| Library / Tipiṭaka / ติปิฎก • Tipiṭaka / ธมฺมปทปาฬิ • Dhammapadapāḷi |
๑๖. ปิยวโคฺค
16. Piyavaggo
๒๐๙.
209.
อโยเค ยุญฺชมตฺตานํ, โยคสฺมิญฺจ อโยชยํ;
Ayoge yuñjamattānaṃ, yogasmiñca ayojayaṃ;
อตฺถํ หิตฺวา ปิยคฺคาหี, ปิเหตตฺตานุโยคินํฯ
Atthaṃ hitvā piyaggāhī, pihetattānuyoginaṃ.
๒๑๐.
210.
มา ปิเยหิ สมาคญฺฉิ, อปฺปิเยหิ กุทาจนํ;
Mā piyehi samāgañchi, appiyehi kudācanaṃ;
ปิยานํ อทสฺสนํ ทุกฺขํ, อปฺปิยานญฺจ ทสฺสนํฯ
Piyānaṃ adassanaṃ dukkhaṃ, appiyānañca dassanaṃ.
๒๑๑.
211.
ตสฺมา ปิยํ น กยิราถ, ปิยาปาโย หิ ปาปโก;
Tasmā piyaṃ na kayirātha, piyāpāyo hi pāpako;
คนฺถา เตสํ น วิชฺชนฺติ, เยสํ นตฺถิ ปิยาปฺปิยํฯ
Ganthā tesaṃ na vijjanti, yesaṃ natthi piyāppiyaṃ.
๒๑๒.
212.
ปิยโต วิปฺปมุตฺตสฺส, นตฺถิ โสโก กุโต ภยํฯ
Piyato vippamuttassa, natthi soko kuto bhayaṃ.
๒๑๓.
213.
เปมโต ชายตี โสโก, เปมโต ชายตี ภยํ;
Pemato jāyatī soko, pemato jāyatī bhayaṃ;
เปมโต วิปฺปมุตฺตสฺส, นตฺถิ โสโก กุโต ภยํฯ
Pemato vippamuttassa, natthi soko kuto bhayaṃ.
๒๑๔.
214.
รติยา ชายตี โสโก, รติยา ชายตี ภยํ;
Ratiyā jāyatī soko, ratiyā jāyatī bhayaṃ;
รติยา วิปฺปมุตฺตสฺส, นตฺถิ โสโก กุโต ภยํฯ
Ratiyā vippamuttassa, natthi soko kuto bhayaṃ.
๒๑๕.
215.
กามโต ชายตี โสโก, กามโต ชายตี ภยํ;
Kāmato jāyatī soko, kāmato jāyatī bhayaṃ;
กามโต วิปฺปมุตฺตสฺส, นตฺถิ โสโก กุโต ภยํฯ
Kāmato vippamuttassa, natthi soko kuto bhayaṃ.
๒๑๖.
216.
ตณฺหาย วิปฺปมุตฺตสฺส, นตฺถิ โสโก กุโต ภยํฯ
Taṇhāya vippamuttassa, natthi soko kuto bhayaṃ.
๒๑๗.
217.
สีลทสฺสนสมฺปนฺนํ , ธมฺมฎฺฐํ สจฺจเวทินํ;
Sīladassanasampannaṃ , dhammaṭṭhaṃ saccavedinaṃ;
อตฺตโน กมฺม กุพฺพานํ, ตํ ชโน กุรุเต ปิยํฯ
Attano kamma kubbānaṃ, taṃ jano kurute piyaṃ.
๒๑๘.
218.
ฉนฺทชาโต อนกฺขาเต, มนสา จ ผุโฎ สิยา;
Chandajāto anakkhāte, manasā ca phuṭo siyā;
กาเมสุ จ อปฺปฎิพทฺธจิโตฺต 5, อุทฺธํโสโตติ วุจฺจติฯ
Kāmesu ca appaṭibaddhacitto 6, uddhaṃsototi vuccati.
๒๑๙.
219.
จิรปฺปวาสิํ ปุริสํ, ทูรโต โสตฺถิมาคตํ;
Cirappavāsiṃ purisaṃ, dūrato sotthimāgataṃ;
ญาติมิตฺตา สุหชฺชา จ, อภินนฺทนฺติ อาคตํฯ
Ñātimittā suhajjā ca, abhinandanti āgataṃ.
๒๒๐.
220.
ตเถว กตปุญฺญมฺปิ, อสฺมา โลกา ปรํ คตํ;
Tatheva katapuññampi, asmā lokā paraṃ gataṃ;
ปุญฺญานิ ปฎิคณฺหนฺติ, ปิยํ ญาตีว อาคตํฯ
Puññāni paṭigaṇhanti, piyaṃ ñātīva āgataṃ.
ปิยวโคฺค โสฬสโม นิฎฺฐิโตฯ
Piyavaggo soḷasamo niṭṭhito.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ธมฺมปท-อฎฺฐกถา • Dhammapada-aṭṭhakathā / ๑๖. ปิยวโคฺค • 16. Piyavaggo
