| Library / Tipiṭaka / តិបិដក • Tipiṭaka / ថេរីគាថា-អដ្ឋកថា • Therīgāthā-aṭṭhakathā |
៤. សុជាតាថេរីគាថាវណ្ណនា
4. Sujātātherīgāthāvaṇṇanā
អលង្កតា សុវសនាតិអាទិកា សុជាតាយ ថេរិយា គាថា។ អយម្បិ បុរិមពុទ្ធេសុ កតាធិការា តត្ថ តត្ថ ភវេ វិវដ្ដូបនិស្សយំ កុសលំ ឧបចិនន្តី អនុក្កមេន សម្ភតវិមោក្ខសម្ភារា ហុត្វា ឥមស្មិំ ពុទ្ធុប្បាទេ សាកេតនគរេ សេដ្ឋិកុលេ និព្ពត្តិត្វា វយប្បត្តា មាតាបិតូហិ សមានជាតិកស្ស សេដ្ឋិបុត្តស្ស ទិន្នា ហុត្វា បតិកុលំ គតា។ តត្ថ តេន សទ្ធិំ សុខសំវាសំ វសន្តី ឯកទិវសំ ឧយ្យានំ គន្ត្វា នក្ខត្តកីឡំ កីឡិត្វា បរិជនេន សទ្ធិំ នគរំ អាគច្ឆន្តី អញ្ជនវនេ សត្ថារំ ទិស្វា បសន្នមានសា ឧបសង្កមិត្វា វន្ទិត្វា ឯកមន្តំ និសីទិ។ សត្ថា តស្សា អនុបុព្ពិំ កថំ កថេត្វា កល្លចិត្តតំ ញត្វា ឧបរិ សាមុក្កំសិកំ ធម្មទេសនំ បកាសេសិ។ សា ទេសនាវសានេ អត្តនោ កតាធិការតាយ ញាណស្ស បរិបាកំ គតត្តា ច , សត្ថុ ច ទេសនាវិលាសេន យថានិសិន្នាវ សហ បដិសម្ភិទាហិ អរហត្តំ បត្វា សត្ថារំ វន្ទិត្វា គេហំ គន្ត្វា សាមិកញ្ច មាតាបិតរោ ច អនុជានាបេត្វា សត្ថុអាណាយ ភិក្ខុនុបស្សយំ គន្ត្វា ភិក្ខុនីនំ សន្តិកេ បព្ពជិ។ បព្ពជិត្វា ច អត្តនោ បដិបត្តិំ បច្ចវេក្ខិត្វា ឧទានវសេន –
Alaṅkatā suvasanātiādikā sujātāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī anukkamena sambhatavimokkhasambhārā hutvā imasmiṃ buddhuppāde sāketanagare seṭṭhikule nibbattitvā vayappattā mātāpitūhi samānajātikassa seṭṭhiputtassa dinnā hutvā patikulaṃ gatā. Tattha tena saddhiṃ sukhasaṃvāsaṃ vasantī ekadivasaṃ uyyānaṃ gantvā nakkhattakīḷaṃ kīḷitvā parijanena saddhiṃ nagaraṃ āgacchantī añjanavane satthāraṃ disvā pasannamānasā upasaṅkamitvā vanditvā ekamantaṃ nisīdi. Satthā tassā anupubbiṃ kathaṃ kathetvā kallacittataṃ ñatvā upari sāmukkaṃsikaṃ dhammadesanaṃ pakāsesi. Sā desanāvasāne attano katādhikāratāya ñāṇassa paripākaṃ gatattā ca , satthu ca desanāvilāsena yathānisinnāva saha paṭisambhidāhi arahattaṃ patvā satthāraṃ vanditvā gehaṃ gantvā sāmikañca mātāpitaro ca anujānāpetvā satthuāṇāya bhikkhunupassayaṃ gantvā bhikkhunīnaṃ santike pabbaji. Pabbajitvā ca attano paṭipattiṃ paccavekkhitvā udānavasena –
១៤៥.
145.
‘‘អលង្កតា សុវសនា, មាលិនី ចន្ទនោក្ខិតា;
‘‘Alaṅkatā suvasanā, mālinī candanokkhitā;
សព្ពាភរណសញ្ឆន្នា, ទាសីគណបុរក្ខតា។
Sabbābharaṇasañchannā, dāsīgaṇapurakkhatā.
១៤៦.
146.
‘‘អន្នំ បានញ្ច អាទាយ, ខជ្ជំ ភោជ្ជំ អនប្បកំ;
‘‘Annaṃ pānañca ādāya, khajjaṃ bhojjaṃ anappakaṃ;
គេហតោ និក្ខមិត្វាន, ឧយ្យានមភិហារយិំ។
Gehato nikkhamitvāna, uyyānamabhihārayiṃ.
១៤៧.
147.
