| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
២. វិលេខនសិក្ខាបទំ
2. Vilekhanasikkhāpadaṃ
៤៣៨. ទុតិយេ វិនយេ បដិសំយុត្តា កថា វិនយកថាតិ ទស្សេន្តោ អាហ ‘‘វិនយកថា នាមា’’តិអាទិ។ តន្តិ វិនយកថំ។ បទភាជនេន វណ្ណនា វិនយស្ស វណ្ណោ នាមាតិ យោជនា។ តន្តិ វិនយស្ស វណ្ណំ។ បរិយាបុណនំ បរិយត្តិ, វិនយស្ស បរិយត្តិ វិនយបរិយត្តិ, វិនយបរិយត្តិសង្ខាតំ មូលមស្ស វណ្ណស្សាតិ វិនយបរិយត្តិមូលកោ, តំ។ វិនយធរោ លភតីតិ សម្ពន្ធោ។ ហីតិ វិត្ថារោ។ តេ សព្ពេ ភគវា ភាសតីតិ សម្ពន្ធោ។ ហីតិ សច្ចំ។
438. Dutiye vinaye paṭisaṃyuttā kathā vinayakathāti dassento āha ‘‘vinayakathā nāmā’’tiādi. Tanti vinayakathaṃ. Padabhājanena vaṇṇanā vinayassa vaṇṇo nāmāti yojanā. Tanti vinayassa vaṇṇaṃ. Pariyāpuṇanaṃ pariyatti, vinayassa pariyatti vinayapariyatti, vinayapariyattisaṅkhātaṃ mūlamassa vaṇṇassāti vinayapariyattimūlako, taṃ. Vinayadharo labhatīti sambandho. Hīti vitthāro. Te sabbe bhagavā bhāsatīti sambandho. Hīti saccaṃ.
អស្សាតិ វិនយធរស្ស។ ឥធាតិ ឥមស្មិំ សាសនេ។ អលជ្ជិតាតិអាទីសុ ករណត្ថេ បច្ចត្តវចនំ។ អលជ្ជិតាយាតិ ហិ អត្ថោ។ តេន វុត្តំ ‘‘កថំ អលជ្ជិតាយា’’តិអាទិ។ ចាតិ សច្ចំ ។ ‘‘សញ្ចិច្ចា’’តិ បទំ តីសុ វាក្យេសុ យោជេតព្ពំ។ សញ្ចិច្ច អាបត្តិំ អាបជ្ជតិ, សញ្ចិច្ច អាបត្តិំ បរិគូហតិ, សញ្ចិច្ច អគតិគមនញ្ច គច្ឆតីតិ អត្ថោ។ មន្ទោតិ ពាលោ។ មោមូហោតិ អតិសម្មូឡ្ហោ។ វិរាធេតីតិ វិរជ្ឈាបេតិ។ កុក្កុច្ចេ ឧប្បន្នេតិ ‘‘កប្បតិ នុ ខោ, នោ’’តិ វិនយកុក្កុច្ចេ ឧប្បន្នេ។ អយំ បនាតិ អយំ បុគ្គលោ បន វីតិក្កមតិយេវាតិ សម្ពន្ធោ។ អច្ឆមំសេន សូករមំសស្ស វណ្ណសណ្ឋានេន សទិសត្តា, ទីបិមំសេន ច មិគមំសស្ស សទិសត្តា វុត្តំ ‘‘អច្ឆមំសំ សូករមំស’’ន្តិអាទិ។
Assāti vinayadharassa. Idhāti imasmiṃ sāsane. Alajjitātiādīsu karaṇatthe paccattavacanaṃ. Alajjitāyāti hi attho. Tena vuttaṃ ‘‘kathaṃ alajjitāyā’’tiādi. Cāti saccaṃ . ‘‘Sañciccā’’ti padaṃ tīsu vākyesu yojetabbaṃ. Sañcicca āpattiṃ āpajjati, sañcicca āpattiṃ parigūhati, sañcicca agatigamanañca gacchatīti attho. Mandoti bālo. Momūhoti atisammūḷho. Virādhetīti virajjhāpeti. Kukkucce uppanneti ‘‘kappati nu kho, no’’ti vinayakukkucce uppanne. Ayaṃ panāti ayaṃ puggalo pana vītikkamatiyevāti sambandho. Acchamaṃsena sūkaramaṃsassa vaṇṇasaṇṭhānena sadisattā, dīpimaṃsena ca migamaṃsassa sadisattā vuttaṃ ‘‘acchamaṃsaṃ sūkaramaṃsa’’ntiādi.
