| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៥. ឧបាលិវគ្គោ
5. Upālivaggo
១. ភាគិនេយ្យុបាលិត្ថេរអបទានំ
1. Bhāgineyyupālittheraapadānaṃ
១.
1.
វិវេកមនុយុត្តោ សោ, គច្ឆតេ បដិសល្លិតុំ។
Vivekamanuyutto so, gacchate paṭisallituṃ.
២.
2.
‘‘អជិនេន និវត្ថោហំ, តិទណ្ឌបរិធារកោ;
‘‘Ajinena nivatthohaṃ, tidaṇḍaparidhārako;
ភិក្ខុសង្ឃបរិព្យូឡ្ហំ, អទ្ទសំ លោកនាយកំ។
Bhikkhusaṅghaparibyūḷhaṃ, addasaṃ lokanāyakaṃ.
៣.
3.
‘‘ឯកំសំ អជិនំ កត្វា, សិរេ កត្វាន អញ្ជលិំ;
‘‘Ekaṃsaṃ ajinaṃ katvā, sire katvāna añjaliṃ;
សម្ពុទ្ធំ អភិវាទេត្វា, សន្ថវិំ លោកនាយកំ។
Sambuddhaṃ abhivādetvā, santhaviṃ lokanāyakaṃ.
៤.
4.
‘‘យថាណ្ឌជា ច សំសេទា, ឱបបាតី ជលាពុជា;
‘‘Yathāṇḍajā ca saṃsedā, opapātī jalābujā;
កាកាទិបក្ខិនោ សព្ពេ, អន្តលិក្ខចរា សទា។
Kākādipakkhino sabbe, antalikkhacarā sadā.
៥.
5.
‘‘យេ កេចិ បាណភូតត្ថិ, សញ្ញិនោ វា អសញ្ញិនោ;
‘‘Ye keci pāṇabhūtatthi, saññino vā asaññino;
សព្ពេ តេ តវ ញាណម្ហិ, អន្តោ ហោន្តិ សមោគធា។
Sabbe te tava ñāṇamhi, anto honti samogadhā.
៦.
6.
‘‘គន្ធា ច បព្ពតេយ្យា យេ, ហិមវន្តនគុត្តមេ;
‘‘Gandhā ca pabbateyyā ye, himavantanaguttame;
សព្ពេ តេ តវ សីលម្ហិ, កលាយបិ ន យុជ្ជរេ។
Sabbe te tava sīlamhi, kalāyapi na yujjare.
៧.
7.
‘‘មោហន្ធការបក្ខន្ទោ, អយំ លោកោ សទេវកោ;
‘‘Mohandhakārapakkhando, ayaṃ loko sadevako;
តវ ញាណម្ហិ ជោតន្តេ, អន្ធការា វិធំសិតា។
Tava ñāṇamhi jotante, andhakārā vidhaṃsitā.
៨.
8.
‘‘យថា អត្ថង្គតេ សូរិយេ, ហោន្តិ សត្តា តមោគតា;
‘‘Yathā atthaṅgate sūriye, honti sattā tamogatā;
ឯវំ ពុទ្ធេ អនុប្បន្នេ, ហោតិ លោកោ តមោគតោ។
Evaṃ buddhe anuppanne, hoti loko tamogato.
៩.
9.
‘‘យថោទយន្តោ អាទិច្ចោ, វិនោទេតិ តមំ សទា;
‘‘Yathodayanto ādicco, vinodeti tamaṃ sadā;
តថេវ ត្វំ ពុទ្ធសេដ្ឋ, វិទ្ធំសេសិ តមំ សទា។
Tatheva tvaṃ buddhaseṭṭha, viddhaṃsesi tamaṃ sadā.
១០.
10.
‘‘បធានបហិតត្តោសិ , ពុទ្ធោ លោកេ សទេវកេ;
‘‘Padhānapahitattosi , buddho loke sadevake;
តវ កម្មាភិរទ្ធេន, តោសេសិ ជនតំ ពហុំ។
Tava kammābhiraddhena, tosesi janataṃ bahuṃ.
១១.
11.
‘‘តំ សព្ពំ អនុមោទិត្វា, បទុមុត្តរោ មហាមុនិ;
‘‘Taṃ sabbaṃ anumoditvā, padumuttaro mahāmuni;
នភំ អព្ភុគ្គមី ធីរោ, ហំសរាជាវ អម្ពរេ។
Nabhaṃ abbhuggamī dhīro, haṃsarājāva ambare.
១២.
12.
‘‘អព្ភុគ្គន្ត្វាន សម្ពុទ្ធោ, មហេសិ បទុមុត្តរោ;
‘‘Abbhuggantvāna sambuddho, mahesi padumuttaro;
អន្តលិក្ខេ ឋិតោ សត្ថា, ឥមា គាថា អភាសថ។
Antalikkhe ṭhito satthā, imā gāthā abhāsatha.
