| Library / Tipiṭaka / តិបិដក • Tipiṭaka / បេតវត្ថុបាឡិ • Petavatthupāḷi |
២. ឧព្ពរិវគ្គោ
2. Ubbarivaggo
១. សំសារមោចកបេតិវត្ថុ
1. Saṃsāramocakapetivatthu
៩៥.
95.
‘‘នគ្គា ទុព្ពណ្ណរូបាសិ, កិសា ធមនិសន្ថតា;
‘‘Naggā dubbaṇṇarūpāsi, kisā dhamanisanthatā;
ឧប្ផាសុលិកេ 1 កិសិកេ, កា នុ ត្វំ ឥធ តិដ្ឋសី’’តិ។
Upphāsulike 2 kisike, kā nu tvaṃ idha tiṭṭhasī’’ti.
៩៦.
96.
‘‘អហំ ភទន្តេ បេតីម្ហិ, ទុគ្គតា យមលោកិកា;
‘‘Ahaṃ bhadante petīmhi, duggatā yamalokikā;
បាបកម្មំ ករិត្វាន, បេតលោកំ ឥតោ គតា’’តិ។
Pāpakammaṃ karitvāna, petalokaṃ ito gatā’’ti.
៩៧.
97.
‘‘កិំ នុ កាយេន វាចាយ, មនសា ទុក្កដំ កតំ;
‘‘Kiṃ nu kāyena vācāya, manasā dukkaṭaṃ kataṃ;
កិស្ស កម្មវិបាកេន, បេតលោកំ ឥតោ គតា’’តិ។
Kissa kammavipākena, petalokaṃ ito gatā’’ti.
៩៨.
98.
‘‘អនុកម្បកា មយ្ហំ នាហេសុំ ភន្តេ, បិតា ច មាតា អថវាបិ ញាតកា;
‘‘Anukampakā mayhaṃ nāhesuṃ bhante, pitā ca mātā athavāpi ñātakā;
យេ មំ និយោជេយ្យុំ ទទាហិ ទានំ, បសន្នចិត្តា សមណព្រាហ្មណានំ។
Ye maṃ niyojeyyuṃ dadāhi dānaṃ, pasannacittā samaṇabrāhmaṇānaṃ.
៩៩.
99.
‘‘ឥតោ អហំ វស្សសតានិ បញ្ច, យំ ឯវរូបា វិចរាមិ នគ្គា;
‘‘Ito ahaṃ vassasatāni pañca, yaṃ evarūpā vicarāmi naggā;
ខុទាយ តណ្ហាយ ច ខជ្ជមានា, បាបស្ស កម្មស្ស ផលំ មមេទំ។
Khudāya taṇhāya ca khajjamānā, pāpassa kammassa phalaṃ mamedaṃ.
១០០.
100.
‘‘វន្ទាមិ តំ អយ្យ បសន្នចិត្តា, អនុកម្ប មំ វីរ មហានុភាវ;
‘‘Vandāmi taṃ ayya pasannacittā, anukampa maṃ vīra mahānubhāva;
ទត្វា ច មេ អាទិស យំ ហិ កិញ្ចិ, មោចេហិ មំ ទុគ្គតិយា ភទន្តេ’’តិ។
Datvā ca me ādisa yaṃ hi kiñci, mocehi maṃ duggatiyā bhadante’’ti.
១០១.
101.
សាធូតិ សោ បដិស្សុត្វា, សារិបុត្តោនុកម្បកោ;
Sādhūti so paṭissutvā, sāriputtonukampako;
ភិក្ខូនំ អាលោបំ ទត្វា, បាណិមត្តញ្ច ចោឡកំ;
Bhikkhūnaṃ ālopaṃ datvā, pāṇimattañca coḷakaṃ;
ថាលកស្ស ច បានីយំ, តស្សា ទក្ខិណមាទិសិ។
Thālakassa ca pānīyaṃ, tassā dakkhiṇamādisi.
១០២.
102.
សមនន្តរានុទ្ទិដ្ឋេ, វិបាកោ ឧទបជ្ជថ;
Samanantarānuddiṭṭhe, vipāko udapajjatha;
ភោជនច្ឆាទនបានីយំ, ទក្ខិណាយ ឥទំ ផលំ។
Bhojanacchādanapānīyaṃ, dakkhiṇāya idaṃ phalaṃ.
១០៣.
103.
តតោ សុទ្ធា សុចិវសនា, កាសិកុត្តមធារិនី;
Tato suddhā sucivasanā, kāsikuttamadhārinī;
វិចិត្តវត្ថាភរណា, សារិបុត្តំ ឧបសង្កមិ។
Vicittavatthābharaṇā, sāriputtaṃ upasaṅkami.
១០៤.
104.
‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;
‘‘Abhikkantena vaṇṇena, yā tvaṃ tiṭṭhasi devate;
ឱភាសេន្តី ទិសា សព្ពា, ឱសធី វិយ តារកា។
Obhāsentī disā sabbā, osadhī viya tārakā.
១០៥.
105.
‘‘កេន តេតាទិសោ វណ្ណោ, កេន តេ ឥធ មិជ្ឈតិ;
‘‘Kena tetādiso vaṇṇo, kena te idha mijjhati;
ឧប្បជ្ជន្តិ ច តេ ភោគា, យេ កេចិ មនសោ បិយា។
Uppajjanti ca te bhogā, ye keci manaso piyā.
១០៦.
106.
‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;
‘‘Pucchāmi taṃ devi mahānubhāve, manussabhūtā kimakāsi puññaṃ;
កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
១០៧.
107.
‘‘ឧប្បណ្ឌុកិំ កិសំ ឆាតំ, នគ្គំ សម្បតិតច្ឆវិំ 3;
‘‘Uppaṇḍukiṃ kisaṃ chātaṃ, naggaṃ sampatitacchaviṃ 4;
មុនិ ការុណិកោ លោកេ, តំ មំ អទ្ទក្ខិ ទុគ្គតំ។
Muni kāruṇiko loke, taṃ maṃ addakkhi duggataṃ.
១០៨.
108.
‘‘ភិក្ខូនំ អាលោបំ ទត្វា, បាណិមត្តញ្ច ចោឡកំ;
‘‘Bhikkhūnaṃ ālopaṃ datvā, pāṇimattañca coḷakaṃ;
ថាលកស្ស ច បានីយំ, មម ទក្ខិណមាទិសិ។
Thālakassa ca pānīyaṃ, mama dakkhiṇamādisi.
១០៩.
109.
‘‘អាលោបស្ស ផលំ បស្ស, ភត្តំ វស្សសតំ ទស;
‘‘Ālopassa phalaṃ passa, bhattaṃ vassasataṃ dasa;
ភុញ្ជាមិ កាមកាមិនី, អនេករសព្យញ្ជនំ។
Bhuñjāmi kāmakāminī, anekarasabyañjanaṃ.
១១០.
110.
‘‘បាណិមត្តស្ស ចោឡស្ស, វិបាកំ បស្ស យាទិសំ;
‘‘Pāṇimattassa coḷassa, vipākaṃ passa yādisaṃ;
យាវតា នន្ទរាជស្ស, វិជិតស្មិំ បដិច្ឆទា។
Yāvatā nandarājassa, vijitasmiṃ paṭicchadā.
១១១.
111.
‘‘តតោ ពហុតរា ភន្តេ, វត្ថានច្ឆាទនានិ មេ;
‘‘Tato bahutarā bhante, vatthānacchādanāni me;
កោសេយ្យកម្ពលីយានិ, ខោមកប្បាសិកានិ ច។
Koseyyakambalīyāni, khomakappāsikāni ca.
១១២.
112.
‘‘វិបុលា ច មហគ្ឃា ច, តេបាកាសេវលម្ពរេ;
‘‘Vipulā ca mahagghā ca, tepākāsevalambare;
សាហំ តំ បរិទហាមិ, យំ យំ ហិ មនសោ បិយំ។
Sāhaṃ taṃ paridahāmi, yaṃ yaṃ hi manaso piyaṃ.
១១៣.
113.
‘‘ថាលកស្ស ច បានីយំ, វិបាកំ បស្ស យាទិសំ;
‘‘Thālakassa ca pānīyaṃ, vipākaṃ passa yādisaṃ;
គម្ភីរា ចតុរស្សា ច, បោក្ខរញ្ញោ សុនិម្មិតា។
Gambhīrā caturassā ca, pokkharañño sunimmitā.
១១៤.
114.
‘‘សេតោទកា សុប្បតិត្ថា, សីតា អប្បដិគន្ធិយា;
‘‘Setodakā suppatitthā, sītā appaṭigandhiyā;
បទុមុប្បលសញ្ឆន្នា, វារិកិញ្ជក្ខបូរិតា។
Padumuppalasañchannā, vārikiñjakkhapūritā.
១១៥.
115.
‘‘សាហំ រមាមិ កីឡាមិ, មោទាមិ អកុតោភយា;
‘‘Sāhaṃ ramāmi kīḷāmi, modāmi akutobhayā;
មុនិំ ការុណិកំ លោកេ, ភន្តេ វន្ទិតុមាគតា’’តិ។
Muniṃ kāruṇikaṃ loke, bhante vanditumāgatā’’ti.
សំសារមោចកបេតិវត្ថុ បឋមំ។
Saṃsāramocakapetivatthu paṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បេតវត្ថុ-អដ្ឋកថា • Petavatthu-aṭṭhakathā / ១. សំសារមោចកបេតិវត្ថុវណ្ណនា • 1. Saṃsāramocakapetivatthuvaṇṇanā
