| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
រាជភដាទិវត្ថុកថាវណ្ណនា
Rājabhaṭādivatthukathāvaṇṇanā
៩០-៩៦. រាជភដាទិវត្ថូសុ អាហំសូតិ មនុស្សា វទិំសុ។ តស្មា…បេ.… ឯវមាហាតិ យស្មា សយំ ធម្មស្សាមី, តស្មា ភិក្ខូហិ អបព្ពាជិតព្ពំ ចោរំ អង្គុលិមាលំ បព្ពាជេត្វា អាយតិំ អករណត្ថាយ ភិក្ខូនំ សិក្ខាបទំ បញ្ញបេន្តោ ‘‘ន, ភិក្ខវេ, ធជពន្ធោ ចោរោ បព្ពាជេតព្ពោ, យោ បព្ពាជេយ្យ, អាបត្តិ ទុក្កដស្សា’’តិ អាហ។ ឧបរមន្តីតិ វិរមន្តិ និវត្តន្តិ។ ភិន្ទិត្វាតិ អន្ទុពន្ធនំ ភិន្ទិត្វា។ ឆិន្ទិត្វាតិ សង្ខលិកពន្ធនំ ឆិន្ទិត្វា។ មុញ្ចិត្វាតិ រជ្ជុពន្ធនំ មុញ្ចិត្វា។ វិវរិត្វាតិ គាមពន្ធនាទីសុ គាមទ្វារាទីនិ វិវរិត្វា។ អបស្សមានានំ វា បលាយតីតិ បុរិសគុត្តិយំ បុរិសានំ អបស្សមានានំ បលាយតិ។ ឧបឌ្ឍុបឌ្ឍន្តិ ថោកំ ថោកំ។
90-96. Rājabhaṭādivatthūsu āhaṃsūti manussā vadiṃsu. Tasmā…pe… evamāhāti yasmā sayaṃ dhammassāmī, tasmā bhikkhūhi apabbājitabbaṃ coraṃ aṅgulimālaṃ pabbājetvā āyatiṃ akaraṇatthāya bhikkhūnaṃ sikkhāpadaṃ paññapento ‘‘na, bhikkhave, dhajabandho coro pabbājetabbo, yo pabbājeyya, āpatti dukkaṭassā’’ti āha. Uparamantīti viramanti nivattanti. Bhinditvāti andubandhanaṃ bhinditvā. Chinditvāti saṅkhalikabandhanaṃ chinditvā. Muñcitvāti rajjubandhanaṃ muñcitvā. Vivaritvāti gāmabandhanādīsu gāmadvārādīni vivaritvā. Apassamānānaṃ vā palāyatīti purisaguttiyaṃ purisānaṃ apassamānānaṃ palāyati. Upaḍḍhupaḍḍhanti thokaṃ thokaṃ.
៩៧. អភិសេកាទីសុ ពន្ធនាគារាទីនិ សោធេន្តិ, តំ សន្ធាយាហ ‘‘សព្ពសាធារណេន វា នយេនា’’តិ។ សចេ សយមេវ បណ្ណំ អារោបេន្តិ, ន វដ្ដតីតិ តា ភុជិស្សិត្ថិយោ ‘‘មយម្បិ ទាសិយោ ហោមា’’តិ សយមេវ ទាសិបណ្ណំ លិខាបេន្តិ, ន វដ្ដតិ។ តក្កំ សីសេ អាសិត្តកសទិសាវ ហោន្តីតិ យថា អទាសេ ករោន្តា តក្កេន សីសំ ធោវិត្វា អទាសំ ករោន្តិ, ឯវំ អារាមិកវចនេន ទិន្នត្តា អទាសាវ តេតិ អធិប្បាយោ។ តក្កាសិញ្ចនំ បន សីហឡទីបេ ចារិត្តន្តិ វទន្តិ។ នេវ បព្ពាជេតព្ពោតិ វុត្តន្តិ កប្បិយវចនេន ទិន្នេបិ សង្ឃស្ស អារាមិកទាសត្តា ឯវំ វុត្តំ។ និស្សាមិកទាសោ នាម យស្ស សាមិកា សបុត្តទារាទយោ មតា ហោន្តិ, ន កោចិ តស្ស បរិគ្គាហកោ, សោបិ បព្ពាជេតុំ ន វដ្ដតិ, តំ បន អត្តនាបិ ភុជិស្សំ កាតុំ វដ្ដតិ។ យេ វា បន តស្មិំ រដ្ឋេ សាមិនោ, តេហិបិ ការាបេតុំ វដ្ដតិ។ ‘‘ទេវទាសិបុត្តំ បព្ពាជេតុំ វដ្ដតី’’តិ តីសុ គណ្ឋិបទេសុ វុត្តំ។ ទាសស្ស បព្ពជិត្វា អត្តនោ សាមិកេ ទិស្វា បលាយន្តស្ស អាបត្តិ នត្ថីតិ វទន្តិ។ សេសំ សព្ពត្ថ ឧត្តានមេវ។
