| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៣. ភទ្ទត្ថេរគាថា
3. Bhaddattheragāthā
៤៧៣.
473.
‘‘ឯកបុត្តោ អហំ អាសិំ, បិយោ មាតុ បិយោ បិតុ;
‘‘Ekaputto ahaṃ āsiṃ, piyo mātu piyo pitu;
ពហូហិ វតចរិយាហិ, លទ្ធោ អាយាចនាហិ ច។
Bahūhi vatacariyāhi, laddho āyācanāhi ca.
៤៧៤.
474.
‘‘តេ ច មំ អនុកម្បាយ, អត្ថកាមា ហិតេសិនោ;
‘‘Te ca maṃ anukampāya, atthakāmā hitesino;
ឧភោ បិតា ច មាតា ច, ពុទ្ធស្ស ឧបនាមយុំ’’។
Ubho pitā ca mātā ca, buddhassa upanāmayuṃ’’.
៤៧៥.
475.
‘‘កិច្ឆា លទ្ធោ អយំ បុត្តោ, សុខុមាលោ សុខេធិតោ;
‘‘Kicchā laddho ayaṃ putto, sukhumālo sukhedhito;
ឥមំ ទទាម តេ នាថ, ជិនស្ស បរិចារកំ’’។
Imaṃ dadāma te nātha, jinassa paricārakaṃ’’.
៤៧៦.
476.
‘‘សត្ថា ច មំ បដិគ្គយ្ហ, អានន្ទំ ឯតទព្រវិ;
‘‘Satthā ca maṃ paṭiggayha, ānandaṃ etadabravi;
‘បព្ពាជេហិ ឥមំ ខិប្បំ, ហេស្សត្យាជានិយោ អយំ។
‘Pabbājehi imaṃ khippaṃ, hessatyājāniyo ayaṃ.
៤៧៧.
477.
‘‘បព្ពាជេត្វាន មំ សត្ថា, វិហារំ បាវិសី ជិនោ;
‘‘Pabbājetvāna maṃ satthā, vihāraṃ pāvisī jino;
អនោគ្គតស្មិំ សូរិយស្មិំ, តតោ ចិត្តំ វិមុច្ចិ មេ។
Anoggatasmiṃ sūriyasmiṃ, tato cittaṃ vimucci me.
៤៧៨.
478.
‘‘តតោ សត្ថា និរាកត្វា, បដិសល្លានវុដ្ឋិតោ;
‘‘Tato satthā nirākatvā, paṭisallānavuṭṭhito;
‘ឯហិ ភទ្ទា’តិ មំ អាហ, សា មេ អាសូបសម្បទា។
‘Ehi bhaddā’ti maṃ āha, sā me āsūpasampadā.
៤៧៩.
479.
‘‘ជាតិយា សត្តវស្សេន, លទ្ធា មេ ឧបសម្បទា;
‘‘Jātiyā sattavassena, laddhā me upasampadā;
តិស្សោ វិជ្ជា អនុប្បត្តា, អហោ ធម្មសុធម្មតា’’តិ។
Tisso vijjā anuppattā, aho dhammasudhammatā’’ti.
… ភទ្ទោ ថេរោ…។
… Bhaddo thero….
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៣. ភទ្ទត្ថេរគាថាវណ្ណនា • 3. Bhaddattheragāthāvaṇṇanā
