| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៦៨) ៣. សព្ពមិទំ កម្មតោតិកថា
(168) 3. Sabbamidaṃ kammatotikathā
៧៨៣. សព្ពមិទំ កម្មតោតិ? អាមន្តា។ កម្មម្បិ កម្មតោតិ? ន ហេវំ វត្តព្ពេ…បេ.… សព្ពមិទំ កម្មតោតិ? អាមន្តា។ សព្ពមិទំ បុព្ពេកតហេតូតិ? ន ហេវំ វត្តព្ពេ…បេ.… សព្ពមិទំ កម្មតោតិ? អាមន្តា។ សព្ពមិទំ កម្មវិបាកតោតិ? ន ហេវំ វត្តព្ពេ…បេ.…។
783. Sabbamidaṃ kammatoti? Āmantā. Kammampi kammatoti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ pubbekatahetūti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ kammavipākatoti? Na hevaṃ vattabbe…pe….
៧៨៤. សព្ពមិទំ កម្មវិបាកតោតិ? អាមន្តា។ កម្មវិបាកេន បាណំ ហនេយ្យាតិ? អាមន្តា។ បាណាតិបាតោ សផលោតិ? អាមន្តា។ កម្មវិបាកោ សផលោតិ? ន ហេវំ វត្តព្ពេ…បេ.… កម្មវិបាកោ អផលោតិ? អាមន្តា។ បាណាតិបាតោ អផលោតិ? ន ហេវំ វត្តព្ពេ…បេ.…។
784. Sabbamidaṃ kammavipākatoti? Āmantā. Kammavipākena pāṇaṃ haneyyāti? Āmantā. Pāṇātipāto saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Pāṇātipāto aphaloti? Na hevaṃ vattabbe…pe….
កម្មវិបាកេន អទិន្នំ អាទិយេយ្យ…បេ.… មុសា ភណេយ្យ… បិសុណំ ភណេយ្យ… ផរុសំ ភណេយ្យ… សម្ផំ បលបេយ្យ… សន្ធិំ ឆិន្ទេយ្យ… និល្លោបំ ហរេយ្យ… ឯកាគារិកំ ករេយ្យ… បរិបន្ថេ តិដ្ឋេយ្យ… បរទារំ គច្ឆេយ្យ… គាមឃាតកំ ករេយ្យ… និគមឃាតកំ ករេយ្យ… កម្មវិបាកេន ទានំ ទទេយ្យ… ចីវរំ ទទេយ្យ … បិណ្ឌបាតំ ទទេយ្យ… សេនាសនំ ទទេយ្យ… គិលានបច្ចយភេសជ្ជបរិក្ខារំ ទទេយ្យាតិ? អាមន្តា។ គិលានបច្ចយភេសជ្ជបរិក្ខារោ សផលោតិ? អាមន្តា។ កម្មវិបាកោ សផលោតិ? ន ហេវំ វត្តព្ពេ…បេ.… កម្មវិបាកោ អផលោតិ? អាមន្តា។ គិលានបច្ចយភេសជ្ជបរិក្ខារោ អផលោតិ? ន ហេវំ វត្តព្ពេ…បេ.…។
Kammavipākena adinnaṃ ādiyeyya…pe… musā bhaṇeyya… pisuṇaṃ bhaṇeyya… pharusaṃ bhaṇeyya… samphaṃ palapeyya… sandhiṃ chindeyya… nillopaṃ hareyya… ekāgārikaṃ kareyya… paripanthe tiṭṭheyya… paradāraṃ gaccheyya… gāmaghātakaṃ kareyya… nigamaghātakaṃ kareyya… kammavipākena dānaṃ dadeyya… cīvaraṃ dadeyya … piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyyāti? Āmantā. Gilānapaccayabhesajjaparikkhāro saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Gilānapaccayabhesajjaparikkhāro aphaloti? Na hevaṃ vattabbe…pe….
៧៨៥. ន វត្តព្ពំ – ‘‘សព្ពមិទំ កម្មតោ’’តិ? អាមន្តា។ ននុ វុត្តំ ភគវតា –
785. Na vattabbaṃ – ‘‘sabbamidaṃ kammato’’ti? Āmantā. Nanu vuttaṃ bhagavatā –
‘‘កម្មេន កិត្តិំ លភតេ បសំសំ,
‘‘Kammena kittiṃ labhate pasaṃsaṃ,
កម្មេន ជានិញ្ច វធញ្ច ពន្ធំ;
Kammena jāniñca vadhañca bandhaṃ;
តំ កម្មំ នានាករណំ វិទិត្វា,
Taṃ kammaṃ nānākaraṇaṃ viditvā,
កស្មា វទេ នត្ថិ កម្មន្តិ លោកេ’’តិ។
Kasmā vade natthi kammanti loke’’ti.
អត្ថេវ សុត្តន្តោតិ? អាមន្តា។ តេន ហិ ‘‘សព្ពមិទំ កម្មតោ’’តិ។
Attheva suttantoti? Āmantā. Tena hi ‘‘sabbamidaṃ kammato’’ti.
សព្ពមិទំ កម្មតោតិកថា និដ្ឋិតា។
Sabbamidaṃ kammatotikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. សព្ពមិទំ កម្មតោតិកថាវណ្ណនា • 3. Sabbamidaṃ kammatotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. សព្ពមិទំកម្មតោតិកថាវណ្ណនា • 3. Sabbamidaṃkammatotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៣. សព្ពមិទំកម្មតោតិកថាវណ្ណនា • 3. Sabbamidaṃkammatotikathāvaṇṇanā