អាបត្តិំច សតិសម្មោសាយាតិ ឯត្ថ ចសទ្ទោ អវុត្តវាក្យសម្បិណ្ឌនត្ថោ, កត្តព្ពញ្ច ន ហិ ករោតីតិ អត្ថោ។ ឯវន្តិអាទិ និគមនំ។
Āpattiṃca satisammosāyāti ettha casaddo avuttavākyasampiṇḍanattho, kattabbañca na hi karotīti attho. Evantiādi nigamanaṃ.
ឯវំ អវិនយធរស្ស ទោសំ ទស្សេត្វា វិនយធរស្ស គុណំ ទស្សេន្តោ អាហ ‘‘វិនយធរោ បនា’’តិអាទិ។ សោតិ វិនយធរោ។ ហីតិ វិត្ថារោ។ បរូបវាទន្តិ បរេសំ ឧបវាទំ។ សុទ្ធន្តេតិ សុទ្ធស្ស កោដ្ឋាសេ។ តតោតិ បតិដ្ឋានតោ បរន្តិ សម្ពន្ធោ។ អស្សាតិ វិនយធរស្ស។ ឯវន្តិអាទិ និគមនំ។ អស្សាតិ វិនយធរស្ស។ កុក្កុច្ចបកតានន្តិ កុក្កុច្ចេន អភិភូតានំ។ សោតិ វិនយធរោ។ តេហីតិ កុក្កុច្ចបកតេហិ។ សង្ឃមជ្ឈេ កថេន្តស្ស អវិនយធរស្សាតិ យោជនា។ តន្តិ ភយំ សារជ្ជំ។
Evaṃ avinayadharassa dosaṃ dassetvā vinayadharassa guṇaṃ dassento āha ‘‘vinayadharo panā’’tiādi. Soti vinayadharo. Hīti vitthāro. Parūpavādanti paresaṃ upavādaṃ. Suddhanteti suddhassa koṭṭhāse. Tatoti patiṭṭhānato paranti sambandho. Assāti vinayadharassa. Evantiādi nigamanaṃ. Assāti vinayadharassa. Kukkuccapakatānanti kukkuccena abhibhūtānaṃ. Soti vinayadharo. Tehīti kukkuccapakatehi. Saṅghamajjhe kathentassa avinayadharassāti yojanā. Tanti bhayaṃ sārajjaṃ.
បដិបក្ខំ, បដិវិរុទ្ធំ វា អត្ថយន្តិ ឥច្ឆន្តីតិ បច្ចត្ថីកា, ណ្យសទ្ទោ ពហុលំ កត្តាភិធាយកោ, អត្តនោ បច្ចត្ថិកា អត្តបច្ចត្ថិកា។ តត្ថាតិ ទុវិធេសុ បច្ចត្ថិកេសុ។ ឥមេតិ មេត្តិយភុម្មជកវឌ្ឍលិច្ឆវិនោ។ អញ្ញេបិ យេ វា បន ភិក្ខូតិ សម្ពន្ធោ។ អរិដ្ឋភិក្ខុ ច កណ្ដកសាមណេរោ ច វេសាលិកវជ្ជិបុត្តកា ច អរិដ្ឋ…បេ.… វជ្ជីបុត្តកា។ តេ ច សាសនបច្ចត្ថិកា នាមាតិ សម្ពន្ធោ។ បរូបហារោ ច អញ្ញាណោ ច កង្ខាបរវិតរណោ ច បរូ…បេ.… វិតរណា។ តេ អាទយោ យេសំ វាទានន្តិ បរូ…បេ.… វិតរណាទយោ។ តេ ឯវ វាទា ឯតេសន្តិ បរូ…បេ.