| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៦. ជោតិសិក្ខាបទវណ្ណនា
6. Jotisikkhāpadavaṇṇanā
៣៥០. ឆដ្ឋេ – ភគ្គាតិ ជនបទស្ស នាមំ។ សំសុមារគិរន្តិ នគរស្ស។ ភេសកឡាវនន្តិ តន្និស្សិតវនស្ស។ តំ បន មិគានំ ផាសុវិហារត្ថាយ ទិន្នត្តា មិគទាយោតិ វុច្ចតិ។ សមាទហិត្វាតិ ជាលេត្វា។ បរិបាតេសីតិ អនុពន្ធិ។
350. Chaṭṭhe – bhaggāti janapadassa nāmaṃ. Saṃsumāragiranti nagarassa. Bhesakaḷāvananti tannissitavanassa. Taṃ pana migānaṃ phāsuvihāratthāya dinnattā migadāyoti vuccati. Samādahitvāti jāletvā. Paripātesīti anubandhi.
៣៥២. បទីបេបីតិ បទីបុជ្ជលនេបិ។ ជោតិកេបីតិ បត្តបចនសេទកម្មាទីសុ ជោតិករណេ។ តថារូបបច្ចយាតិ បទីបាទិបច្ចយា។
352.Padīpepīti padīpujjalanepi. Jotikepīti pattapacanasedakammādīsu jotikaraṇe. Tathārūpapaccayāti padīpādipaccayā.
៣៥៤-៥. សយំ សមាទហតីតិ ឯត្ថ ជោតិំ សមាទហិតុកាមតាយ អរណិសណ្ឋបនតោ បដ្ឋាយ យាវ ជាលា ន ឧដ្ឋហតិ, តាវ សព្ពបយោគេសុ ទុក្កដំ។ បដិលាតំ ឧក្ខិបតីតិ ទយ្ហមានំ អលាតំ បតិតំ ឧក្ខិបតិ, បុន យថាឋានេ ឋបេតីតិ អត្ថោ។ ឯវំ អវិជ្ឈាតំ ឧក្ខិបិត្វា បក្ខិបន្តស្សេវ ទុក្កដំ, វិជ្ឈាតំ បុន ជាលាបេន្តស្ស បាចិត្តិយមេវ។
354-5.Sayaṃ samādahatīti ettha jotiṃ samādahitukāmatāya araṇisaṇṭhapanato paṭṭhāya yāva jālā na uṭṭhahati, tāva sabbapayogesu dukkaṭaṃ. Paṭilātaṃ ukkhipatīti dayhamānaṃ alātaṃ patitaṃ ukkhipati, puna yathāṭhāne ṭhapetīti attho. Evaṃ avijjhātaṃ ukkhipitvā pakkhipantasseva dukkaṭaṃ, vijjhātaṃ puna jālāpentassa pācittiyameva.
៣៥៦. តថារូបបច្ចយាតិ ឋបេត្វា បទីបាទីនិ អញ្ញេនបិ តថារូបេន បច្ចយេន សមាទហន្តស្ស អនាបត្តិ។ អាបទាសូតិ ទុដ្ឋវាឡមិគអមនុស្សេហិ ឧបទ្ទវោ ហោតិ, តត្ថ សមាទហន្តស្សាបិ អនាបត្តិ។ សេសំ ឧត្តានមេវាតិ។ ឆសមុដ្ឋានំ – កិរិយំ, នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ។
356.Tathārūpapaccayāti ṭhapetvā padīpādīni aññenapi tathārūpena paccayena samādahantassa anāpatti. Āpadāsūti duṭṭhavāḷamigaamanussehi upaddavo hoti, tattha samādahantassāpi anāpatti. Sesaṃ uttānamevāti. Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ជោតិសិក្ខាបទំ ឆដ្ឋំ។
Jotisikkhāpadaṃ chaṭṭhaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុរាបានវគ្គោ • 6. Surāpānavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៦. ជោតិសិក្ខាបទំ • 6. Jotisikkhāpadaṃ
