| Library / Tipiṭaka / តិបិដក • Tipiṭaka / នេត្តិប្បករណបាឡិ • Nettippakaraṇapāḷi |
៣. និទ្ទេសវារោ
3. Niddesavāro
៤. តត្ថ សង្ខេបតោ នេត្តិ កិត្តិតា។
4. Tattha saṅkhepato netti kittitā.
ហារសង្ខេបោ
Hārasaṅkhepo
១.
1.
អស្សាទាទីនវតា , និស្សរណម្បិ ច ផលំ ឧបាយោ ច;
Assādādīnavatā , nissaraṇampi ca phalaṃ upāyo ca;
អាណត្តី ច ភគវតោ, យោគីនំ ទេសនាហារោ។
Āṇattī ca bhagavato, yogīnaṃ desanāhāro.
២.
2.
យំ បុច្ឆិតញ្ច វិស្សជ្ជិតញ្ច, សុត្តស្ស យា ច អនុគីតិ;
Yaṃ pucchitañca vissajjitañca, suttassa yā ca anugīti;
សុត្តស្ស យោ បវិចយោ, ហារោ វិចយោតិ និទ្ទិដ្ឋោ។
Suttassa yo pavicayo, hāro vicayoti niddiṭṭho.
៣.
3.
សព្ពេសំ ហារានំ, យា ភូមី យោ ច គោចរោ តេសំ;
Sabbesaṃ hārānaṃ, yā bhūmī yo ca gocaro tesaṃ;
យុត្តាយុត្តបរិក្ខា, ហារោ យុត្តីតិ និទ្ទិដ្ឋោ។
Yuttāyuttaparikkhā, hāro yuttīti niddiṭṭho.
៤.
4.
ធម្មំ ទេសេតិ ជិនោ, តស្ស ច ធម្មស្ស យំ បទដ្ឋានំ;
Dhammaṃ deseti jino, tassa ca dhammassa yaṃ padaṭṭhānaṃ;
ឥតិ យាវ សព្ពធម្មា, ឯសោ ហារោ បទដ្ឋានោ។
Iti yāva sabbadhammā, eso hāro padaṭṭhāno.
៥.
5.
វុត្តម្ហិ ឯកធម្មេ, យេ ធម្មា ឯកលក្ខណា កេចិ;
Vuttamhi ekadhamme, ye dhammā ekalakkhaṇā keci;
វុត្តា ភវន្តិ សព្ពេ, សោ ហារោ លក្ខណោ នាម។
Vuttā bhavanti sabbe, so hāro lakkhaṇo nāma.
៦.
6.
នេរុត្តមធិប្បាយោ, ព្យញ្ជនមថ ទេសនានិទានញ្ច;
Neruttamadhippāyo, byañjanamatha desanānidānañca;
បុព្ពាបរានុសន្ធី, ឯសោ ហារោ ចតុព្យូហោ។
Pubbāparānusandhī, eso hāro catubyūho.
៧.
7.
ឯកម្ហិ បទដ្ឋានេ, បរិយេសតិ សេសកំ បទដ្ឋានំ;
Ekamhi padaṭṭhāne, pariyesati sesakaṃ padaṭṭhānaṃ;
អាវដ្ដតិ បដិបក្ខេ, អាវដ្ដោ នាម សោ ហារោ។
Āvaṭṭati paṭipakkhe, āvaṭṭo nāma so hāro.
៨.
8.
ធម្មញ្ច បទដ្ឋានំ, ភូមិញ្ច វិភជ្ជតេ អយំ ហារោ;
Dhammañca padaṭṭhānaṃ, bhūmiñca vibhajjate ayaṃ hāro;
សាធារណេ អសាធារណេ ច នេយ្យោ វិភត្តីតិ។
Sādhāraṇe asādhāraṇe ca neyyo vibhattīti.
៩.
9.