… វិតរណាទិវាទា។ តេ ច សាសនបច្ចត្ថិកា នាមាតិ សម្ពន្ធោ។ អពុទ្ធសាសនំ ពុទ្ធសាសនន្តិ វត្វា កតបគ្គហា មហាសង្ឃិកាទយោ ច សាសនបច្ចត្ថិកា នាមាតិ យោជនា។ កង្ខាបរវិតរណាទីតិ ឯត្ថ អាទិសទ្ទេន កថាវត្ថុបករណេ អាគតា វាទា សង្គយ្ហន្តិ។ មហាសង្ឃិកាទយោតិ ឯត្ថ អាទិសទ្ទេន ទីបវំសេ អាគតា គណា សង្គយ្ហន្តិ។ អាទិម្ហិ ‘‘វិបរីតទស្សនា’’តិ បទំ សព្ពបទេហិ យោជេតព្ពំ។ ‘‘សហធម្មេនា’’តិ បទស្សត្ថំ ទស្សេតុំ វុត្តំ ‘‘សហ ការណេនា’’តិ។ យថាតិ យេនាការេន និគ្គយ្ហមានេតិ សម្ពន្ធោ។
Paṭipakkhaṃ, paṭiviruddhaṃ vā atthayanti icchantīti paccatthīkā, ṇyasaddo bahulaṃ kattābhidhāyako, attano paccatthikā attapaccatthikā. Tatthāti duvidhesu paccatthikesu. Imeti mettiyabhummajakavaḍḍhalicchavino. Aññepi ye vā pana bhikkhūti sambandho. Ariṭṭhabhikkhu ca kaṇṭakasāmaṇero ca vesālikavajjiputtakā ca ariṭṭha…pe… vajjīputtakā. Te ca sāsanapaccatthikā nāmāti sambandho. Parūpahāro ca aññāṇo ca kaṅkhāparavitaraṇo ca parū…pe… vitaraṇā. Te ādayo yesaṃ vādānanti parū…pe… vitaraṇādayo. Te eva vādā etesanti parū…pe… vitaraṇādivādā. Te ca sāsanapaccatthikā nāmāti sambandho. Abuddhasāsanaṃ buddhasāsananti vatvā katapaggahā mahāsaṅghikādayo ca sāsanapaccatthikā nāmāti yojanā. Kaṅkhāparavitaraṇādīti ettha ādisaddena kathāvatthupakaraṇe āgatā vādā saṅgayhanti. Mahāsaṅghikādayoti ettha ādisaddena dīpavaṃse āgatā gaṇā saṅgayhanti. Ādimhi ‘‘viparītadassanā’’ti padaṃ sabbapadehi yojetabbaṃ. ‘‘Sahadhammenā’’ti padassatthaṃ dassetuṃ vuttaṃ ‘‘saha kāraṇenā’’ti. Yathāti yenākārena niggayhamāneti sambandho.
តត្ថាតិ តិវិធេសុ សទ្ធម្មេសុ។ មហាវត្តានិ សន្តិ, អយំ សព្ពោតិ យោជនា។ ចត្តារិ ផលានិ ចាតិ លិង្គវិបល្លាសេន យោជេតព្ពំ។ ឯត្ថ ចការេន អភិញ្ញាបដិសម្ភិទា សង្គហិតា តាសម្បិ អធិគមសាសនភាវតោ។
Tatthāti tividhesu saddhammesu. Mahāvattāni santi, ayaṃ sabboti yojanā. Cattāri phalāni cāti liṅgavipallāsena yojetabbaṃ. Ettha cakārena abhiññāpaṭisambhidā saṅgahitā tāsampi adhigamasāsanabhāvato.
