| Library / Tipiṭaka / តិបិដក • Tipiṭaka / ចូឡនិទ្ទេសបាឡិ • Cūḷaniddesapāḷi |
១៧. បារាយនត្ថុតិគាថា
17. Pārāyanatthutigāthā
ឥទមវោច ភគវា មគធេសុ វិហរន្តោ បាសាណកេ ចេតិយេ, បរិចារកសោឡសានំ 1 ព្រាហ្មណានំ អជ្ឈិដ្ឋោ បុដ្ឋោ បុដ្ឋោ បញ្ហំ 2 ព្យាកាសិ។ ឯកមេកស្ស ចេបិ បញ្ហស្ស អត្ថមញ្ញាយ ធម្មមញ្ញាយ ធម្មានុធម្មំ បដិបជ្ជេយ្យ, គច្ឆេយ្យេវ ជរាមរណស្ស បារំ។ ‘‘បារង្គមនីយា ឥមេ ធម្មា’’តិ – តស្មា ឥមស្ស ធម្មបរិយាយស្ស បារាយនន្តេវ 3 អធិវចនំ។
Idamavoca bhagavā magadhesu viharanto pāsāṇake cetiye, paricārakasoḷasānaṃ 4 brāhmaṇānaṃ ajjhiṭṭho puṭṭho puṭṭho pañhaṃ 5 byākāsi. Ekamekassa cepi pañhassa atthamaññāya dhammamaññāya dhammānudhammaṃ paṭipajjeyya, gaccheyyeva jarāmaraṇassa pāraṃ. ‘‘Pāraṅgamanīyā ime dhammā’’ti – tasmā imassa dhammapariyāyassa pārāyananteva 6 adhivacanaṃ.
១៤៩.
149.
អជិតោ តិស្សមេត្តេយ្យោ, បុណ្ណកោ អថ មេត្តគូ;
Ajito tissametteyyo, puṇṇako atha mettagū;
ធោតកោ ឧបសីវោ ច, នន្ទោ ច អថ ហេមកោ។
Dhotako upasīvo ca, nando ca atha hemako.
១៥០.
150.
តោទេយ្យកប្បា ទុភយោ, ជតុកណ្ណី ច បណ្ឌិតោ;
Todeyyakappā dubhayo, jatukaṇṇī ca paṇḍito;
ភទ្រាវុធោ ឧទយោ ច, បោសាលោ ចាបិ ព្រាហ្មណោ;
Bhadrāvudho udayo ca, posālo cāpi brāhmaṇo;
មោឃរាជា ច មេធាវី, បិង្គិយោ ច មហាឥសិ។
Mogharājā ca medhāvī, piṅgiyo ca mahāisi.
១៥១.
151.
ឯតេ ពុទ្ធំ ឧបាគច្ឆុំ, សម្បន្នចរណំ ឥសិំ;
Ete buddhaṃ upāgacchuṃ, sampannacaraṇaṃ isiṃ;
បុច្ឆន្តា និបុណេ បញ្ហេ, ពុទ្ធសេដ្ឋំ ឧបាគមុំ។
Pucchantā nipuṇe pañhe, buddhaseṭṭhaṃ upāgamuṃ.
១៥២.
152.
តេសំ ពុទ្ធោ បព្យាកាសិ, បញ្ហេ បុដ្ឋោ យថាតថំ;
Tesaṃ buddho pabyākāsi, pañhe puṭṭho yathātathaṃ;
បញ្ហានំ វេយ្យាករណេន, តោសេសិ ព្រាហ្មណេ មុនិ។
Pañhānaṃ veyyākaraṇena, tosesi brāhmaṇe muni.
១៥៣.
153.
តេ តោសិតា ចក្ខុមតា, ពុទ្ធេនាទិច្ចពន្ធុនា;
Te tositā cakkhumatā, buddhenādiccabandhunā;
ព្រហ្មចរិយមចរិំសុ, វរបញ្ញស្ស សន្តិកេ។
Brahmacariyamacariṃsu, varapaññassa santike.
១៥៤.
154.
ឯកមេកស្ស បញ្ហស្ស, យថា ពុទ្ធេន ទេសិតំ;
Ekamekassa pañhassa, yathā buddhena desitaṃ;
តថា យោ បដិបជ្ជេយ្យ, គច្ឆេ បារំ អបារតោ។
Tathā yo paṭipajjeyya, gacche pāraṃ apārato.
១៥៥.
155.
អបារា បារំ គច្ឆេយ្យ, ភាវេន្តោ មគ្គមុត្តមំ;
Apārā pāraṃ gaccheyya, bhāvento maggamuttamaṃ;
មគ្គោ សោ បារំ គមនាយ, តស្មា បារាយនំ ឥតិ។
Maggo so pāraṃ gamanāya, tasmā pārāyanaṃ iti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ចូឡនិទ្ទេស-អដ្ឋកថា • Cūḷaniddesa-aṭṭhakathā / ១៧. បារាយនត្ថុតិគាថានិទ្ទេសវណ្ណនា • 17. Pārāyanatthutigāthāniddesavaṇṇanā
