| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
លិង្គាទិទស្សនកថា
Liṅgādidassanakathā
១៧៩. អាវាសិកាការន្តិ អាវាសិកានំ អាការំ។ ឯស នយោ សព្ពត្ថ។ អាការោ នាម យេន តេសំ វត្តសម្បន្នា វា ន វាតិ អាចារសណ្ឋានំ គយ្ហតិ។ លិង្គំ នាម យំ តេ តត្ថ តត្ថ លីនេ គមយតិ; អទិស្សមានេបិ ជានាបេតីតិ អត្ថោ។ និមិត្តំ នាម យំ ទិស្វា តេ អត្ថីតិ ញាយន្តិ។ ឧទ្ទេសោ នាម យេន តេ ឯវរូបបរិក្ខារាតិ ឧទ្ទិសន្តិ; អបទេសំ លភន្តីតិ អត្ថោ។ សព្ពមេតំ សុបញ្ញត្តមញ្ចបីឋាទីនញ្ចេវ បទសទ្ទាទីនញ្ច អធិវចនំ, យថាយោគំ បន យោជេតព្ពំ។ អាគន្តុកាការាទីសុបិ ឯសេវ នយោ។ តត្ថ អញ្ញាតកន្តិ អញ្ញេសំ សន្តកំ។ បាទានំ ធោតំ ឧទកនិស្សេកន្តិ បាទានំ ធោតានំ ឧទកនិស្សេកំ។ ពហុវចនស្ស ឯកវចនំ វេទិតព្ពំ។ ‘‘បាទានំ ធោតឧទកនិស្សេក’’ន្តិ វា បាឋោ; បាទានំ ធោវនឧទកនិស្សេកន្តិ អត្ថោ។
179.Āvāsikākāranti āvāsikānaṃ ākāraṃ. Esa nayo sabbattha. Ākāro nāma yena tesaṃ vattasampannā vā na vāti ācārasaṇṭhānaṃ gayhati. Liṅgaṃ nāma yaṃ te tattha tattha līne gamayati; adissamānepi jānāpetīti attho. Nimittaṃ nāma yaṃ disvā te atthīti ñāyanti. Uddeso nāma yena te evarūpaparikkhārāti uddisanti; apadesaṃ labhantīti attho. Sabbametaṃ supaññattamañcapīṭhādīnañceva padasaddādīnañca adhivacanaṃ, yathāyogaṃ pana yojetabbaṃ. Āgantukākārādīsupi eseva nayo. Tattha aññātakanti aññesaṃ santakaṃ. Pādānaṃ dhotaṃ udakanissekanti pādānaṃ dhotānaṃ udakanissekaṃ. Bahuvacanassa ekavacanaṃ veditabbaṃ. ‘‘Pādānaṃ dhotaudakanisseka’’nti vā pāṭho; pādānaṃ dhovanaudakanissekanti attho.
១៨០. នានាសំវាសកាទិវត្ថូសុ – សមានសំវាសកទិដ្ឋិន្តិ ‘‘សមានសំវាសកា ឯតេ’’តិ ទិដ្ឋិំ។ ន បុច្ឆន្តីតិ តេសំ លទ្ធិំ ន បុច្ឆន្តិ; អបុច្ឆិត្វាវ វត្តបដិវត្តិំ កត្វា ឯកតោ ឧបោសថំ ករោន្តិ។ នាភិវិតរន្តីតិ នានាសំវាសកភាវំ មទ្ទិតុំ អភិភវិតុំ ន សក្កោន្តិ; តំ ទិដ្ឋិំ ន និស្សជ្ជាបេន្តីតិ អត្ថោ។
180. Nānāsaṃvāsakādivatthūsu – samānasaṃvāsakadiṭṭhinti ‘‘samānasaṃvāsakā ete’’ti diṭṭhiṃ. Na pucchantīti tesaṃ laddhiṃ na pucchanti; apucchitvāva vattapaṭivattiṃ katvā ekato uposathaṃ karonti. Nābhivitarantīti nānāsaṃvāsakabhāvaṃ maddituṃ abhibhavituṃ na sakkonti; taṃ diṭṭhiṃ na nissajjāpentīti attho.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
១០១. លិង្គាទិទស្សនំ • 101. Liṅgādidassanaṃ
១០២. នានាសំវាសកាទីហិ ឧបោសថករណំ • 102. Nānāsaṃvāsakādīhi uposathakaraṇaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / លិង្គាទិទស្សនកថាវណ្ណនា • Liṅgādidassanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / លិង្គាទិទស្សនកថាវណ្ណនា • Liṅgādidassanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / លិង្គាទិទស្សនកថាទិវណ្ណនា • Liṅgādidassanakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១០១. លិង្គាទិទស្សនកថា • 101. Liṅgādidassanakathā