តត្ថាតិ តិវិធេសុ សទ្ធម្មេសុ។ កេចិ ថេរាតិ ធម្មកថិកា កេចិ ថេរា។ ‘‘យោ ខោ’’តិ កណ្ឋជទុតិយក្ខរេន បឋិតព្ពោ។ បោត្ថកេសុ បន ‘‘យោ វោ’’តិ វការេន បាឋោ អត្ថិ, សោ អយុត្តោ។ កស្មា? ‘‘សោ វោ’’តិ បរតោ វុត្តត្តា, ឯកស្មិំ វាក្យេ ទ្វិន្នំ សមានសុតិសទ្ទានំ អយុត្តត្តា ច។ កេចិ ថេរាតិ បំសុកូលិកា កេចិ ថេរា អាហំសូតិ សម្ពន្ធោ។ ឥតរេ បន ថេរាតិ ធម្មកថិកថេរេហិ ច បំសុកូលិកថេរេហិ ច អញ្ញេ ថេរា។ តេតិ បញ្ច ភិក្ខូ ករិស្សន្តីតិ សម្ពន្ធោ។ ជម្ពុទីបស្ស បច្ចន្តេ តិដ្ឋតីតិ បច្ចន្តិមោ, តស្មិំ។ ជម្ពុទីបស្ស មជ្ឈេ វេមជ្ឈេ តិដ្ឋតីតិ មជ្ឈិមោ។ អថ វា មជ្ឈានំ សុទ្ធានំ ពុទ្ធាទីនំ និវាសោ មជ្ឈិមោ, តស្មិំ។ វីសតិ វគ្គា ឥមស្សាតិ វីសតិវគ្គោ, សោយេវ គណោ វីសតិវគ្គគណោ, តំ។ ឯវន្តិអាទិ និគមនំ។
Tatthāti tividhesu saddhammesu. Keci therāti dhammakathikā keci therā. ‘‘Yo kho’’ti kaṇṭhajadutiyakkharena paṭhitabbo. Potthakesu pana ‘‘yo vo’’ti vakārena pāṭho atthi, so ayutto. Kasmā? ‘‘So vo’’ti parato vuttattā, ekasmiṃ vākye dvinnaṃ samānasutisaddānaṃ ayuttattā ca. Keci therāti paṃsukūlikā keci therā āhaṃsūti sambandho. Itare pana therāti dhammakathikatherehi ca paṃsukūlikatherehi ca aññe therā. Teti pañca bhikkhū karissantīti sambandho. Jambudīpassa paccante tiṭṭhatīti paccantimo, tasmiṃ. Jambudīpassa majjhe vemajjhe tiṭṭhatīti majjhimo. Atha vā majjhānaṃ suddhānaṃ buddhādīnaṃ nivāso majjhimo, tasmiṃ. Vīsati vaggā imassāti vīsativaggo, soyeva gaṇo vīsativaggagaṇo, taṃ. Evantiādi nigamanaṃ.
តស្សាធេយ្យោតិ តស្សាយត្តោ, តស្ស សន្តកោតិ វុត្តំ ហោតិ។ បវារណា អាធេយ្យា, សង្ឃកម្មំ អាធេយ្យំ, បព្ពជ្ជា អាធេយ្យា, ឧបសម្បទា អាធេយ្យាតិ យោជនា។
Tassādheyyoti tassāyatto, tassa santakoti vuttaṃ hoti. Pavāraṇā ādheyyā, saṅghakammaṃ ādheyyaṃ, pabbajjā ādheyyā, upasampadā ādheyyāti yojanā.
យេបិ ឥមេ នវ ឧបោសថាតិ សម្ពន្ធោ។ យាបិ ច ឥមា នវ បវារណាយោតិ យោជនា។ តស្សាតិ វិនយធរស្ស។ តាសន្តិ នវបវារណានំ។
Yepi ime nava uposathāti sambandho. Yāpi ca imā nava pavāraṇāyoti yojanā. Tassāti vinayadharassa. Tāsanti navapavāraṇānaṃ.
យានិបិ ឥមានិ ចត្តារិ សង្ឃកម្មានីតិ យោជេតព្ពំ។ ឯត្ថ ច តានិ វិនយធរាយត្តានេវាតិ បាឋសេសោ អហ្ឈាហរិតព្ពោ។
Yānipi imāni cattāri saṅghakammānīti yojetabbaṃ. Ettha ca tāni vinayadharāyattānevāti pāṭhaseso ahjhāharitabbo.
