| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
នសម្មាវត្តនាទិកថា
Nasammāvattanādikathā
៦៨. ន សម្មា វត្តន្តីតិ យថាបញ្ញត្តំ ឧបជ្ឈាយវត្តំ ន បូរេន្តិ។ យោ ន សម្មា វត្តេយ្យាតិ យោ យថាបញ្ញត្តំ វត្តំ ន បូរេយ្យ; សោ ទុក្កដំ អាបជ្ជតីតិ អត្ថោ។ បណាមេតព្ពោតិ អបសាទេតព្ពោ។ ន អធិមត្តំ បេមំ ហោតីតិ ឧបជ្ឈាយម្ហិ អធិមត្តំ គេហស្សិតបេមំ ន ហោតិ។ នាធិមត្តា ភាវនា ហោតីតិ អធិមត្តា មេត្តាភាវនា ន ហោតិ; វុត្តបដិបក្ខនយេន សុក្កបក្ខោ វេទិតព្ពោ។ អលំ បណាមេតុន្តិ យុត្តោ បណាមេតុំ។
68.Na sammā vattantīti yathāpaññattaṃ upajjhāyavattaṃ na pūrenti. Yo na sammā vatteyyāti yo yathāpaññattaṃ vattaṃ na pūreyya; so dukkaṭaṃ āpajjatīti attho. Paṇāmetabboti apasādetabbo. Na adhimattaṃ pemaṃ hotīti upajjhāyamhi adhimattaṃ gehassitapemaṃ na hoti. Nādhimattābhāvanā hotīti adhimattā mettābhāvanā na hoti; vuttapaṭipakkhanayena sukkapakkho veditabbo. Alaṃ paṇāmetunti yutto paṇāmetuṃ.
អប្បណាមេន្តោ ឧបជ្ឈាយោ សាតិសារោ ហោតីតិ សទោសោ ហោតិ, អាបត្តិំ អាបជ្ជតិ; តស្មា ន សម្មា វត្តន្តោ បណាមេតព្ពោវ។ ន សម្មាវត្តនាយ ច យាវ ចីវររជនំ តាវ វត្តេ អករិយមានេ ឧបជ្ឈាយស្ស បរិហានិ ហោតិ។ តស្មា តំ អករោន្តស្ស និស្សយមុត្តកស្សាបិ អមុត្តកស្សាបិ អាបត្តិយេវ។ ឯកច្ចស្ស បត្តទានតោ បដ្ឋាយ អមុត្តកនិស្សយស្សេវ អាបត្តិ។
Appaṇāmento upajjhāyo sātisāro hotīti sadoso hoti, āpattiṃ āpajjati; tasmā na sammā vattanto paṇāmetabbova. Na sammāvattanāya ca yāva cīvararajanaṃ tāva vatte akariyamāne upajjhāyassa parihāni hoti. Tasmā taṃ akarontassa nissayamuttakassāpi amuttakassāpi āpattiyeva. Ekaccassa pattadānato paṭṭhāya amuttakanissayasseva āpatti.
សទ្ធិវិហារិកា សម្មា វត្តន្តិ, ឧបជ្ឈាយោ សម្មា ន វត្តតិ, ឧបជ្ឈាយស្ស អាបត្តិ។ ឧបជ្ឈាយោ សម្មា វត្តតិ, សទ្ធិវិហារិកា សម្មា ន វត្តន្តិ, តេសំ អាបត្តិ។ ឧបជ្ឈាយេ វត្តំ សាទិយន្តេ សទ្ធិវិហារិកា ពហុកាបិ ហោន្តិ, សព្ពេសំ អាបត្តិ។ សចេ ឧបជ្ឈាយោ ‘‘មយ្ហំ ឧបដ្ឋាកោ អត្ថិ, តុម្ហេ អត្តនោ សជ្ឈាយមនសិការាទីសុ យោគំ ករោថា’’តិ វទតិ, សទ្ធិវិហារិកានំ អនាបត្តិ។ សចេ ឧបជ្ឈាយោ សាទិយនំ វា អសាទិយនំ វា ន ជានាតិ, ពាលោ ហោតិ, សទ្ធិវិហារិកា ពហុកា។ តេសុ ឯកោ វត្តសម្បន្នោ ភិក្ខុ ‘‘ឧបជ្ឈាយស្ស កិច្ចំ អហំ ករិស្សាមិ, តុម្ហេ អប្បោស្សុក្កា វិហរថា’’តិ ឯវញ្ចេ អត្តនោ ភារំ កត្វា ឥតរេ វិស្សជ្ជេតិ, តស្ស ភារករណតោ បដ្ឋាយ តេសំ អនាបត្តិ។
Saddhivihārikā sammā vattanti, upajjhāyo sammā na vattati, upajjhāyassa āpatti. Upajjhāyo sammā vattati, saddhivihārikā sammā na vattanti, tesaṃ āpatti. Upajjhāye vattaṃ sādiyante saddhivihārikā bahukāpi honti, sabbesaṃ āpatti. Sace upajjhāyo ‘‘mayhaṃ upaṭṭhāko atthi, tumhe attano sajjhāyamanasikārādīsu yogaṃ karothā’’ti vadati, saddhivihārikānaṃ anāpatti. Sace upajjhāyo sādiyanaṃ vā asādiyanaṃ vā na jānāti, bālo hoti, saddhivihārikā bahukā. Tesu eko vattasampanno bhikkhu ‘‘upajjhāyassa kiccaṃ ahaṃ karissāmi, tumhe appossukkā viharathā’’ti evañce attano bhāraṃ katvā itare vissajjeti, tassa bhārakaraṇato paṭṭhāya tesaṃ anāpatti.
នសម្មាវត្តនាទិកថា និដ្ឋិតា។
Nasammāvattanādikathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១៧. បណាមិតកថា • 17. Paṇāmitakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / នសម្មាវត្តនាទិកថាវណ្ណនា • Nasammāvattanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / នសម្មាវត្តនាទិកថាវណ្ណនា • Nasammāvattanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / នសម្មាវត្តនាទិកថាវណ្ណនា • Nasammāvattanādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / នសម្មាវត្តនាទិកថា • Nasammāvattanādikathā
