| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៧. (អបរ)-គោតមត្ថេរគាថា
7. (Apara)-gotamattheragāthā
៥៨៧.
587.
‘‘វិជានេយ្យ សកំ អត្ថំ, អវលោកេយ្យាថ បាវចនំ;
‘‘Vijāneyya sakaṃ atthaṃ, avalokeyyātha pāvacanaṃ;
យញ្ចេត្ថ អស្ស បតិរូបំ, សាមញ្ញំ អជ្ឈុបគតស្ស។
Yañcettha assa patirūpaṃ, sāmaññaṃ ajjhupagatassa.
៥៨៨.
588.
‘‘មិត្តំ ឥធ ច កល្យាណំ, សិក្ខា វិបុលំ សមាទានំ;
‘‘Mittaṃ idha ca kalyāṇaṃ, sikkhā vipulaṃ samādānaṃ;
សុស្សូសា ច គរូនំ, ឯតំ សមណស្ស បតិរូបំ។
Sussūsā ca garūnaṃ, etaṃ samaṇassa patirūpaṃ.
៥៨៩.
589.
‘‘ពុទ្ធេសុ សគារវតា, ធម្មេ អបចិតិ យថាភូតំ;
‘‘Buddhesu sagāravatā, dhamme apaciti yathābhūtaṃ;
សង្ឃេ ច ចិត្តិការោ, ឯតំ សមណស្ស បតិរូបំ។
Saṅghe ca cittikāro, etaṃ samaṇassa patirūpaṃ.
៥៩០.
590.
‘‘អាចារគោចរេ យុត្តោ, អាជីវោ សោធិតោ អគារយ្ហោ;
‘‘Ācāragocare yutto, ājīvo sodhito agārayho;
ចិត្តស្ស ច សណ្ឋបនំ, ឯតំ សមណស្ស បតិរូបំ។
Cittassa ca saṇṭhapanaṃ, etaṃ samaṇassa patirūpaṃ.
៥៩១.
591.
‘‘ចារិត្តំ អថ វារិត្តំ, ឥរិយាបថិយំ បសាទនិយំ;
‘‘Cārittaṃ atha vārittaṃ, iriyāpathiyaṃ pasādaniyaṃ;
អធិចិត្តេ ច អាយោគោ, ឯតំ សមណស្ស បតិរូបំ។
Adhicitte ca āyogo, etaṃ samaṇassa patirūpaṃ.
៥៩២.
592.
‘‘អារញ្ញកានិ សេនាសនានិ, បន្តានិ អប្បសទ្ទានិ;
‘‘Āraññakāni senāsanāni, pantāni appasaddāni;
ភជិតព្ពានិ មុនិនា, ឯតំ សមណស្ស បតិរូបំ។
Bhajitabbāni muninā, etaṃ samaṇassa patirūpaṃ.
៥៩៣.
593.
‘‘សីលញ្ច ពាហុសច្ចញ្ច, ធម្មានំ បវិចយោ យថាភូតំ;
‘‘Sīlañca bāhusaccañca, dhammānaṃ pavicayo yathābhūtaṃ;
សច្ចានំ អភិសមយោ, ឯតំ សមណស្ស បតិរូបំ។
Saccānaṃ abhisamayo, etaṃ samaṇassa patirūpaṃ.
៥៩៤.
594.
‘‘ភាវេយ្យ ច អនិច្ចន្តិ, អនត្តសញ្ញំ អសុភសញ្ញញ្ច;
‘‘Bhāveyya ca aniccanti, anattasaññaṃ asubhasaññañca;
លោកម្ហិ ច អនភិរតិំ, ឯតំ សមណស្ស បតិរូបំ។
Lokamhi ca anabhiratiṃ, etaṃ samaṇassa patirūpaṃ.
៥៩៥.
595.
‘‘ភាវេយ្យ ច ពោជ្ឈង្គេ, ឥទ្ធិបាទានិ ឥន្ទ្រិយានិ ពលានិ;
‘‘Bhāveyya ca bojjhaṅge, iddhipādāni indriyāni balāni;
អដ្ឋង្គមគ្គមរិយំ, ឯតំ សមណស្ស បតិរូបំ។
Aṭṭhaṅgamaggamariyaṃ, etaṃ samaṇassa patirūpaṃ.
៥៩៦.
596.
‘‘តណ្ហំ បជហេយ្យ មុនិ, សមូលកេ អាសវេ បទាលេយ្យ;
‘‘Taṇhaṃ pajaheyya muni, samūlake āsave padāleyya;
វិហរេយ្យ វិប្បមុត្តោ, ឯតំ សមណស្ស បតិរូប’’ន្តិ។
Vihareyya vippamutto, etaṃ samaṇassa patirūpa’’nti.
… គោតមោ ថេរោ…។
… Gotamo thero….
ទសកនិបាតោ និដ្ឋិតោ។
Dasakanipāto niṭṭhito.
តត្រុទ្ទានំ –
Tatruddānaṃ –
កាឡុទាយី ច សោ ថេរោ, ឯកវិហារី ច កប្បិនោ;
Kāḷudāyī ca so thero, ekavihārī ca kappino;
ចូឡបន្ថកោ កប្បោ ច, ឧបសេនោ ច គោតមោ;
Cūḷapanthako kappo ca, upaseno ca gotamo;
សត្តិមេ ទសកេ ថេរា, គាថាយោ ចេត្ថ សត្តតីតិ។
Sattime dasake therā, gāthāyo cettha sattatīti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៧. (អបរ)-គោតមត្ថេរគាថាវណ្ណនា • 7. (Apara)-gotamattheragāthāvaṇṇanā