‘‘តត្ថ រមិត្វា កីឡិត្វា, អាគច្ឆន្តី សកំ ឃរំ;
‘‘Tattha ramitvā kīḷitvā, āgacchantī sakaṃ gharaṃ;
វិហារំ ទដ្ឋុំ បាវិសិំ, សាកេតេ អញ្ជនំ វនំ។
Vihāraṃ daṭṭhuṃ pāvisiṃ, sākete añjanaṃ vanaṃ.
១៤៨.
148.
‘‘ទិស្វាន លោកបជ្ជោតំ, វន្ទិត្វាន ឧបាវិសិំ;
‘‘Disvāna lokapajjotaṃ, vanditvāna upāvisiṃ;
សោ មេ ធម្មមទេសេសិ, អនុកម្បាយ ចក្ខុមា។
So me dhammamadesesi, anukampāya cakkhumā.
១៤៩.
149.
‘‘សុត្វា ច ខោ មហេសិស្ស, សច្ចំ សម្បដិវិជ្ឈហំ;
‘‘Sutvā ca kho mahesissa, saccaṃ sampaṭivijjhahaṃ;
តត្ថេវ វិរជំ ធម្មំ, ផុសយិំ អមតំ បទំ។
Tattheva virajaṃ dhammaṃ, phusayiṃ amataṃ padaṃ.
១៥០.
150.
‘‘តតោ វិញ្ញាតសទ្ធម្មា, បព្ពជិំ អនគារិយំ;
‘‘Tato viññātasaddhammā, pabbajiṃ anagāriyaṃ;
តិស្សោ វិជ្ជា អនុប្បត្តា, អមោឃំ ពុទ្ធសាសន’’ន្តិ។ –
Tisso vijjā anuppattā, amoghaṃ buddhasāsana’’nti. –
ឥមា គាថា អភាសិ។
Imā gāthā abhāsi.
តត្ថ អលង្កតាតិ វិភូសិតា។ តំ បន អលង្កតាការំ ទស្សេតុំ ‘‘សុវសនា មាលិនី ចន្ទនោក្ខិតា’’តិ វុត្តំ។ តត្ថ មាលិនីតិ មាលាធារិនី។ ចន្ទនោក្ខិតាតិ ចន្ទនានុលិត្តា។ សព្ពាភរណសញ្ឆន្នាតិ ហត្ថូបគាទីហិ សព្ពេហិ អាភរណេហិ អលង្ការវសេន សញ្ឆាទិតសរីរា។
Tattha alaṅkatāti vibhūsitā. Taṃ pana alaṅkatākāraṃ dassetuṃ ‘‘suvasanā mālinī candanokkhitā’’ti vuttaṃ. Tattha mālinīti mālādhārinī. Candanokkhitāti candanānulittā. Sabbābharaṇasañchannāti hatthūpagādīhi sabbehi ābharaṇehi alaṅkāravasena sañchāditasarīrā.
អន្នំ បានញ្ច អាទាយ, ខជ្ជំ ភោជ្ជំ អនប្បកន្តិ សាលិឱទនាទិអន្នំ, អម្ពបានាទិបានំ, បិដ្ឋខាទនីយាទិខជ្ជំ, អវសិដ្ឋំ អាហារសង្ខាតំ ភោជ្ជញ្ច បហូតំ គហេត្វា។ ឧយ្យានមភិហារយិន្តិ នក្ខត្តកីឡាវសេន ឧយ្យានំ ឧបនេសិំ។ អន្នបានាទិំ តត្ថ អានេត្វា សហ បរិជនេន កីឡន្តី រមន្តី បរិចារេសិន្តិ អធិប្បាយោ។
Annaṃpānañca ādāya, khajjaṃ bhojjaṃ anappakanti sāliodanādiannaṃ, ambapānādipānaṃ, piṭṭhakhādanīyādikhajjaṃ, avasiṭṭhaṃ āhārasaṅkhātaṃ bhojjañca pahūtaṃ gahetvā. Uyyānamabhihārayinti nakkhattakīḷāvasena uyyānaṃ upanesiṃ. Annapānādiṃ tattha ānetvā saha parijanena kīḷantī ramantī paricāresinti adhippāyo.
សាកេតេ អញ្ជនំ វនន្តិ សាកេតសមីបេ អញ្ជនវនេ វិហារំ បាវិសិំ។
Sākete añjanaṃ vananti sāketasamīpe añjanavane vihāraṃ pāvisiṃ.
លោកបជ្ជោតន្តិ ញាណបជ្ជោតេន លោកស្ស បជ្ជោតភូតំ។
Lokapajjotanti ñāṇapajjotena lokassa pajjotabhūtaṃ.
ផុសយិន្តិ ផុសិំ, អធិគច្ឆិន្តិ អត្ថោ។ សេសំ វុត្តនយមេវ។
Phusayinti phusiṃ, adhigacchinti attho. Sesaṃ vuttanayameva.
សុជាតាថេរីគាថាវណ្ណនា និដ្ឋិតា។
Sujātātherīgāthāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ថេរីគាថាបាឡិ • Therīgāthāpāḷi / ៤. សុជាតាថេរីគាថា • 4. Sujātātherīgāthā
