| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៤. សោបាកត្ថេរគាថា
4. Sopākattheragāthā
៤៨០.
480.
‘‘ទិស្វា បាសាទឆាយាយំ, ចង្កមន្តំ នរុត្តមំ;
‘‘Disvā pāsādachāyāyaṃ, caṅkamantaṃ naruttamaṃ;
៤៨១.
481.
‘‘ឯកំសំ ចីវរំ កត្វា, សំហរិត្វាន បាណយោ;
‘‘Ekaṃsaṃ cīvaraṃ katvā, saṃharitvāna pāṇayo;
អនុចង្កមិស្សំ វិរជំ, សព្ពសត្តានមុត្តមំ។
Anucaṅkamissaṃ virajaṃ, sabbasattānamuttamaṃ.
៤៨២.
482.
‘‘តតោ បញ្ហេ អបុច្ឆិ មំ, បញ្ហានំ កោវិទោ វិទូ;
‘‘Tato pañhe apucchi maṃ, pañhānaṃ kovido vidū;
អច្ឆម្ភី ច អភីតោ ច, ព្យាកាសិំ សត្ថុនោ អហំ។
Acchambhī ca abhīto ca, byākāsiṃ satthuno ahaṃ.
៤៨៣.
483.
‘‘វិស្សជ្ជិតេសុ បញ្ហេសុ, អនុមោទិ តថាគតោ;
‘‘Vissajjitesu pañhesu, anumodi tathāgato;
ភិក្ខុសង្ឃំ វិលោកេត្វា, ឥមមត្ថំ អភាសថ’’។
Bhikkhusaṅghaṃ viloketvā, imamatthaṃ abhāsatha’’.
៤៨៤.
484.
‘‘លាភា អង្គានំ មគធានំ, យេសាយំ បរិភុញ្ជតិ;
‘‘Lābhā aṅgānaṃ magadhānaṃ, yesāyaṃ paribhuñjati;
ចីវរំ បិណ្ឌបាតញ្ច, បច្ចយំ សយនាសនំ;
Cīvaraṃ piṇḍapātañca, paccayaṃ sayanāsanaṃ;
បច្ចុដ្ឋានញ្ច សាមីចិំ, តេសំ លាភា’’តិ ចាព្រវិ។
Paccuṭṭhānañca sāmīciṃ, tesaṃ lābhā’’ti cābravi.
៤៨៥.
485.
‘‘អជ្ជតគ្គេ មំ សោបាក, ទស្សនាយោបសង្កម;
‘‘Ajjatagge maṃ sopāka, dassanāyopasaṅkama;
ឯសា ចេវ តេ សោបាក, ភវតុ ឧបសម្បទា’’។
Esā ceva te sopāka, bhavatu upasampadā’’.
៤៨៦.
486.
‘‘ជាតិយា សត្តវស្សោហំ, លទ្ធាន ឧបសម្បទំ;
‘‘Jātiyā sattavassohaṃ, laddhāna upasampadaṃ;
ធារេមិ អន្តិមំ ទេហំ, អហោ ធម្មសុធម្មតា’’តិ។
Dhāremi antimaṃ dehaṃ, aho dhammasudhammatā’’ti.
… សោបាកោ ថេរោ…។
… Sopāko thero….
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៤. សោបាកត្ថេរគាថាវណ្ណនា • 4. Sopākattheragāthāvaṇṇanā
