| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৭. তিস্সমেত্তেয্যসুত্তং
7. Tissametteyyasuttaṃ
৮২০.
820.
‘‘মেথুনমনুযুত্তস্স, (ইচ্চাযস্মা তিস্সো মেত্তেয্যো) ৰিঘাতং ব্রূহি মারিস।
‘‘Methunamanuyuttassa, (iccāyasmā tisso metteyyo) vighātaṃ brūhi mārisa;
সুত্ৰান তৰ সাসনং, ৰিৰেকে সিক্খিস্সামসে॥
Sutvāna tava sāsanaṃ, viveke sikkhissāmase.
৮২১.
821.
‘‘মেথুনমনুযুত্তস্স, (মেত্তেয্যাতি ভগৰা) মুস্সতে ৰাপি সাসনং।
‘‘Methunamanuyuttassa, (metteyyāti bhagavā) mussate vāpi sāsanaṃ;
মিচ্ছা চ পটিপজ্জতি, এতং তস্মিং অনারিযং॥
Micchā ca paṭipajjati, etaṃ tasmiṃ anāriyaṃ.
৮২২.
822.
‘‘একো পুব্বে চরিত্ৰান, মেথুনং যো নিসেৰতি।
‘‘Eko pubbe caritvāna, methunaṃ yo nisevati;
যানং ভন্তং ৰ তং লোকে, হীনমাহু পুথুজ্জনং॥
Yānaṃ bhantaṃ va taṃ loke, hīnamāhu puthujjanaṃ.
৮২৩.
823.
‘‘যসো কিত্তি চ যা পুব্বে, হাযতে ৰাপি তস্স সা।
‘‘Yaso kitti ca yā pubbe, hāyate vāpi tassa sā;
এতম্পি দিস্ৰা সিক্খেথ, মেথুনং ৰিপ্পহাতৰে॥
Etampi disvā sikkhetha, methunaṃ vippahātave.
৮২৪.
824.
‘‘সঙ্কপ্পেহি পরেতো সো, কপণো ৰিয ঝাযতি।
‘‘Saṅkappehi pareto so, kapaṇo viya jhāyati;
সুত্ৰা পরেসং নিগ্ঘোসং, মঙ্কু হোতি তথাৰিধো॥
Sutvā paresaṃ nigghosaṃ, maṅku hoti tathāvidho.
৮২৫.
825.
‘‘অথ সত্থানি কুরুতে, পরৰাদেহি চোদিতো।
‘‘Atha satthāni kurute, paravādehi codito;
এস খ্ৰস্স মহাগেধো, মোসৰজ্জং পগাহতি॥
Esa khvassa mahāgedho, mosavajjaṃ pagāhati.
৮২৬.
826.
‘‘পণ্ডিতোতি সমঞ্ঞাতো, একচরিযং অধিট্ঠিতো।
‘‘Paṇḍitoti samaññāto, ekacariyaṃ adhiṭṭhito;
৮২৭.
827.
‘‘এতমাদীনৰং ঞত্ৰা, মুনি পুব্বাপরে ইধ।
‘‘Etamādīnavaṃ ñatvā, muni pubbāpare idha;
একচরিযং দল়্হং কযিরা, ন নিসেৰেথ মেথুনং॥
Ekacariyaṃ daḷhaṃ kayirā, na nisevetha methunaṃ.
৮২৮.
828.
‘‘ৰিৰেকঞ্ঞেৰ সিক্খেথ, এতদরিযানমুত্তমং।
‘‘Vivekaññeva sikkhetha, etadariyānamuttamaṃ;
ন তেন সেট্ঠো মঞ্ঞেথ, স ৰে নিব্বানসন্তিকে॥
Na tena seṭṭho maññetha, sa ve nibbānasantike.
৮২৯.
829.
‘‘রিত্তস্স মুনিনো চরতো, কামেসু অনপেক্খিনো।
‘‘Rittassa munino carato, kāmesu anapekkhino;
তিস্সমেত্তেয্যসুত্তং সত্তমং নিট্ঠিতং।
Tissametteyyasuttaṃ sattamaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৭. তিস্সমেত্তেয্যসুত্তৰণ্ণনা • 7. Tissametteyyasuttavaṇṇanā
