| Library / Tipiṭaka / តិបិដក • Tipiṭaka / ថេរីគាថាបាឡិ • Therīgāthāpāḷi |
១០. ឯកាទសនិបាតោ
10. Ekādasanipāto
១. កិសាគោតមីថេរីគាថា
1. Kisāgotamītherīgāthā
២១៣.
213.
‘‘កល្យាណមិត្តតា មុនិនា, លោកំ អាទិស្ស វណ្ណិតា;
‘‘Kalyāṇamittatā muninā, lokaṃ ādissa vaṇṇitā;
កល្យាណមិត្តេ ភជមានោ, អបិ ពាលោ បណ្ឌិតោ អស្ស។
Kalyāṇamitte bhajamāno, api bālo paṇḍito assa.
២១៤.
214.
‘‘ភជិតព្ពា សប្បុរិសា, បញ្ញា តថា វឌ្ឍតិ ភជន្តានំ;
‘‘Bhajitabbā sappurisā, paññā tathā vaḍḍhati bhajantānaṃ;
ភជមានោ សប្បុរិសេ, សព្ពេហិបិ ទុក្ខេហិ បមុច្ចេយ្យ។
Bhajamāno sappurise, sabbehipi dukkhehi pamucceyya.
២១៥.
215.
‘‘ទុក្ខញ្ច វិជានេយ្យ, ទុក្ខស្ស ច សមុទយំ និរោធំ;
‘‘Dukkhañca vijāneyya, dukkhassa ca samudayaṃ nirodhaṃ;
អដ្ឋង្គិកញ្ច មគ្គំ, ចត្តារិបិ អរិយសច្ចានិ។
Aṭṭhaṅgikañca maggaṃ, cattāripi ariyasaccāni.
២១៦.
216.
‘‘ទុក្ខោ ឥត្ថិភាវោ, អក្ខាតោ បុរិសទម្មសារថិនា;
‘‘Dukkho itthibhāvo, akkhāto purisadammasārathinā;
សបត្តិកម្បិ ហិ ទុក្ខំ, អប្បេកច្ចា សកិំ វិជាតាយោ។
Sapattikampi hi dukkhaṃ, appekaccā sakiṃ vijātāyo.
២១៧.
217.
‘‘គលកេ អបិ កន្តន្តិ, សុខុមាលិនិយោ វិសានិ ខាទន្តិ;
‘‘Galake api kantanti, sukhumāliniyo visāni khādanti;
ជនមារកមជ្ឈគតា, ឧភោបិ ព្យសនានិ អនុភោន្តិ។
Janamārakamajjhagatā, ubhopi byasanāni anubhonti.
២១៨.
218.
‘‘ឧបវិជញ្ញា គច្ឆន្តី, អទ្ទសាហំ បតិំ មតំ;
‘‘Upavijaññā gacchantī, addasāhaṃ patiṃ mataṃ;
បន្ថម្ហិ វិជាយិត្វាន, អប្បត្តាវ សកំ ឃរំ។
Panthamhi vijāyitvāna, appattāva sakaṃ gharaṃ.
២១៩.
219.
‘‘ទ្វេ បុត្តា កាលកតា, បតី ច បន្ថេ មតោ កបណិកាយ;
‘‘Dve puttā kālakatā, patī ca panthe mato kapaṇikāya;
មាតា បិតា ច ភាតា, ឌយ្ហន្តិ ច ឯកចិតកាយំ។
Mātā pitā ca bhātā, ḍayhanti ca ekacitakāyaṃ.
២២០.
220.
‘‘ខីណកុលីនេ កបណេ, អនុភូតំ តេ ទុខំ អបរិមាណំ;
‘‘Khīṇakulīne kapaṇe, anubhūtaṃ te dukhaṃ aparimāṇaṃ;
អស្សូ ច តេ បវត្តំ, ពហូនិ ច ជាតិសហស្សានិ។
Assū ca te pavattaṃ, bahūni ca jātisahassāni.
២២១.
221.
‘‘វសិតា សុសានមជ្ឈេ, អថោបិ ខាទិតានិ បុត្តមំសានិ;
‘‘Vasitā susānamajjhe, athopi khāditāni puttamaṃsāni;
ហតកុលិកា សព្ពគរហិតា, មតបតិកា អមតមធិគច្ឆិំ។
Hatakulikā sabbagarahitā, matapatikā amatamadhigacchiṃ.
២២២.
222.
‘‘ភាវិតោ មេ មគ្គោ, អរិយោ អដ្ឋង្គិកោ អមតគាមី;
‘‘Bhāvito me maggo, ariyo aṭṭhaṅgiko amatagāmī;
២២៣.
223.
‘‘អហមម្ហិ កន្តសល្លា, ឱហិតភារា កតញ្ហិ ករណីយំ;
‘‘Ahamamhi kantasallā, ohitabhārā katañhi karaṇīyaṃ;
កិសា គោតមី ថេរី, វិមុត្តចិត្តា ឥមំ ភណី’’តិ។
Kisā gotamī therī, vimuttacittā imaṃ bhaṇī’’ti.
… កិសា គោតមី ថេរី…។
… Kisā gotamī therī….
ឯកាទសនិបាតោ និដ្ឋិតោ។
Ekādasanipāto niṭṭhito.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរីគាថា-អដ្ឋកថា • Therīgāthā-aṭṭhakathā / ១. កិសាគោតមីថេរីគាថាវណ្ណនា • 1. Kisāgotamītherīgāthāvaṇṇanā
