| Library / Tipiṭaka / តិបិដក • Tipiṭaka / ចូឡនិទ្ទេស-អដ្ឋកថា • Cūḷaniddesa-aṭṭhakathā |
១០. កប្បមាណវសុត្តនិទ្ទេសវណ្ណនា
10. Kappamāṇavasuttaniddesavaṇṇanā
៦១. ទសមេ កប្បសុត្តនិទ្ទេសេ – មជ្ឈេ សរស្មិន្តិ បុរិមបច្ឆិមកោដិបញ្ញាណាភាវតោ មជ្ឈភូតេ សំសារេតិ វុត្តំ ហោតិ។ តិដ្ឋតន្តិ តិដ្ឋមានានំ។ យថាយិទំ នាបរំ សិយាតិ យថា ឥទំ ទុក្ខំ បុន ន ភវេយ្យ។
61. Dasame kappasuttaniddese – majjhe sarasminti purimapacchimakoṭipaññāṇābhāvato majjhabhūte saṃsāreti vuttaṃ hoti. Tiṭṭhatanti tiṭṭhamānānaṃ. Yathāyidaṃ nāparaṃ siyāti yathā idaṃ dukkhaṃ puna na bhaveyya.
អាគមនន្តិ បុព្ពន្តតោ ឥធាគមនំ។ គមនន្តិ ឥតោ បរលោកគមនំ។ គមនាគមនន្តិ តទុភយវសេន វុត្តំ។ កាលន្តិ មរណកាលំ។ គតីតិ និព្ពត្តិ។ ភវាភវោតិ ភវតោ ភវោ។ ចុតិ ចាតិ ភវតោ ចវនញ្ច។ ឧបបត្តិ ចាតិ ចុតស្ស ឧបបត្តិ ច។ និព្ពត្តិ ចាតិ បាតុភាវោ ច។ ភេទោ ចាតិ ខន្ធភេទោ ច។ ជាតិ ចាតិ ជននញ្ច។ ជរា ចាតិ ហានិ ច។ មរណញ្ចាតិ ជីវិតិន្ទ្រិយស្ស ចាគោ ច។ បុរិមាបិ កោដិ ន បញ្ញាយតីតិ បុព្ពាបិ កោដិ នត្ថិ ន សំវិជ្ជតិ។ តថា បច្ឆិមាបិ កោដិ។
Āgamananti pubbantato idhāgamanaṃ. Gamananti ito paralokagamanaṃ. Gamanāgamananti tadubhayavasena vuttaṃ. Kālanti maraṇakālaṃ. Gatīti nibbatti. Bhavābhavoti bhavato bhavo. Cuti cāti bhavato cavanañca. Upapatti cāti cutassa upapatti ca. Nibbatti cāti pātubhāvo ca. Bhedo cāti khandhabhedo ca. Jāti cāti jananañca. Jarā cāti hāni ca. Maraṇañcāti jīvitindriyassa cāgo ca. Purimāpi koṭi na paññāyatīti pubbāpi koṭi natthi na saṃvijjati. Tathā pacchimāpi koṭi.
ឯត្តកា ជាតិយោតិ ឯតបរមា ជាតិយោ។ វដ្ដំ វត្តីតិ សំសារបវត្តិ។ តតោ បរំ ន វត្តតីតិ តតោ ឧទ្ធំ នប្បវត្តតិ។ ហេវំ នត្ថីតិ ឯវំ នត្ថិ ន សំវិជ្ជតិ។ ហិ-ឥតិ និបាតោ។ អនមតគ្គោយន្តិ អយំ សំសារោ អវិទិតគ្គោ។
Ettakā jātiyoti etaparamā jātiyo. Vaṭṭaṃ vattīti saṃsārapavatti. Tato paraṃ na vattatīti tato uddhaṃ nappavattati. Hevaṃ natthīti evaṃ natthi na saṃvijjati. Hi-iti nipāto. Anamataggoyanti ayaṃ saṃsāro aviditaggo.
