Only Dharma. Since 1992
Library / Tipiṭaka / ติปิฎก • Tipiṭaka / ธมฺมปทปาฬิ • Dhammapadapāḷi

๑๗. โกธวโคฺค

17. Kodhavaggo

๒๒๑.

221.

โกธํ ชเห วิปฺปชเหยฺย มานํ, สํโยชนํ สพฺพมติกฺกเมยฺย;

Kodhaṃ jahe vippajaheyya mānaṃ, saṃyojanaṃ sabbamatikkameyya;

ตํ นามรูปสฺมิมสชฺชมานํ, อกิญฺจนํ นานุปตนฺติ ทุกฺขาฯ

Taṃ nāmarūpasmimasajjamānaṃ, akiñcanaṃ nānupatanti dukkhā.

๒๒๒.

222.

โย เว อุปฺปติตํ โกธํ, รถํ ภนฺตํว วารเย 1;

Yo ve uppatitaṃ kodhaṃ, rathaṃ bhantaṃva vāraye 2;

ตมหํ สารถิํ พฺรูมิ, รสฺมิคฺคาโห อิตโร ชโนฯ

Tamahaṃ sārathiṃ brūmi, rasmiggāho itaro jano.

๒๒๓.

223.

อโกฺกเธน ชิเน โกธํ, อสาธุํ สาธุนา ชิเน;

Akkodhena jine kodhaṃ, asādhuṃ sādhunā jine;

ชิเน กทริยํ ทาเนน, สเจฺจนาลิกวาทินํฯ

Jine kadariyaṃ dānena, saccenālikavādinaṃ.

๒๒๔.

224.

สจฺจํ ภเณ น กุเชฺฌยฺย, ทชฺชา อปฺปมฺปิ 3 ยาจิโต;

Saccaṃ bhaṇe na kujjheyya, dajjā appampi 4 yācito;

เอเตหิ ตีหิ ฐาเนหิ, คเจฺฉ เทวาน สนฺติเกฯ

Etehi tīhi ṭhānehi, gacche devāna santike.

๒๒๕.

225.

อหิํสกา เย มุนโย 5, นิจฺจํ กาเยน สํวุตา;

Ahiṃsakā ye munayo 6, niccaṃ kāyena saṃvutā;

เต ยนฺติ อจฺจุตํ ฐานํ, ยตฺถ คนฺตฺวา น โสจเรฯ

Te yanti accutaṃ ṭhānaṃ, yattha gantvā na socare.

๒๒๖.

226.

สทา ชาครมานานํ, อโหรตฺตานุสิกฺขินํ;

Sadā jāgaramānānaṃ, ahorattānusikkhinaṃ;

นิพฺพานํ อธิมุตฺตานํ, อตฺถํ คจฺฉนฺติ อาสวาฯ

Nibbānaṃ adhimuttānaṃ, atthaṃ gacchanti āsavā.

๒๒๗.

227.

โปราณเมตํ อตุล, เนตํ อชฺชตนามิว;

Porāṇametaṃ atula, netaṃ ajjatanāmiva;

นินฺทนฺติ ตุณฺหิมาสีนํ, นินฺทนฺติ พหุภาณินํ;

Nindanti tuṇhimāsīnaṃ, nindanti bahubhāṇinaṃ;

มิตภาณิมฺปิ นินฺทนฺติ, นตฺถิ โลเก อนินฺทิโตฯ

Mitabhāṇimpi nindanti, natthi loke anindito.

๒๒๘.

228.

น จาหุ น จ ภวิสฺสติ, น เจตรหิ วิชฺชติ;

Na cāhu na ca bhavissati, na cetarahi vijjati;

เอกนฺตํ นินฺทิโต โปโส, เอกนฺตํ วา ปสํสิโตฯ

Ekantaṃ nindito poso, ekantaṃ vā pasaṃsito.

๒๒๙.

229.

ยํ เจ วิญฺญู ปสํสนฺติ, อนุวิจฺจ สุเว สุเว;

Yaṃ ce viññū pasaṃsanti, anuvicca suve suve;

อจฺฉิทฺทวุตฺติํ 7 เมธาวิํ, ปญฺญาสีลสมาหิตํฯ

Acchiddavuttiṃ 8 medhāviṃ, paññāsīlasamāhitaṃ.

๒๓๐.

230.

นิกฺขํ 9 ชโมฺพนทเสฺสว, โก ตํ นินฺทิตุมรหติ;

Nikkhaṃ 10 jambonadasseva, ko taṃ ninditumarahati;

เทวาปิ นํ ปสํสนฺติ, พฺรหฺมุนาปิ ปสํสิโตฯ

Devāpi naṃ pasaṃsanti, brahmunāpi pasaṃsito.

๒๓๑.

231.

กายปฺปโกปํ รเกฺขยฺย, กาเยน สํวุโต สิยา;

Kāyappakopaṃ rakkheyya, kāyena saṃvuto siyā;

กายทุจฺจริตํ หิตฺวา, กาเยน สุจริตํ จเรฯ

Kāyaduccaritaṃ hitvā, kāyena sucaritaṃ care.

๒๓๒.

232.

วจีปโกปํ รเกฺขยฺย, วาจาย สํวุโต สิยา;

Vacīpakopaṃ rakkheyya, vācāya saṃvuto siyā;

วจีทุจฺจริตํ หิตฺวา, วาจาย สุจริตํ จเรฯ

Vacīduccaritaṃ hitvā, vācāya sucaritaṃ care.

๒๓๓.

233.

มโนปโกปํ รเกฺขยฺย, มนสา สํวุโต สิยา;

Manopakopaṃ rakkheyya, manasā saṃvuto siyā;

มโนทุจฺจริตํ หิตฺวา, มนสา สุจริตํ จเรฯ

Manoduccaritaṃ hitvā, manasā sucaritaṃ care.

๒๓๔.

234.

กาเยน สํวุตา ธีรา, อโถ วาจาย สํวุตา;

Kāyena saṃvutā dhīrā, atho vācāya saṃvutā;

มนสา สํวุตา ธีรา, เต เว สุปริสํวุตาฯ

Manasā saṃvutā dhīrā, te ve suparisaṃvutā.

โกธวโคฺค สตฺตรสโม นิฎฺฐิโตฯ

Kodhavaggo sattarasamo niṭṭhito.




Next: ๑๘. มลวโคฺค • 18. Malavaggo




Footnotes:
1. ธารเย (สี. สฺยา. ปี.)
2. dhāraye (sī. syā. pī.)
3. ทชฺชา’ปฺปสฺมิมฺปิ (สี. ปี.), ทชฺชา อปฺปสฺมิ (สฺยา. ก.)
4. dajjā’ppasmimpi (sī. pī.), dajjā appasmi (syā. ka.)
5. อหิํสกายา มุนโย (ก.)
6. ahiṃsakāyā munayo (ka.)
7. อจฺฉินฺนวุตฺติํ (ก.)
8. acchinnavuttiṃ (ka.)
9. เนกฺขํ (สี. สฺยา. ปี.)
10. nekkhaṃ (sī. syā. pī.)



Related texts:



อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ธมฺมปท-อฎฺฐกถา • Dhammapada-aṭṭhakathā / ๑๗. โกธวโคฺค • 17. Kodhavaggo


© 1991-2026 Titi Tudorancea Yoga Bulletin | Titi Tudorancea® is a Registered Trademark | Terms of use and privacy policy
Contact