កុសលាកុសលេ ធម្មេ, និទ្ទិដ្ឋេ ភាវិតេ បហីនេ ច;
Kusalākusale dhamme, niddiṭṭhe bhāvite pahīne ca;
បរិវត្តតិ បដិបក្ខេ, ហារោ បរិវត្តនោ នាម។
Parivattati paṭipakkhe, hāro parivattano nāma.
១០.
10.
វេវចនានិ ពហូនិ តុ, សុត្តេ វុត្តានិ ឯកធម្មស្ស;
Vevacanāni bahūni tu, sutte vuttāni ekadhammassa;
យោ ជានាតិ សុត្តវិទូ, វេវចនោ នាម សោ ហារោ។
Yo jānāti suttavidū, vevacano nāma so hāro.
១១.
11.
ឯកំ ភគវា ធម្មំ, បញ្ញត្តីហិ វិវិធាហិ ទេសេតិ;
Ekaṃ bhagavā dhammaṃ, paññattīhi vividhāhi deseti;
សោ អាការោ ញេយ្យោ, បញ្ញត្តី នាម ហារោតិ។
So ākāro ñeyyo, paññattī nāma hāroti.
១២.
12.
យោ ច បដិច្ចុប្បាទោ, ឥន្ទ្រិយខន្ធា ច ធាតុ អាយតនា;
Yo ca paṭiccuppādo, indriyakhandhā ca dhātu āyatanā;
ឯតេហិ ឱតរតិ យោ, ឱតរណោ នាម សោ ហារោ។
Etehi otarati yo, otaraṇo nāma so hāro.
១៣.
13.
វិស្សជ្ជិតម្ហិ បញ្ហេ, គាថាយំ បុច្ឆិតាយមារព្ភ;
Vissajjitamhi pañhe, gāthāyaṃ pucchitāyamārabbha;
សុទ្ធាសុទ្ធបរិក្ខា, ហារោ សោ សោធនោ នាម។
Suddhāsuddhaparikkhā, hāro so sodhano nāma.
១៤.
14.
ឯកត្តតាយ ធម្មា, យេបិ ច វេមត្តតាយ និទ្ទិដ្ឋា;
Ekattatāya dhammā, yepi ca vemattatāya niddiṭṭhā;
តេន វិកប្បយិតព្ពា, ឯសោ ហារោ អធិដ្ឋានោ។
Tena vikappayitabbā, eso hāro adhiṭṭhāno.
១៥.
15.
យេ ធម្មា យំ ធម្មំ, ជនយន្តិប្បច្ចយា បរម្បរតោ;
Ye dhammā yaṃ dhammaṃ, janayantippaccayā paramparato;
ហេតុមវកឌ្ឍយិត្វា, ឯសោ ហារោ បរិក្ខារោ។
Hetumavakaḍḍhayitvā, eso hāro parikkhāro.
១៦.
16.
យេ ធម្មា យំ មូលា, យេ ចេកត្ថា បកាសិតា មុនិនា;
Ye dhammā yaṃ mūlā, ye cekatthā pakāsitā muninā;
តេ សមរោបយិតព្ពា, ឯស សមារោបនោ ហារោ។
Te samaropayitabbā, esa samāropano hāro.
នយសង្ខេបោ
Nayasaṅkhepo
១៧.
17.
តណ្ហញ្ច អវិជ្ជម្បិ ច, សមថេន វិបស្សនា យោ នេតិ;
Taṇhañca avijjampi ca, samathena vipassanā yo neti;
សច្ចេហិ យោជយិត្វា, អយំ នយោ នន្ទិយាវដ្ដោ។
Saccehi yojayitvā, ayaṃ nayo nandiyāvaṭṭo.
១៨.
18.
យោ អកុសលេ សមូលេហិ, នេតិ កុសលេ ច កុសលមូលេហិ;
Yo akusale samūlehi, neti kusale ca kusalamūlehi;
ភូតំ តថំ អវិតថំ, តិបុក្ខលំ តំ នយំ អាហុ។
Bhūtaṃ tathaṃ avitathaṃ, tipukkhalaṃ taṃ nayaṃ āhu.