97. Abhisekādīsu bandhanāgārādīni sodhenti, taṃ sandhāyāha ‘‘sabbasādhāraṇena vā nayenā’’ti. Sace sayameva paṇṇaṃ āropenti, na vaṭṭatīti tā bhujissitthiyo ‘‘mayampi dāsiyo homā’’ti sayameva dāsipaṇṇaṃ likhāpenti, na vaṭṭati. Takkaṃ sīse āsittakasadisāva hontīti yathā adāse karontā takkena sīsaṃ dhovitvā adāsaṃ karonti, evaṃ ārāmikavacanena dinnattā adāsāva teti adhippāyo. Takkāsiñcanaṃ pana sīhaḷadīpe cārittanti vadanti. Neva pabbājetabboti vuttanti kappiyavacanena dinnepi saṅghassa ārāmikadāsattā evaṃ vuttaṃ. Nissāmikadāso nāma yassa sāmikā saputtadārādayo matā honti, na koci tassa pariggāhako, sopi pabbājetuṃ na vaṭṭati, taṃ pana attanāpi bhujissaṃ kātuṃ vaṭṭati. Ye vā pana tasmiṃ raṭṭhe sāmino, tehipi kārāpetuṃ vaṭṭati. ‘‘Devadāsiputtaṃ pabbājetuṃ vaṭṭatī’’ti tīsu gaṇṭhipadesu vuttaṃ. Dāsassa pabbajitvā attano sāmike disvā palāyantassa āpatti natthīti vadanti. Sesaṃ sabbattha uttānameva.
រាជភដាទិវត្ថុកថាវណ្ណនា និដ្ឋិតា។
Rājabhaṭādivatthukathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
២៧. រាជភដវត្ថុ • 27. Rājabhaṭavatthu
២៨. អង្គុលិមាលចោរវត្ថុ • 28. Aṅgulimālacoravatthu
២៩. ការភេទកចោរវត្ថុ • 29. Kārabhedakacoravatthu
៣០. លិខិតកចោរវត្ថុ • 30. Likhitakacoravatthu
៣១. កសាហតវត្ថុ • 31. Kasāhatavatthu
៣២. លក្ខណាហតវត្ថុ • 32. Lakkhaṇāhatavatthu
៣៣. ឥណាយិកវត្ថុ • 33. Iṇāyikavatthu
៣៤. ទាសវត្ថុ • 34. Dāsavatthu
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā
រាជភដវត្ថុកថា • Rājabhaṭavatthukathā
ចោរវត្ថុកថា • Coravatthukathā
ឥណាយិកវត្ថុកថា • Iṇāyikavatthukathā
ទាសវត្ថុកថា • Dāsavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
ចោរវត្ថុកថាវណ្ណនា • Coravatthukathāvaṇṇanā
ឥណាយិកទាសវត្ថុកថាវណ្ណនា • Iṇāyikadāsavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā
រាជភដវត្ថុកថាវណ្ណនា • Rājabhaṭavatthukathāvaṇṇanā
ចោរវត្ថុកថាវណ្ណនា • Coravatthukathāvaṇṇanā
ឥណាយិកវត្ថុកថាវណ្ណនា • Iṇāyikavatthukathāvaṇṇanā
ទាសវត្ថុកថាវណ្ណនា • Dāsavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi
២៧. រាជភដវត្ថុកថា • 27. Rājabhaṭavatthukathā
២៨. ចោរវត្ថុកថា • 28. Coravatthukathā
៣៣. ឥណាយិកវត្ថុកថា • 33. Iṇāyikavatthukathā
៣៤. ទាសវត្ថុកថា • 34. Dāsavatthukathā