យាបិ ច អយំ បព្ពជ្ជា ច ឧបសម្បទា ច កាតព្ពាតិ យោជនា។ ហីតិ សច្ចំ។ អញ្ញោតិ វិនយធរតោ បរោ។ សោ ឯវាតិ វិនយធរោ ឯវ។ ‘‘ឧបជ្ឈ’’ន្តិ ធាតុកម្មំ, ‘‘សាមណេរេនា’’តិ ការិតកម្មំ ឧបនេតព្ពំ។ ឯត្ថ ចាតិ ឧបោសថាទីសុ ច។ និស្សយទានញ្ច សាមណេរូបដ្ឋានញ្ច វិសុំ កត្វា ទ្វាទសានិសំសេ លភតីតិបិ សក្កា វត្តុំ។
Yāpi ca ayaṃ pabbajjā ca upasampadā ca kātabbāti yojanā. Hīti saccaṃ. Aññoti vinayadharato paro. So evāti vinayadharo eva. ‘‘Upajjha’’nti dhātukammaṃ, ‘‘sāmaṇerenā’’ti kāritakammaṃ upanetabbaṃ. Ettha cāti uposathādīsu ca. Nissayadānañca sāmaṇerūpaṭṭhānañca visuṃ katvā dvādasānisaṃse labhatītipi sakkā vattuṃ.
វិសុំ វិសុំ កត្វាតិ ‘‘បញ្ចាតិ ច…បេ.… ឯកាទសា’’តិ ច កោដ្ឋាសំ កោដ្ឋាសំ កត្វា, សត្ត កោដ្ឋាសេ កត្វា ភាសតីតិ អធិប្បាយោ។ ថោមេតីតិ សម្មុខា ថោមេតិ។ បសំសតីតិ បរម្មុខា បសំសតិ។ ‘‘ឧគ្គហេតព្ព’’ន្តិបទស្សត្ថំ ទស្សេតុំ វុត្តំ ‘‘បរិយាបុណិតព្ព’’ន្តិ។ អទ្ធនិ ទីឃេ សាធូតិ អទ្ធនិយំ អទ្ធក្ខមំ អទ្ធយោគ្យន្តិ អត្ថោ សាធុអត្ថេ និយបច្ចយោ (មោគ្គល្លានេ ៤.៣៣.៧៣)។
Visuṃ visuṃ katvāti ‘‘pañcāti ca…pe… ekādasā’’ti ca koṭṭhāsaṃ koṭṭhāsaṃ katvā, satta koṭṭhāse katvā bhāsatīti adhippāyo. Thometīti sammukhā thometi. Pasaṃsatīti parammukhā pasaṃsati. ‘‘Uggahetabba’’ntipadassatthaṃ dassetuṃ vuttaṃ ‘‘pariyāpuṇitabba’’nti. Addhani dīghe sādhūti addhaniyaṃ addhakkhamaṃ addhayogyanti attho sādhuatthe niyapaccayo (moggallāne 4.33.73).
ថេរា ច នវា ច មជ្ឈិមា ច ពហូ តេ ភិក្ខូ បរិយាបុណន្តីតិ យោជនា។
Therā ca navā ca majjhimā ca bahū te bhikkhū pariyāpuṇantīti yojanā.
៤៣៩. ‘‘ឧទ្ទិស្សមានេ’’តិ បទស្ស កម្មរូបត្តំ ទស្សេតុំ វុត្តំ ‘‘ឧទ្ទិសិយមានេ’’តិ។ សោ បនាតិ បាតិមោក្ខោ បន។ យស្មា ឧទ្ទិស្សមានោ នាម ហោតិ, តស្មាតិ យោជនា។ ឧទ្ទិសន្តេ វាតិ ឧទ្ទិសិយមានេ វា។ ឧទ្ទិសាបេន្តេ វាតិ ឧទ្ទិសាបិយមានេ វា។ អន្តសទ្ទោ ហិ មានសទ្ទការិយោ។ យោតិ ភិក្ខុ។ នន្តិ តំ បាតិមោក្ខំ។ ចសទ្ទោ ខុទ្ទានុខុទ្ទកបទស្ស ទ្វន្នវាក្យំ ទស្សេតិ, បុព្ពបទេ កការលោបោ ទដ្ឋព្ពោ។ តេសន្តិ ខុទ្ទានុខុទ្ទាកានំ។ ហីតិ សច្ចំ។ ឯតានីតិ ខុទ្ទានុខុទ្ទកានិ។ យេតិ ភិក្ខូ។ ‘‘យាវ ឧប្បជ្ជតិយេវ, តាវ សំវត្តន្តិ ឥតិ វុត្តំ ហោតីតិ យោជនា ឥមស្ស នយស្ស បាឋសេសេហិ យោជេតព្ពត្តា។ គរុកភាវំ សល្លក្ខេន្តោ លហុកភាវំ ទស្សេន្តោ អាហ ‘‘អថ វា’’តិអាទិ។ អតិវិយាតិ អតិ ឥ ឯវ។ ឥការោ ហិ សន្ធិវសេន អទស្សនំ គតោ។ វិយសទ្ទោ ឯវការត្ថវាចកោ ‘‘វរម្ហាកំ ភុសាមិវា’’តិ ឯត្ថ (ជា. ១.