| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៦. ជោតិសិក្ខាបទំ
6. Jotisikkhāpadaṃ
៣៥០. ឆដ្ឋេ ជនបទស្ស នាមត្តា ពហុវចនវសេន ‘‘ភគ្គេសូ’’តិ បាឡិយំ វុត្តំ។ សុសុមារសណ្ឋានោ បព្ពតសង្ខាតោ គិរិ ឯត្ថាតិ សុសុមារគិរិ, ឯតស្ស វា មាបិតកាលេ សុសុមារោ គិរតិ សទ្ទំ និគ្គិរតិ ឯត្ថាតិ សុសុមារគិរីតិ អត្ថមនបេក្ខិត្វា វុត្តំ ‘‘នគរស្ស នាម’’ន្តិ។ តំ បនាតិ វនំ បន។ ‘‘មិគាន’’ន្តិអាទិនា មិគានំ អភយោ ទីយតិ ឯត្ថាតិ មិគទាយោតិ អត្ថំ ទស្សេតិ។
350. Chaṭṭhe janapadassa nāmattā bahuvacanavasena ‘‘bhaggesū’’ti pāḷiyaṃ vuttaṃ. Susumārasaṇṭhāno pabbatasaṅkhāto giri etthāti susumāragiri, etassa vā māpitakāle susumāro girati saddaṃ niggirati etthāti susumāragirīti atthamanapekkhitvā vuttaṃ ‘‘nagarassa nāma’’nti. Taṃ panāti vanaṃ pana. ‘‘Migāna’’ntiādinā migānaṃ abhayo dīyati etthāti migadāyoti atthaṃ dasseti.
៣៥២. ‘‘ជោតិកេ’’តិបទស្ស ជោតិស្ស អគ្គិស្ស ករណំ ជោតិកន្តិ ទស្សេតុំ វុត្តំ ‘‘ជោតិករណេ’’តិ។
352. ‘‘Jotike’’tipadassa jotissa aggissa karaṇaṃ jotikanti dassetuṃ vuttaṃ ‘‘jotikaraṇe’’ti.
៣៥៤. ‘‘សមាទហិតុកាមតាយា’’តិបទំ ‘‘អរណិសណ្ឋាបនតោ’’តិបទេ ហេតុ។ ជាលាតិ សិខា។ សា ហិ ជលតិ ទិព្ពតីតិ ជាលាតិ វុច្ចតិ។
354. ‘‘Samādahitukāmatāyā’’tipadaṃ ‘‘araṇisaṇṭhāpanato’’tipade hetu. Jālāti sikhā. Sā hi jalati dibbatīti jālāti vuccati.
បតិលាតំ ឧក្ខិបតីតិ ឯត្ថ ‘‘បតិតាលាត’’ន្តិ វត្តព្ពេ តការលោបំ កត្វា សន្ធិវសេន បតិលាតន្តិ វុត្តន្តិ អាហ ‘‘អលាតំ បតិតំ ឧក្ខិបតី’’តិ។ អលាតន្តិ ឧម្មុក្កំ។ តញ្ហិ អាទិត្តំ ហុត្វា អតិឧណ្ហត្តា ន លាតព្ពំ ន គណ្ហិតព្ពន្តិ អលាតន្តិ វុច្ចតិ។ អវិជ្ឈាតន្តិ ឈាយនតោ ឌយ្ហនតោ អវិគតំ អលាតន្តិ សម្ពន្ធោ។ ឈាយនំ ឌយ្ហនំ ឈាតំ, វិគតំ ឈាតំ ឥមស្សាលាតស្សាតិ វិជ្ឈាតំ។
Patilātaṃ ukkhipatīti ettha ‘‘patitālāta’’nti vattabbe takāralopaṃ katvā sandhivasena patilātanti vuttanti āha ‘‘alātaṃ patitaṃ ukkhipatī’’ti. Alātanti ummukkaṃ. Tañhi ādittaṃ hutvā atiuṇhattā na lātabbaṃ na gaṇhitabbanti alātanti vuccati. Avijjhātanti jhāyanato ḍayhanato avigataṃ alātanti sambandho. Jhāyanaṃ ḍayhanaṃ jhātaṃ, vigataṃ jhātaṃ imassālātassāti vijjhātaṃ.
៣៥៦. បទីបាទីនីតិ បទីបជោតិកាទីនិ។ តត្ថាតិ តាសុ ទុដ្ឋវាឡមិគអមនុស្សសង្ខាតាសុ អាបទាសុ និមិត្តភូតាសុ។ និមិត្តត្ថេ ចេតំ ភុម្មវចនន្តិ។ ឆដ្ឋំ។
356.Padīpādīnīti padīpajotikādīni. Tatthāti tāsu duṭṭhavāḷamigaamanussasaṅkhātāsu āpadāsu nimittabhūtāsu. Nimittatthe cetaṃ bhummavacananti. Chaṭṭhaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុរាបានវគ្គោ • 6. Surāpānavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. ជោតិសិក្ខាបទវណ្ណនា • 6. Jotisikkhāpadavaṇṇanā