អវិជ្ជានីវរណានន្តិ អវិជ្ជាយ អាវរិតានំ។ តណ្ហាសំយោជនានន្តិ កាមរាគសង្ខាតតណ្ហាពន្ធនពទ្ធានំ។ សន្ធាវតន្តិ កាមធាតុយា បុនប្បុនំ ធាវន្តានំ។ សំសរតន្តិ រូបារូបធាតុយា សំសរន្តានំ។ ទុក្ខំ បច្ចនុភូតន្តិ កាយិកចេតសិកទុក្ខំ អនុភូតំ វិន្ទិតំ។ តិព្ពន្តិ ពហលំ។ ព្យសនន្តិ អវឌ្ឍិ វិនាសោ។ កដសី វឌ្ឍិតាតិ សុសានវឌ្ឍិតំ។ អលមេវាតិ យុត្តមេវ ។ សព្ពសង្ខារេសូតិ តេភូមកសង្ខារេសុ។ និព្ពិន្ទិតុន្តិ ឧក្កណ្ឋិតុំ។ វិរជ្ជិតុន្តិ វិរាគំ ឧប្បាទេតុំ។ វិមុច្ចិតុន្តិ មោចេតុំ។ វដ្ដំ វត្តិស្សតីតិ សំសារបវត្តំ តេភូមកវដ្ដំ អនាគតេ បវត្តិស្សតិ។ តតោ បរំ ន វត្តិស្សតីតិ តតោ ឧទ្ធំ អនាគតេ សំសារបវត្តំ នប្បវត្តិស្សតិ។ ជាតិភយេតិ ជាតិំ បដិច្ច ឧប្បជ្ជនកភយេ។ ជរាភយាទីសុបិ ឯសេវ នយោ។
Avijjānīvaraṇānanti avijjāya āvaritānaṃ. Taṇhāsaṃyojanānanti kāmarāgasaṅkhātataṇhābandhanabaddhānaṃ. Sandhāvatanti kāmadhātuyā punappunaṃ dhāvantānaṃ. Saṃsaratanti rūpārūpadhātuyā saṃsarantānaṃ. Dukkhaṃ paccanubhūtanti kāyikacetasikadukkhaṃ anubhūtaṃ vinditaṃ. Tibbanti bahalaṃ. Byasananti avaḍḍhi vināso. Kaṭasī vaḍḍhitāti susānavaḍḍhitaṃ. Alamevāti yuttameva . Sabbasaṅkhāresūti tebhūmakasaṅkhāresu. Nibbinditunti ukkaṇṭhituṃ. Virajjitunti virāgaṃ uppādetuṃ. Vimuccitunti mocetuṃ. Vaṭṭaṃ vattissatīti saṃsārapavattaṃ tebhūmakavaṭṭaṃ anāgate pavattissati. Tato paraṃ na vattissatīti tato uddhaṃ anāgate saṃsārapavattaṃ nappavattissati. Jātibhayeti jātiṃ paṭicca uppajjanakabhaye. Jarābhayādīsupi eseva nayo.
៦២-៣. អថស្ស ភគវា តមត្ថំ ព្យាករោន្តោ ឧបរូបរិគាថាយោ អភាសិ។ ទុតិយគាថា វុត្តត្ថាយេវ។ តតិយគាថាយ អកិញ្ចនន្តិ កិញ្ចនបដិបក្ខំ។ អនាទានន្តិ អាទានបដិបក្ខំ, កិញ្ចនាទានវូបសមន្តិ វុត្តំ ហោតិ។ អនាបរន្តិ អបរបដិភាគទីបវិរហិតំ, សេដ្ឋន្តិ វុត្តំ ហោតិ។
62-3. Athassa bhagavā tamatthaṃ byākaronto uparūparigāthāyo abhāsi. Dutiyagāthā vuttatthāyeva. Tatiyagāthāya akiñcananti kiñcanapaṭipakkhaṃ. Anādānanti ādānapaṭipakkhaṃ, kiñcanādānavūpasamanti vuttaṃ hoti. Anāparanti aparapaṭibhāgadīpavirahitaṃ, seṭṭhanti vuttaṃ hoti.
៦៤. ចតុត្ថគាថាយ ន តេ មារស្ស បទ្ធគូតិ តេ មារស្ស បទ្ធចរា បរិចារិកា សិស្សា ន ហោន្តិ។
64. Catutthagāthāya na te mārassa paddhagūti te mārassa paddhacarā paricārikā sissā na honti.
មហាជនំ បាសេ និយោជេត្វា មារេតីតិ មារោ។ អកុសលកម្មេ និយុត្តត្តា កណ្ហោ។ ឆសុ ទេវលោកេសុ អធិបតិត្តា អធិបតិ។ អកុសលានំ ធម្មានំ អន្តំ គតត្តា អន្តគូ។ បាបជនំ ន មុញ្ចតីតិ នមុចិ។ សតិវិប្បវាសប្បមត្តបុគ្គលានំ ញាតកោតិ បមត្តពន្ធុ។ សេសំ សព្ពត្ថ បាកដមេវ។
Mahājanaṃ pāse niyojetvā māretīti māro. Akusalakamme niyuttattā kaṇho. Chasu devalokesu adhipatittā adhipati. Akusalānaṃ dhammānaṃ antaṃ gatattā antagū. Pāpajanaṃ na muñcatīti namuci. Sativippavāsappamattapuggalānaṃ ñātakoti pamattabandhu. Sesaṃ sabbattha pākaṭameva.
ឯវំ ភគវា ឥទម្បិ សុត្តំ អរហត្តនិកូដេនេវ ទេសេសិ, ទេសនាបរិយោសានេ ច បុព្ពសទិសោវ ធម្មាភិសមយោ អហោសីតិ។
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadisova dhammābhisamayo ahosīti.
សទ្ធម្មប្បជ្ជោតិកាយ ចូឡនិទ្ទេស-អដ្ឋកថាយ
Saddhammappajjotikāya cūḷaniddesa-aṭṭhakathāya
កប្បមាណវសុត្តនិទ្ទេសវណ្ណនា និដ្ឋិតា។
Kappamāṇavasuttaniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ចូឡនិទ្ទេសបាឡិ • Cūḷaniddesapāḷi
១០. កប្បមាណវបុច្ឆា • 10. Kappamāṇavapucchā
១០. កប្បមាណវបុច្ឆានិទ្ទេសោ • 10. Kappamāṇavapucchāniddeso
