| Library / Tipiṭaka / តិបិដក • Tipiṭaka / ភិក្ខុនីវិភង្គ-អដ្ឋកថា • Bhikkhunīvibhaṅga-aṭṭhakathā |
១០. ទសមសង្ឃាទិសេសសិក្ខាបទវណ្ណនា
10. Dasamasaṅghādisesasikkhāpadavaṇṇanā
៧២៧. ទសមេ – ឯវាចារាតិ ឯវំអាចារា។ យាទិសោ តុម្ហាកំ អាចារោ, តាទិសា អាចារាតិ អត្ថោ។ ឯស នយោ សព្ពត្ថ។ ឧញ្ញាយាតិ អវញ្ញាយ នីចំ កត្វា ជាននាយ។ បរិភវេនាតិ កិំ ឥមា ករិស្សន្តីតិ ឯវំ បរិភវិត្វា ជាននេន។ អក្ខន្តិយាតិ អសហនតាយ; កោធេនាតិ អត្ថោ។ វេភស្សិយាតិ ពលវភស្សភាវេន; អត្តនោ ពលប្បកាសនេន សមុត្រាសនេនាតិ អត្ថោ។ ទុព្ពល្យាតិ តុម្ហាកំ ទុព្ពលភាវេន។ សព្ពត្ថ ឧញ្ញាយ ច បរិភវេន ចាតិ ឯវំ សមុច្ចយត្ថោ ទដ្ឋព្ពោ។ វិវិច្ចថាតិ វិនា ហោថ។ សេសំ ឧត្តានមេវ សទ្ធិំ សមុដ្ឋានាទីហីតិ។
727. Dasame – evācārāti evaṃācārā. Yādiso tumhākaṃ ācāro, tādisā ācārāti attho. Esa nayo sabbattha. Uññāyāti avaññāya nīcaṃ katvā jānanāya. Paribhavenāti kiṃ imā karissantīti evaṃ paribhavitvā jānanena. Akkhantiyāti asahanatāya; kodhenāti attho. Vebhassiyāti balavabhassabhāvena; attano balappakāsanena samutrāsanenāti attho. Dubbalyāti tumhākaṃ dubbalabhāvena. Sabbattha uññāya ca paribhavena cāti evaṃ samuccayattho daṭṭhabbo. Viviccathāti vinā hotha. Sesaṃ uttānameva saddhiṃ samuṭṭhānādīhīti.
ទសមសិក្ខាបទំ។
Dasamasikkhāpadaṃ.
ឧទ្ទិដ្ឋា ខោ អយ្យាយោ សត្តរស សង្ឃាទិសេសាតិ ឯត្ថ ឆន្នំ បឋមាបត្តិកានំ អនន្តរា សញ្ចរិត្តំ, ទ្វេ ទុដ្ឋទោសាតិ ឥមានិ តីណិ សិក្ខាបទានិ មហាវិភង្គតោ បក្ខិបិត្វា នវ បឋមាបត្តិកា, ចតុន្នំ យាវតតិយកានំ អនន្តរា មហាវិភង្គតោបិ ចត្តារោ យាវតតិយកេ បក្ខិបិត្វា អដ្ឋ យាវតតិយកា វេទិតព្ពា។ ឯវំ សព្ពេបិ បាតិមោក្ខុទ្ទេសមគ្គេន ឧទ្ទិដ្ឋា ខោ អយ្យាយោ សត្តរស សង្ឃាទិសេសា ធម្មាតិ ឯវមេត្ថ អត្ថោ ទដ្ឋព្ពោ។ សេសំ ឧត្តានមេវ អញ្ញត្រ បក្ខមានត្តា។ តំ បន ខន្ធកេ វិត្ថារេន វណ្ណយិស្សាមាតិ។
Uddiṭṭhā kho ayyāyo sattarasa saṅghādisesāti ettha channaṃ paṭhamāpattikānaṃ anantarā sañcarittaṃ, dve duṭṭhadosāti imāni tīṇi sikkhāpadāni mahāvibhaṅgato pakkhipitvā nava paṭhamāpattikā, catunnaṃ yāvatatiyakānaṃ anantarā mahāvibhaṅgatopi cattāro yāvatatiyake pakkhipitvā aṭṭha yāvatatiyakā veditabbā. Evaṃ sabbepi pātimokkhuddesamaggena uddiṭṭhā kho ayyāyo sattarasa saṅghādisesā dhammāti evamettha attho daṭṭhabbo. Sesaṃ uttānameva aññatra pakkhamānattā. Taṃ pana khandhake vitthārena vaṇṇayissāmāti.
សមន្តបាសាទិកាយ វិនយសំវណ្ណនាយ ភិក្ខុនីវិភង្គេ
Samantapāsādikāya vinayasaṃvaṇṇanāya bhikkhunīvibhaṅge
សត្តរសកវណ្ណនា និដ្ឋិតា។
Sattarasakavaṇṇanā niṭṭhitā.
សង្ឃាទិសេសកណ្ឌំ និដ្ឋិតំ។
Saṅghādisesakaṇḍaṃ niṭṭhitaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ភិក្ខុនីវិភង្គ • Bhikkhunīvibhaṅga / ១០. ទសមសង្ឃាទិសេសសិក្ខាបទំ • 10. Dasamasaṅghādisesasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៩. នវមសង្ឃាទិសេសសិក្ខាបទវណ្ណនា • 9. Navamasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៦. ឆដ្ឋសង្ឃាទិសេសសិក្ខាបទវណ្ណនា • 6. Chaṭṭhasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១០. ទសមសង្ឃាទិសេសសិក្ខាបទំ • 10. Dasamasaṅghādisesasikkhāpadaṃ
