| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៨. ធជទាយកត្ថេរអបទានវណ្ណនា
8. Dhajadāyakattheraapadānavaṇṇanā
បទុមុត្តរពុទ្ធស្សាតិអាទិកំ អាយស្មតោ ធជទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ ឯកស្មិំ កុលគេហេ និព្ពត្តោ វុទ្ធិមន្វាយ សត្ថរិ បសីទិត្វា សុន្ទរេហិ អនេកេហិ វត្ថេហិ ធជំ ការាបេត្វា ធជបូជំ អកាសិ។ សោ តេន បុញ្ញកម្មេន ឧប្បន្នុប្បន្នភវេ ឧច្ចកុលេ និព្ពត្តោ បូជនិយោ អហោសិ។ អបរភាគេ ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិមន្វាយ បុត្តទារេហិ វឌ្ឍិត្វា មហាភោគោ យសវា សទ្ធាជាតោ សត្ថរិ បសន្នោ ឃរាវាសំ បហាយ បព្ពជិត្វា នចិរស្សេវ អរហា អហោសិ។
Padumuttarabuddhassātiādikaṃ āyasmato dhajadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto vuddhimanvāya satthari pasīditvā sundarehi anekehi vatthehi dhajaṃ kārāpetvā dhajapūjaṃ akāsi. So tena puññakammena uppannuppannabhave uccakule nibbatto pūjaniyo ahosi. Aparabhāge imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā mahābhogo yasavā saddhājāto satthari pasanno gharāvāsaṃ pahāya pabbajitvā nacirasseva arahā ahosi.
៥៧. សោ បត្តអរហត្តផលោ បុព្ពកម្មំ សរិត្វា សោមនស្សជាតោ អត្តនោ បុព្ពចរិតាបទានំ បកាសេន្តោ បទុមុត្តរពុទ្ធស្សាតិអាទិមាហ។ តស្សត្ថោ បុព្ពេ វុត្តោយេវ។ ហដ្ឋោ ហដ្ឋេន ចិត្តេនាតិ សោមនស្សសហគតចិត្តយុត្តត្តា ហដ្ឋោ បរិបុណ្ណរូបកាយោ សទ្ធាសម្បយុត្តចិត្តតាយ ហដ្ឋេន ចិត្តេន សន្តុដ្ឋេន ចិត្តេនាតិ អត្ថោ។ ធជមារោបយិំ អហន្តិ ធុនាតិ កម្បតិ ចលតីតិ ធជំ, តំ ធជំ អារោបយិំ វេឡគ្គេ លគ្គេត្វា បូជេសិន្តិ អត្ថោ។
57. So pattaarahattaphalo pubbakammaṃ saritvā somanassajāto attano pubbacaritāpadānaṃ pakāsento padumuttarabuddhassātiādimāha. Tassattho pubbe vuttoyeva. Haṭṭho haṭṭhena cittenāti somanassasahagatacittayuttattā haṭṭho paripuṇṇarūpakāyo saddhāsampayuttacittatāya haṭṭhena cittena santuṭṭhena cittenāti attho. Dhajamāropayiṃ ahanti dhunāti kampati calatīti dhajaṃ, taṃ dhajaṃ āropayiṃ veḷagge laggetvā pūjesinti attho.
៥៨-៩. បតិតបត្តានិ គណ្ហិត្វាតិ បតិតានិ ពោធិបត្តានិ គហេត្វា អហំ ពហិ ឆឌ្ឌេសិន្តិ អត្ថោ។ អន្តោសុទ្ធំ ពហិសុទ្ធន្តិ អន្តោ ចិត្តសន្តាននាមកាយតោ ច ពហិ ចក្ខុសោតាទិរូបកាយតោ ច សុទ្ធិំ អធិ វិសេសេន មុត្តំ កិលេសតោ វិមុត្តំ អនាសវំ សម្ពុទ្ធំ វិយ សម្មុខា ឧត្តមំ ពោធិំ អវន្ទិំ បណាមមកាសិន្តិ អត្ថោ។ សេសំ សព្ពត្ថ ឧត្តានត្ថមេវាតិ។
58-9.Patitapattāni gaṇhitvāti patitāni bodhipattāni gahetvā ahaṃ bahi chaḍḍesinti attho. Antosuddhaṃ bahisuddhanti anto cittasantānanāmakāyato ca bahi cakkhusotādirūpakāyato ca suddhiṃ adhi visesena muttaṃ kilesato vimuttaṃ anāsavaṃ sambuddhaṃ viya sammukhā uttamaṃ bodhiṃ avandiṃ paṇāmamakāsinti attho. Sesaṃ sabbattha uttānatthamevāti.
ធជទាយកត្ថេរអបទានវណ្ណនា សមត្តា។
Dhajadāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៨. ធជទាយកត្ថេរអបទានំ • 8. Dhajadāyakattheraapadānaṃ
