| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
៤. បុរាណចីវរសិក្ខាបទវណ្ណនា
4. Purāṇacīvarasikkhāpadavaṇṇanā
៥០៣-៥. ចតុត្ថេ បាឡិយំ ភត្តវិស្សគ្គន្តិ ភត្តស្ស ឧទរេ វិស្សជ្ជនំ, បវេសនំ អជ្ឈោហរណំ ភត្តកិច្ចន្តិ អត្ថោ, ភោជនបរិយោសានេន ភត្តស្ស វិស្សជ្ជនន្តិបិ វទន្តិ។ តត្ថ នាម ត្វន្តិ សោ នាម ត្វំ, តាយ នាម ត្វន្តិ វា អត្ថោ។ បិតា ច មាតា ច បិតរោ, បិតូនំ បិតា ច មាតា ច បិតាមហា, តេ ឯវ យុគឡដ្ឋេន យុគោ, តស្មា យាវ សត្តមា បិតាមហយុគា បិតាមហាវដ្ដាតិ ឯវមេត្ថ អត្ថោ ទដ្ឋព្ពោ។ ឯវញ្ហិ បិតាមហគ្គហណេន មាតាមហោ ច បិតាមហី មាតាមហី ច គហិតាវ ហោន្តិ។ សត្តមយុគតោ បរំ ‘‘អញ្ញាតកា’’តិ វេទិតព្ពំ។ យាតិ ភិក្ខុនី។ បិតុ មាតា បិតាមហី, មាតុ បិតា មាតាមហោ។
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
បយោគេ បយោគេ ភិក្ខុស្ស ទុក្កដន្តិ ‘‘ធោវា’’តិ អាណាបនវាចាយ ឯកាយ ឯវ តទនុគុណស្ស សព្ពស្សាបិ បយោគស្ស អាណត្តត្តា វុត្តំ។
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
៥០៦. តទវិនាភាវតោ ធោវនស្ស ‘‘កាយវិការំ កត្វា’’តិ ច ‘‘អន្តោទ្វាទសហត្ថេ’’តិ ច វុត្តត្តា កាយេន ធោវាបេតុកាមតំ អប្បកាសេត្វា ទានខិបនបេសនាទិំ ករោន្តស្ស ច ទ្វាទសហត្ថំ ឧបចារំ មុញ្ចិត្វា ពហិ ឋត្វា កាយវាចាហិ អាណាបេត្វា ខិបនបេសនាទិំ ករោន្តស្ស ច អនាបត្តិ ឯវ។
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
ឯកេន វត្ថុនាតិ បឋមកតេន។ បញ្ចសតានិ បមាណំ ឯតាសន្តិ បញ្ចសតា។ ភិក្ខុភាវតោ បរិវត្តលិង្គាបិ ភិក្ខុនី ភិក្ខូនំ សន្តិកេ ឯកតោឧបសម្បន្នា ឯវ។
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
៥០៧. តាវកាលិកំ គហេត្វាតិ អត្តនា កតិបាហំ បារុបនាទិអត្ថាយ តាវកាលិកំ យាចិត្វា។ បុរាណចីវរតា, ឧបចារេ ឋត្វា អញ្ញាតិកាយ ភិក្ខុនិយា អាណាបនំ, តស្សា ធោវាបនាទីនិ ចាតិ ឥមានេត្ថ តីណិ អង្គានិ។
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
បុរាណចីវរសិក្ខាបទវណ្ណនា និដ្ឋិតា។
Purāṇacīvarasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៤. បុរាណចីវរសិក្ខាបទំ • 4. Purāṇacīvarasikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៤. បុរាណចីវរសិក្ខាបទវណ្ណនា • 4. Purāṇacīvarasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. បុរាណចីវរសិក្ខាបទវណ្ណនា • 4. Purāṇacīvarasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៤. បុរាណចីវរសិក្ខាបទវណ្ណនា • 4. Purāṇacīvarasikkhāpadavaṇṇanā
