘na cāyamāyasmā suvaṇṇanikkhassāpi hetu…pe… suvaṇṇanikkhasatassāpi hetu… siṅgīnikkhassāpi hetu… siṅgīnikkhasatassāpi hetu… pathaviyāpi jātarūpaparipūrāya hetu… āmisakiñcikkhahetupi… jīvitahetupi… janapadakalyāṇiyāpi hetu sampajānamusā bhāseyyā’ti. Tamenaṃ passāmi aparena samayena lābhasakkārasilokena abhibhūtaṃ pariyādiṇṇacittaṃ sampajānamusā bhāsantaṃ. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti. Dasamaṃ.
दुतियो वग्गो।
Dutiyo vaggo.
तस्सुद्दानं –
Tassuddānaṃ –
द्वे पाति द्वे सुवण्णा च, सिङ्गीहि अपरे दुवे।
Dve pāti dve suvaṇṇā ca, siṅgīhi apare duve;
पथवी किञ्चिक्खजीवितं, जनपदकल्याणिया दसाति॥
Pathavī kiñcikkhajīvitaṃ, janapadakalyāṇiyā dasāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ३-१०. सुवण्णनिक्खसुत्तादिवण्णना • 3-10. Suvaṇṇanikkhasuttādivaṇṇanā