១៩.
19.
យោ នេតិ វិបល្លាសេហិ, កិលេសេ ឥន្ទ្រិយេហិ សទ្ធម្មេ;
Yo neti vipallāsehi, kilese indriyehi saddhamme;
ឯតំ នយំ នយវិទូ, សីហវិក្កីឡិតំ អាហុ។
Etaṃ nayaṃ nayavidū, sīhavikkīḷitaṃ āhu.
២០.
20.
វេយ្យាករណេសុ ហិ យេ, កុសលាកុសលា តហិំ តហិំ វុត្តា;
Veyyākaraṇesu hi ye, kusalākusalā tahiṃ tahiṃ vuttā;
មនសា វោលោកយតេ, តំ ខុ ទិសាលោចនំ អាហុ។
Manasā volokayate, taṃ khu disālocanaṃ āhu.
២១.
21.
ឱលោកេត្វា ទិសលោចនេន, ឧក្ខិបិយ យំ សមានេតិ;
Oloketvā disalocanena, ukkhipiya yaṃ samāneti;
សព្ពេ កុសលាកុសលេ, អយំ នយោ អង្កុសោ នាម។
Sabbe kusalākusale, ayaṃ nayo aṅkuso nāma.
២២.
22.
សង្ខិបិយ អង្កុសេន ហិ, នយេហិ តីហិ និទ្ទិសេ សុត្តំ។
Saṅkhipiya aṅkusena hi, nayehi tīhi niddise suttaṃ.
ទ្វាទសបទ
Dvādasapada
២៣.
23.
អក្ខរំ បទំ ព្យញ្ជនំ, និរុត្តិ តថេវ និទ្ទេសោ;
Akkharaṃ padaṃ byañjanaṃ, nirutti tatheva niddeso;
អាការឆដ្ឋវចនំ, ឯត្តាវ ព្យញ្ជនំ សព្ពំ។
Ākārachaṭṭhavacanaṃ, ettāva byañjanaṃ sabbaṃ.
២៤.
24.
សង្កាសនា បកាសនា, វិវរណា វិភជនុត្តានីកម្មបញ្ញត្តិ;
Saṅkāsanā pakāsanā, vivaraṇā vibhajanuttānīkammapaññatti;
ឯតេហិ ឆហិ បទេហិ, អត្ថោ កម្មញ្ច និទ្ទិដ្ឋំ។
Etehi chahi padehi, attho kammañca niddiṭṭhaṃ.
២៥.
25.
តីណិ ច នយា អនូនា, អត្ថស្ស ច ឆប្បទានិ គណិតានិ;
Tīṇi ca nayā anūnā, atthassa ca chappadāni gaṇitāni;
នវហិ បទេហិ ភគវតោ, វចនស្សត្ថោ សមាយុត្តោ។
Navahi padehi bhagavato, vacanassattho samāyutto.
២៦.
26.
អត្ថស្ស នវប្បទានិ, ព្យញ្ជនបរិយេដ្ឋិយា ចតុព្ពីស;
Atthassa navappadāni, byañjanapariyeṭṭhiyā catubbīsa;
និទ្ទេសវារោ។
Niddesavāro.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / នេត្តិប្បករណ-អដ្ឋកថា • Nettippakaraṇa-aṭṭhakathā / ៣. និទ្ទេសវារវណ្ណនា • 3. Niddesavāravaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / ខុទ្ទកនិកាយ (ដីកា) • Khuddakanikāya (ṭīkā) / នេត្តិប្បករណ-ដីកា • Nettippakaraṇa-ṭīkā / ៣. និទ្ទេសវារវណ្ណនា • 3. Niddesavāravaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / ខុទ្ទកនិកាយ (ដីកា) • Khuddakanikāya (ṭīkā) / នេត្តិវិភាវិនី • Nettivibhāvinī / ៣. និទ្ទេសវារអត្ថវិភាវនា • 3. Niddesavāraatthavibhāvanā
