| Library / Tipiṭaka / តិបិដក • Tipiṭaka / ថេរីគាថាបាឡិ • Therīgāthāpāḷi |
៣. ឧបចាលាថេរីគាថា
3. Upacālātherīgāthā
១៨៩.
189.
‘‘សតិមតី ចក្ខុមតី, ភិក្ខុនី ភាវិតិន្ទ្រិយា;
‘‘Satimatī cakkhumatī, bhikkhunī bhāvitindriyā;
បដិវិជ្ឈិំ បទំ សន្តំ, អកាបុរិសសេវិតំ’’។
Paṭivijjhiṃ padaṃ santaṃ, akāpurisasevitaṃ’’.
១៩០.
190.
‘‘កិំ នុ ជាតិំ ន រោចេសិ, ជាតោ កាមានិ ភុញ្ជតិ;
‘‘Kiṃ nu jātiṃ na rocesi, jāto kāmāni bhuñjati;
ភុញ្ជាហិ កាមរតិយោ, មាហុ បច្ឆានុតាបិនី’’។
Bhuñjāhi kāmaratiyo, māhu pacchānutāpinī’’.
១៩១.
191.
‘‘ជាតស្ស មរណំ ហោតិ, ហត្ថបាទាន ឆេទនំ;
‘‘Jātassa maraṇaṃ hoti, hatthapādāna chedanaṃ;
វធពន្ធបរិក្លេសំ, ជាតោ ទុក្ខំ និគច្ឆតិ។
Vadhabandhapariklesaṃ, jāto dukkhaṃ nigacchati.
១៩២.
192.
‘‘អត្ថិ សក្យកុលេ ជាតោ, សម្ពុទ្ធោ អបរាជិតោ;
‘‘Atthi sakyakule jāto, sambuddho aparājito;
សោ មេ ធម្មមទេសេសិ, ជាតិយា សមតិក្កមំ។
So me dhammamadesesi, jātiyā samatikkamaṃ.
១៩៣.
193.
‘‘ទុក្ខំ ទុក្ខសមុប្បាទំ, ទុក្ខស្ស ច អតិក្កមំ;
‘‘Dukkhaṃ dukkhasamuppādaṃ, dukkhassa ca atikkamaṃ;
អរិយំ ចដ្ឋង្គិកំ មគ្គំ, ទុក្ខូបសមគាមិនំ។
Ariyaṃ caṭṭhaṅgikaṃ maggaṃ, dukkhūpasamagāminaṃ.
១៩៤.
194.
‘‘តស្សាហំ វចនំ សុត្វា, វិហរិំ សាសនេ រតា;
‘‘Tassāhaṃ vacanaṃ sutvā, vihariṃ sāsane ratā;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
១៩៥.
195.
‘‘សព្ពត្ថ វិហតា នន្ទី, តមោខន្ធោ បទាលិតោ;
‘‘Sabbattha vihatā nandī, tamokhandho padālito;
ឯវំ ជានាហិ បាបិម, និហតោ ត្វមសិ អន្តក’’។
Evaṃ jānāhi pāpima, nihato tvamasi antaka’’.
… ឧបចាលា ថេរី…។
… Upacālā therī….
សត្តកនិបាតោ និដ្ឋិតោ។
Sattakanipāto niṭṭhito.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរីគាថា-អដ្ឋកថា • Therīgāthā-aṭṭhakathā / ៣. ឧបចាលាថេរីគាថាវណ្ណនា • 3. Upacālātherīgāthāvaṇṇanā
