pātañjalayogasūtrāṇi

Kaivalya-pādaḥ

॥ caturtho'dhyāyaḥ ॥
॥ kaivalya-pādaḥ ॥

janmauṣadhimantratapaḥsamādhijāḥ siddhayaḥ ॥ 4.1॥

jātyantarapariṇāmaḥ prakṛtyāpūrāt ॥ 4.2॥

nimittamaprayojakaṃ prakṛtīnāṃ varaṇabhedastu
tataḥ kṣetrikavat ॥ 4.3॥

nirmāṇacittānyasmitāmātrāt ॥ 4.4॥

pravṛttibhede prayojakaṃ cittamekamanekeṣām ॥ 4.5॥

tatra dhyānajamanāśayam ॥ 4.6॥

karmāśuklākṛṣṇaṃ yoginastrividhamitareṣām ॥ 4.7॥

tatastadvipākānuguṇānāmevābhivyaktirvāsanānām ॥ 4.8॥

jātideśakālavyavahitānāmapyānantaryaṃ
smṛtisaṃskārayorekarūpatvāt ॥ 4.9॥

tāsāmanāditvaṃ cāśiṣo nityatvāt ॥ 4.10॥

hetuphalāśrayālambanaiḥ saṃgṛhītatvādeṣāmabhāve tadabhāvaḥ ॥ 4.11॥

atītānāgataṃ svarūpato'styadhvabhedāddharmāṇām ॥ 4.12॥

te vyaktasūkṣmā guṇātmānaḥ ॥ 4.13॥

pariṇāmaikatvādvastutattvam ॥ 4.14॥

vastusāmye cittabhedāttayorvibhaktaḥ panthāḥ ॥ 4.15॥

na caikacittatantraṃ vastu tadapramāṇakaṃ tadā kiṃ syāt ॥ 4.16॥

taduparāgāpekṣitvāccittasya vastu jñātājñātam ॥ 4.17॥

sadā jñātāścittavṛttayastatprabhoḥ puruṣasyāpariṇāmitvāt ॥ 4.18॥

na tatsvābhāsaṃ dṛśyatvāt ॥ 4.19॥

ekasamaye cobhayānavadhāraṇam ॥ 4.20॥

cittāntaradṛśye buddhibuddheratiprasaṅgaḥ smṛtisaṅkaraśca ॥ 4.21॥

citerapratisaṃkramāyāstadākārāpattau svabuddhisaṃvedanam ॥ 4.22॥

draṣṭṛdṛśyoparaktaṃ cittaṃ sarvārtham ॥ 4.23॥

tadasaṃkhyeyavāsanābhiścitramapi parārthaṃ saṃhatyakāritvāt ॥ 4.24॥

viśeṣadarśina ātmabhāvabhāvanāvinivṛttiḥ ॥ 4.25॥

tadā vivekanimnaṃ kaivalyaprāgbhāraṃ cittam ॥ 4.26॥

tacchidreṣu pratyayāntarāṇi saṃskārebhyaḥ ॥ 4.27॥

hānameṣāṃ kleśavaduktam ॥ 4.28॥

prasaṃkhyāne'pyakusīdasya sarvathā
vivekakhyāterdharmameghaḥ samādhiḥ ॥ 4.29॥

tataḥ kleśakarmanivṛttiḥ ॥ 4.30॥

tadā sarvāvaraṇamalāpetasya jñānasyānantyājjñeyamalpam ॥ 4.31॥

tataḥ kṛtārthānāṃ pariṇāmakramasamāptirguṇānām ॥ 4.32॥

kṣaṇapratiyogī pariṇāmāparāntanirgrāhyaḥ kramaḥ ॥ 4.33॥

puruṣārthaśūnyānāṃ guṇānāṃ pratiprasavaḥ kaivalyaṃ
svarūpapratiṣṭhā vā citiśaktiriti ॥ 4.34॥

॥ iti patañjali-viracite yoga-sūtre caturthaḥ kaivalya-pādaḥ ॥

॥ iti śrī pātañjala-yoga-sūtrāṇi ॥