១៣.
13.
‘‘យេនិទំ ថវិតំ ញាណំ, ឱបម្មេហិ សមាយុតំ;
‘‘Yenidaṃ thavitaṃ ñāṇaṃ, opammehi samāyutaṃ;
តមហំ កិត្តយិស្សាមិ, សុណាថ មម ភាសតោ។
Tamahaṃ kittayissāmi, suṇātha mama bhāsato.
១៤.
14.
‘‘‘អដ្ឋារសញ្ច ខត្តុំ សោ, ទេវរាជា ភវិស្សតិ;
‘‘‘Aṭṭhārasañca khattuṃ so, devarājā bhavissati;
បថព្យា រជ្ជំ តិសតំ, វសុធំ អាវសិស្សតិ។
Pathabyā rajjaṃ tisataṃ, vasudhaṃ āvasissati.
១៥.
15.
‘‘‘បញ្ចវីសតិក្ខត្តុញ្ច, ចក្កវត្តី ភវិស្សតិ;
‘‘‘Pañcavīsatikkhattuñca, cakkavattī bhavissati;
បទេសរជ្ជំ វិបុលំ, គណនាតោ អសង្ខិយំ។
Padesarajjaṃ vipulaṃ, gaṇanāto asaṅkhiyaṃ.
១៦.
16.
‘‘‘កប្បសតសហស្សម្ហិ, ឱក្កាកកុលសម្ភវោ;
‘‘‘Kappasatasahassamhi, okkākakulasambhavo;
គោតមោ នាម គោត្តេន, សត្ថា លោកេ ភវិស្សតិ។
Gotamo nāma gottena, satthā loke bhavissati.
១៧.
17.
‘‘‘តុសិតា ហិ ចវិត្វាន, សុក្កមូលេន ចោទិតោ;
‘‘‘Tusitā hi cavitvāna, sukkamūlena codito;
ហីនោវ ជាតិយា សន្តោ, ឧបាលិ នាម ហេស្សតិ។
Hīnova jātiyā santo, upāli nāma hessati.
១៨.
18.
‘‘‘សោ បច្ឆា បព្ពជិត្វាន, វិរាជេត្វាន បាបកំ;
‘‘‘So pacchā pabbajitvāna, virājetvāna pāpakaṃ;
សព្ពាសវេ បរិញ្ញាយ, និព្ពាយិស្សតិនាសវោ។
Sabbāsave pariññāya, nibbāyissatināsavo.
១៩.
19.
‘‘‘តុដ្ឋោ ច គោតមោ ពុទ្ធោ, សក្យបុត្តោ មហាយសោ;
‘‘‘Tuṭṭho ca gotamo buddho, sakyaputto mahāyaso;
វិនយាធិគតំ តស្ស, ឯតទគ្គេ ឋបេស្សតិ’។
Vinayādhigataṃ tassa, etadagge ṭhapessati’.
២០.
20.
‘‘សទ្ធាយាហំ បព្ពជិតោ, កតកិច្ចោ អនាសវោ;
‘‘Saddhāyāhaṃ pabbajito, katakicco anāsavo;
សព្ពាសវេ បរិញ្ញាយ, វិហរាមិ អនាសវោ។
Sabbāsave pariññāya, viharāmi anāsavo.
២១.
21.
‘‘ភគវា ចានុកម្បី មំ, វិនយេហំ វិសារទោ;
‘‘Bhagavā cānukampī maṃ, vinayehaṃ visārado;
សកកម្មាភិរទ្ធោ ច, វិហរាមិ អនាសវោ។
Sakakammābhiraddho ca, viharāmi anāsavo.
២២.
22.
‘‘សំវុតោ បាតិមោក្ខម្ហិ, ឥន្ទ្រិយេសុ ច បញ្ចសុ;
‘‘Saṃvuto pātimokkhamhi, indriyesu ca pañcasu;
២៣.
23.
‘‘មមញ្ច គុណមញ្ញាយ, សត្ថា លោកេ អនុត្តរោ;
‘‘Mamañca guṇamaññāya, satthā loke anuttaro;
ភិក្ខុសង្ឃេ និសីទិត្វា, ឯតទគ្គេ ឋបេសិ មំ។
Bhikkhusaṅghe nisīditvā, etadagge ṭhapesi maṃ.
២៤.
24.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា ឧបាលិថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā upālithero imā gāthāyo abhāsitthāti.
ភាគិនេយ្យុបាលិត្ថេរស្សាបទានំ បឋមំ។
Bhāgineyyupālittherassāpadānaṃ paṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ១. ភាគិនេយ្យុបាលិត្ថេរអបទានវណ្ណនា • 1. Bhāgineyyupālittheraapadānavaṇṇanā
