| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
បាលិលេយ្យកគមនកថា
Pālileyyakagamanakathā
៤៦៧. បាលិលេយ្យកេ វិហរតិ រក្ខិតវនសណ្ឌេតិ បាលិលេយ្យកំ ឧបនិស្សាយ រក្ខិតវនសណ្ឌេ វិហរតិ។ ហត្ថិនាគោតិ មហាហត្ថី។ ហត្ថិកលភេហីតិ ហត្ថិបោតកេហិ។ ហត្ថិច្ឆាបេហីតិ ខីរូបកេហិ ទហរបោតកេហិ។ ឆិន្នគ្គានីតិ តេហិ បុរតោ បុរតោ គច្ឆន្តេហិ ឆិន្នគ្គានិ ខាយិតាវសេសានិ ខាណុសទិសានិ តិណានិ ខាទតិ។ ឱភគ្គោភគ្គន្តិ តេន ហត្ថិនាគេន ឧច្ចដ្ឋានតោ ភញ្ជិត្វា ភញ្ជិត្វា បាតិតំ។ អស្ស សាខាភង្គន្តិ ឯតស្ស សន្តកំ សាខាភង្គំ តេ ខាទន្តិ។ អាវិលានីតិ តេហិ បឋមតរំ ឱតរិត្វា បិវន្តេហិ អាលុលិតានិ កទ្ទមោទកានិ បិវតិ។ ឱគាហាតិ តិត្ថតោ។
467.Pālileyyake viharati rakkhitavanasaṇḍeti pālileyyakaṃ upanissāya rakkhitavanasaṇḍe viharati. Hatthināgoti mahāhatthī. Hatthikalabhehīti hatthipotakehi. Hatthicchāpehīti khīrūpakehi daharapotakehi. Chinnaggānīti tehi purato purato gacchantehi chinnaggāni khāyitāvasesāni khāṇusadisāni tiṇāni khādati. Obhaggobhagganti tena hatthināgena uccaṭṭhānato bhañjitvā bhañjitvā pātitaṃ. Assa sākhābhaṅganti etassa santakaṃ sākhābhaṅgaṃ te khādanti. Āvilānīti tehi paṭhamataraṃ otaritvā pivantehi ālulitāni kaddamodakāni pivati. Ogāhāti titthato.
នាគស្ស នាគេនាតិ ហត្ថិនាគស្ស ពុទ្ធនាគេន។ ឦសាទន្តស្សាតិ រថឦសាសទិសទន្តស្ស។ យទេកោ រមតី វនេតិ យស្មា ពុទ្ធនាគោ វិយ អយម្បិ ហត្ថិនាគោ ឯកោ បវិវិត្តោ វនេ រមតិ; តស្មាស្ស នាគស្ស នាគេន ចិត្តំ សមេតិ, ឯកីភាវរតិយា ឯកសទិសំ ហោតីតិ អត្ថោ។
Nāgassa nāgenāti hatthināgassa buddhanāgena. Īsādantassāti rathaīsāsadisadantassa. Yadeko ramatī vaneti yasmā buddhanāgo viya ayampi hatthināgo eko pavivitto vane ramati; tasmāssa nāgassa nāgena cittaṃ sameti, ekībhāvaratiyā ekasadisaṃ hotīti attho.
យថាភិរន្តំ វិហរិត្វាតិ ឯត្ថ តេមាសំ ភគវា តត្ថ វិហាសីតិ វេទិតព្ពោ។ ឯត្តាវតា កោសម្ពកេហិ កិរ ឧព្ពាឡ្ហោ ភគវា តេមាសំ អរញ្ញំ បវិសិត្វា វសីតិ សព្ពត្ថ កថា បត្ថដា អហោសិ។
Yathābhirantaṃ viharitvāti ettha temāsaṃ bhagavā tattha vihāsīti veditabbo. Ettāvatā kosambakehi kira ubbāḷho bhagavā temāsaṃ araññaṃ pavisitvā vasīti sabbattha kathā patthaṭā ahosi.
អថ ខោ កោសម្ពកា ឧបាសកាតិ អថ ខោ ឥមំ កថាសល្លាបំ សុត្វា កោសម្ពិវាសិនោ ឧបាសកា។
Atha kho kosambakā upāsakāti atha kho imaṃ kathāsallāpaṃ sutvā kosambivāsino upāsakā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ២៧៥. បាលិលេយ្យកគមនកថា • 275. Pālileyyakagamanakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បាលិលេយ្យកគមនកថាវណ្ណនា • Pālileyyakagamanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បាលិលេយ្យកគមនកថាវណ្ណនា • Pālileyyakagamanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / បាលិលេយ្យកគមនកថាវណ្ណនា • Pālileyyakagamanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២៧៥. បាលិលេយ្យកគមនកថា • 275. Pālileyyakagamanakathā
