| Library / Tipiṭaka / តិបិដក • Tipiṭaka / នេត្តិប្បករណបាឡិ • Nettippakaraṇapāḷi |
២. ឧទ្ទេសវារោ
2. Uddesavāro
១. តត្ថ កតមេ សោឡស ហារា? ទេសនា វិចយោ យុត្តិ បទដ្ឋានោ លក្ខណោ ចតុព្យូហោ អាវដ្ដោ វិភត្តិ បរិវត្តនោ វេវចនោ បញ្ញត្តិ ឱតរណោ សោធនោ អធិដ្ឋានោ បរិក្ខារោ សមារោបនោ ឥតិ។
1. Tattha katame soḷasa hārā? Desanā vicayo yutti padaṭṭhāno lakkhaṇo catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano iti.
តស្សានុគីតិ
Tassānugīti
ទេសនា វិចយោ យុត្តិ, បទដ្ឋានោ ច លក្ខណោ;
Desanā vicayo yutti, padaṭṭhāno ca lakkhaṇo;
ចតុព្យូហោ ច អាវដ្ដោ, វិភត្តិ បរិវត្តនោ។
Catubyūho ca āvaṭṭo, vibhatti parivattano.
វេវចនោ ច បញ្ញត្តិ, ឱតរណោ ច សោធនោ;
Vevacano ca paññatti, otaraṇo ca sodhano;
ឯតេ សោឡស ហារា, បកិត្តិតា អត្ថតោ អសំកិណ្ណា;
Ete soḷasa hārā, pakittitā atthato asaṃkiṇṇā;
ឯតេសញ្ចេវ ភវតិ, វិត្ថារតយា នយវិភត្តីតិ។
Etesañceva bhavati, vitthāratayā nayavibhattīti.
២. តត្ថ កតមេ បញ្ច នយា? នន្ទិយាវដ្ដោ តិបុក្ខលោ សីហវិក្កីឡិតោ ទិសាលោចនោ អង្កុសោ ឥតិ។
2. Tattha katame pañca nayā? Nandiyāvaṭṭo tipukkhalo sīhavikkīḷito disālocano aṅkuso iti.
តស្សានុគីតិ
Tassānugīti
បឋមោ នន្ទិយាវដ្ដោ, ទុតិយោ ច តិបុក្ខលោ;
Paṭhamo nandiyāvaṭṭo, dutiyo ca tipukkhalo;
ទិសាលោចនមាហំសុ , ចតុត្ថំ នយមុត្តមំ;
Disālocanamāhaṃsu , catutthaṃ nayamuttamaṃ;
បញ្ចមោ អង្កុសោ នាម, សព្ពេ បញ្ច នយា គតាតិ។
Pañcamo aṅkuso nāma, sabbe pañca nayā gatāti.
៣. តត្ថ កតមានិ អដ្ឋារស មូលបទានិ? នវ បទានិ កុសលានិ នវ បទានិ អកុសលានិ។ តត្ថ កតមានិ នវ បទានិ អកុសលានិ, តណ្ហា អវិជ្ជា លោភោ ទោសោ មោហោ សុភសញ្ញា សុខសញ្ញា និច្ចសញ្ញា អត្តសញ្ញាតិ, ឥមានិ នវ បទានិ អកុសលានិ, យត្ថ សព្ពោ អកុសលបក្ខោ សង្គហំ សមោសរណំ គច្ឆតិ។
3. Tattha katamāni aṭṭhārasa mūlapadāni? Nava padāni kusalāni nava padāni akusalāni. Tattha katamāni nava padāni akusalāni, taṇhā avijjā lobho doso moho subhasaññā sukhasaññā niccasaññā attasaññāti, imāni nava padāni akusalāni, yattha sabbo akusalapakkho saṅgahaṃ samosaraṇaṃ gacchati.
តត្ថ កតមានិ នវ បទានិ កុសលានិ? សមថោ វិបស្សនា អលោភោ អទោសោ អមោហោ អសុភសញ្ញា ទុក្ខសញ្ញា អនិច្ចសញ្ញា អនត្តសញ្ញាតិ, ឥមានិ នវ បទានិ កុសលានិ, យត្ថ សព្ពោ កុសលបក្ខោ សង្គហំ សមោសរណំ គច្ឆតិ។
Tattha katamāni nava padāni kusalāni? Samatho vipassanā alobho adoso amoho asubhasaññā dukkhasaññā aniccasaññā anattasaññāti, imāni nava padāni kusalāni, yattha sabbo kusalapakkho saṅgahaṃ samosaraṇaṃ gacchati.
តត្រិទំ ឧទ្ទានំ
Tatridaṃ uddānaṃ
តណ្ហា ច អវិជ្ជាបិ ច, លោភោ ទោសោ តថេវ មោហោ ច;
Taṇhā ca avijjāpi ca, lobho doso tatheva moho ca;
ចតុរោ ច វិបល្លាសា, កិលេសភូមី នវ បទានិ។
Caturo ca vipallāsā, kilesabhūmī nava padāni.
សមថោ ច វិបស្សនា ច, កុសលានិ ច យានិ តីណិ មូលានិ;
Samatho ca vipassanā ca, kusalāni ca yāni tīṇi mūlāni;
ចតុរោ សតិបដ្ឋានា, ឥន្ទ្រិយភូមី នវ បទានិ។
Caturo satipaṭṭhānā, indriyabhūmī nava padāni.
នវហិ ច បទេហិ កុសលា, នវហិ ច យុជ្ជន្តិ អកុសលបក្ខា;
Navahi ca padehi kusalā, navahi ca yujjanti akusalapakkhā;
ឯតេ ខោ មូលបទា, ភវន្តិ អដ្ឋារស បទានីតិ។
Ete kho mūlapadā, bhavanti aṭṭhārasa padānīti.
ឧទ្ទេសវារោ។
Uddesavāro.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / នេត្តិប្បករណ-អដ្ឋកថា • Nettippakaraṇa-aṭṭhakathā / ២. ឧទ្ទេសវារវណ្ណនា • 2. Uddesavāravaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / ខុទ្ទកនិកាយ (ដីកា) • Khuddakanikāya (ṭīkā) / នេត្តិប្បករណ-ដីកា • Nettippakaraṇa-ṭīkā / ២. ឧទ្ទេសវារវណ្ណនា • 2. Uddesavāravaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / ខុទ្ទកនិកាយ (ដីកា) • Khuddakanikāya (ṭīkā) / នេត្តិវិភាវិនី • Nettivibhāvinī / ២. ឧទ្ទេសវារអត្ថវិភាវនា • 2. Uddesavāraatthavibhāvanā