៣.១០៨) ឥវសទ្ទោ វិយ, អតិ ហុត្វា ឯវាតិ អត្ថោ ទដ្ឋព្ពោ។ ‘‘ឧបសម្បន្នស្សា’’តិ ឯត្ថ សមីបេ សាមិវចនន្តិ (រុបសិទ្ធិយំ ៣១៦ សុត្តេ) អាហ ‘‘ឧបសម្បន្នស្ស សន្តិកេ’’តិ។ តស្សាតិ ឧបសម្បន្នស្ស។ តស្មិន្តិ វិនយេ។ វិវណ្ណេតីតិ ន កេវលំ តស្សេវ វិវណ្ណមត្តមេវ, អថ ខោ និន្ទតិយេវាតិ អាហ ‘‘និន្ទតី’’តិ។ គរហតីតិ តស្សេវ វេវចនំ។ អថ វា និន្ទតីតិ ឧបសម្បន្នស្ស សម្មុខា និន្ទតិ។ គរហតីតិ បរម្មុខា គរហតីតិ។ ទុតិយំ។
439. ‘‘Uddissamāne’’ti padassa kammarūpattaṃ dassetuṃ vuttaṃ ‘‘uddisiyamāne’’ti. So panāti pātimokkho pana. Yasmā uddissamāno nāma hoti, tasmāti yojanā. Uddisante vāti uddisiyamāne vā. Uddisāpente vāti uddisāpiyamāne vā. Antasaddo hi mānasaddakāriyo. Yoti bhikkhu. Nanti taṃ pātimokkhaṃ. Casaddo khuddānukhuddakapadassa dvannavākyaṃ dasseti, pubbapade kakāralopo daṭṭhabbo. Tesanti khuddānukhuddākānaṃ. Hīti saccaṃ. Etānīti khuddānukhuddakāni. Yeti bhikkhū. ‘‘Yāva uppajjatiyeva, tāva saṃvattanti iti vuttaṃ hotīti yojanā imassa nayassa pāṭhasesehi yojetabbattā. Garukabhāvaṃ sallakkhento lahukabhāvaṃ dassento āha ‘‘atha vā’’tiādi. Ativiyāti ati i eva. Ikāro hi sandhivasena adassanaṃ gato. Viyasaddo evakāratthavācako ‘‘varamhākaṃ bhusāmivā’’ti ettha (jā. 1.3.108) ivasaddo viya, ati hutvā evāti attho daṭṭhabbo. ‘‘Upasampannassā’’ti ettha samīpe sāmivacananti (rupasiddhiyaṃ 316 sutte) āha ‘‘upasampannassa santike’’ti. Tassāti upasampannassa. Tasminti vinaye. Vivaṇṇetīti na kevalaṃ tasseva vivaṇṇamattameva, atha kho nindatiyevāti āha ‘‘nindatī’’ti. Garahatīti tasseva vevacanaṃ. Atha vā nindatīti upasampannassa sammukhā nindati. Garahatīti parammukhā garahatīti. Dutiyaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៨. សហធម្មិកវគ្គោ • 8. Sahadhammikavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ២. វិលេខនសិក្ខាបទវណ្ណនា • 2. Vilekhanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ២. វិលេខនសិក្ខាបទវណ្ណនា • 2. Vilekhanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ២. វិលេខនសិក្ខាបទវណ្ណនា • 2. Vilekhanasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ២. វិលេខនសិក្ខាបទវណ្ណនា • 2. Vilekhanasikkhāpadavaṇṇanā
