| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៣. មហាកប្បិនត្ថេរគាថា
3. Mahākappinattheragāthā
៥៤៧.
547.
‘‘អនាគតំ យោ បដិកច្ច 1 បស្សតិ, ហិតញ្ច អត្ថំ អហិតញ្ច តំ ទ្វយំ;
‘‘Anāgataṃ yo paṭikacca 2 passati, hitañca atthaṃ ahitañca taṃ dvayaṃ;
វិទ្ទេសិនោ តស្ស ហិតេសិនោ វា, រន្ធំ ន បស្សន្តិ សមេក្ខមានា។
Viddesino tassa hitesino vā, randhaṃ na passanti samekkhamānā.
៥៤៨.
548.
អនុបុព្ពំ បរិចិតា, យថា ពុទ្ធេន ទេសិតា;
Anupubbaṃ paricitā, yathā buddhena desitā;
សោមំ លោកំ បភាសេតិ, អព្ភា មុត្តោវ ចន្ទិមា។
Somaṃ lokaṃ pabhāseti, abbhā muttova candimā.
៥៤៩.
549.
‘‘ឱទាតំ វត មេ ចិត្តំ, អប្បមាណំ សុភាវិតំ;
‘‘Odātaṃ vata me cittaṃ, appamāṇaṃ subhāvitaṃ;
និព្ពិទ្ធំ បគ្គហីតញ្ច, សព្ពា ឱភាសតេ ទិសា។
Nibbiddhaṃ paggahītañca, sabbā obhāsate disā.
៥៥០.
550.
‘‘ជីវតេ វាបិ សប្បញ្ញោ, អបិ វិត្តបរិក្ខយោ;
‘‘Jīvate vāpi sappañño, api vittaparikkhayo;
បញ្ញាយ ច អលាភេន, វិត្តវាបិ ន ជីវតិ។
Paññāya ca alābhena, vittavāpi na jīvati.
៥៥១.
551.
‘‘បញ្ញា សុតវិនិច្ឆិនី, បញ្ញា កិត្តិសិលោកវទ្ធនី;
‘‘Paññā sutavinicchinī, paññā kittisilokavaddhanī;
បញ្ញាសហិតោ នរោ ឥធ, អបិ ទុក្ខេសុ សុខានិ វិន្ទតិ។
Paññāsahito naro idha, api dukkhesu sukhāni vindati.
៥៥២.
552.
‘‘នាយំ អជ្ជតនោ ធម្មោ, នច្ឆេរោ នបិ អព្ភុតោ;
‘‘Nāyaṃ ajjatano dhammo, nacchero napi abbhuto;
យត្ថ ជាយេថ មីយេថ, តត្ថ កិំ វិយ អព្ភុតំ។
Yattha jāyetha mīyetha, tattha kiṃ viya abbhutaṃ.
៥៥៣.
553.
‘‘អនន្តរំ ហិ ជាតស្ស, ជីវិតា មរណំ ធុវំ;
‘‘Anantaraṃ hi jātassa, jīvitā maraṇaṃ dhuvaṃ;
ជាតា ជាតា មរន្តីធ, ឯវំធម្មា ហិ បាណិនោ។
Jātā jātā marantīdha, evaṃdhammā hi pāṇino.
៥៥៤.
554.
‘‘ន ហេតទត្ថាយ មតស្ស ហោតិ, យំ ជីវិតត្ថំ បរបោរិសានំ;
‘‘Na hetadatthāya matassa hoti, yaṃ jīvitatthaṃ paraporisānaṃ;
មតម្ហិ រុណ្ណំ ន យសោ ន លោក្យំ, ន វណ្ណិតំ សមណព្រាហ្មណេហិ។
Matamhi ruṇṇaṃ na yaso na lokyaṃ, na vaṇṇitaṃ samaṇabrāhmaṇehi.
៥៥៥.
555.
‘‘ចក្ខុំ សរីរំ ឧបហន្តិ តេន 5, និហីយតិ វណ្ណពលំ មតី ច;
‘‘Cakkhuṃ sarīraṃ upahanti tena 6, nihīyati vaṇṇabalaṃ matī ca;
អានន្ទិនោ តស្ស ទិសា ភវន្តិ, ហិតេសិនោ នាស្ស សុខី ភវន្តិ។
Ānandino tassa disā bhavanti, hitesino nāssa sukhī bhavanti.
៥៥៦.
556.
‘‘តស្មា ហិ ឥច្ឆេយ្យ កុលេ វសន្តេ, មេធាវិនោ ចេវ ពហុស្សុតេ ច;
‘‘Tasmā hi iccheyya kule vasante, medhāvino ceva bahussute ca;
យេសំ ហិ បញ្ញាវិភវេន កិច្ចំ, តរន្តិ នាវាយ នទិំវ បុណ្ណ’’ន្តិ។
Yesaṃ hi paññāvibhavena kiccaṃ, taranti nāvāya nadiṃva puṇṇa’’nti.
… មហាកប្បិនោ ថេរោ…។
… Mahākappino thero….
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៣. មហាកប្បិនត្ថេរគាថាវណ្ណនា • 3. Mahākappinattheragāthāvaṇṇanā
