| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
៣១. វិកប្បនានិទ្ទេសោ
31. Vikappanāniddeso
វិកប្បនា ចេវាតិ –
Vikappanācevāti –
២២១.
221.
សម្មុខា បរម្មុខាតិ, ទុវេ វុត្តា វិកប្បនា;
Sammukhā parammukhāti, duve vuttā vikappanā;
សម្មុខាយ វិកប្បេន្តោ, ព្យត្តស្សេកស្ស សន្តិកេ;
Sammukhāya vikappento, byattassekassa santike;
‘‘ឥមំ ចីវរំ តុយ្ហំ, វិកប្បេមី’’តិ ភាសយេ។
‘‘Imaṃ cīvaraṃ tuyhaṃ, vikappemī’’ti bhāsaye.
២២២.
222.
ឯត្តាវតា និធេតុំវ, កប្បតី ន ច កប្បតិ;
Ettāvatā nidhetuṃva, kappatī na ca kappati;
បរិភោគាទិកំ តេន, អប្បច្ចុទ្ធដភាវតោ។
Paribhogādikaṃ tena, appaccuddhaṭabhāvato.
២២៣. ‘‘មយ្ហំ សន្តកំ បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ –
223. ‘‘Mayhaṃ santakaṃ paribhuñja vā vissajjehi vā yathāpaccayaṃ vā karohī’’ti –
តេន បច្ចុទ្ធដេយេវ, បរិភោគាទិ កប្បតិ។
Tena paccuddhaṭeyeva, paribhogādi kappati.
២២៤.
224.
អបរា សម្មុខាវេកា, ភិក្ខុស្សេកស្ស សន្តិកេ;
Aparā sammukhāvekā, bhikkhussekassa santike;
គហេត្វា នាមមេកស្ស, បញ្ចន្នំ សហធម្មិនំ។
Gahetvā nāmamekassa, pañcannaṃ sahadhamminaṃ.
២២៥. ‘‘ឥមំ ចីវរំ តិស្សស្ស ភិក្ខុនោ, តិស្សាយ ភិក្ខុនិយា, តិស្សស្ស សាមណេរស្ស, តិស្សាយ សាមណេរិយា, តិស្សាយ សិក្ខមានាយ វិកប្បេមី’’តិ វត្តព្ពំ។
225. ‘‘Imaṃ cīvaraṃ tissassa bhikkhuno, tissāya bhikkhuniyā, tissassa sāmaṇerassa, tissāya sāmaṇeriyā, tissāya sikkhamānāya vikappemī’’ti vattabbaṃ.
តេន ភិក្ខុនា ‘‘តិស្សស្ស ភិក្ខុនោ, តិស្សាយ ភិក្ខុនិយា, តិស្សស្ស សាមណេរស្ស , តិស្សាយ សាមណេរិយា, តិស្សាយ សិក្ខមានាយ សន្តកំ បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ វត្តព្ពំ។
Tena bhikkhunā ‘‘tissassa bhikkhuno, tissāya bhikkhuniyā, tissassa sāmaṇerassa , tissāya sāmaṇeriyā, tissāya sikkhamānāya santakaṃ paribhuñja vā vissajjehi vā yathāpaccayaṃ vā karohī’’ti vattabbaṃ.
២២៦.
226.
បរម្មុខាវិកប្បនេ-កស្សន្តិកេវមីរយេ;
Parammukhāvikappane-kassantikevamīraye;
‘‘ឥមំ ចីវរំ តុយ្ហំ វិកប្បនត្ថាយ ទម្មី’’តិ។
‘‘Imaṃ cīvaraṃ tuyhaṃ vikappanatthāya dammī’’ti.
២២៧. តេន វត្តព្ពោ ‘‘កោ តេ មិត្តោ វា សន្ទិដ្ឋោ វា’’តិ។ ឥតរេន ចេវំ វត្តព្ពំ ‘‘តិស្សោ ភិក្ខូ’’តិ វា ‘‘តិស្សា ភិក្ខុនី’’តិ វា ‘‘តិស្សោ សាមណេរោ’’តិ វា ‘‘តិស្សា សាមណេរី’’តិ វា ‘‘តិស្សា សិក្ខមានា’’តិ វា។
227. Tena vattabbo ‘‘ko te mitto vā sandiṭṭho vā’’ti. Itarena cevaṃ vattabbaṃ ‘‘tisso bhikkhū’’ti vā ‘‘tissā bhikkhunī’’ti vā ‘‘tisso sāmaṇero’’ti vā ‘‘tissā sāmaṇerī’’ti vā ‘‘tissā sikkhamānā’’ti vā.
បុន តេន ‘‘អហំ តិស្សស្ស តិស្សាយ វា ទម្មី’’តិ វិកប្បេត្វា តេនេវ ‘‘តិស្សស្ស ភិក្ខុនោ, តិស្សាយ ភិក្ខុនិយា, តិស្សស្ស សាមណេរស្ស, តិស្សាយ សាមណេរិយា, តិស្សាយ សិក្ខមានាយ សន្តកំ បរិភុញ្ជ វា វិស្សជ្ជេហិ វា យថាបច្ចយំ វា ករោហី’’តិ បច្ចុទ្ធរិតព្ពំ។
Puna tena ‘‘ahaṃ tissassa tissāya vā dammī’’ti vikappetvā teneva ‘‘tissassa bhikkhuno, tissāya bhikkhuniyā, tissassa sāmaṇerassa, tissāya sāmaṇeriyā, tissāya sikkhamānāya santakaṃ paribhuñja vā vissajjehi vā yathāpaccayaṃ vā karohī’’ti paccuddharitabbaṃ.
២២៨.
228.
ទូរសន្តិកត្តេកត្តពហុភាវំ វិជានិយ;
Dūrasantikattekattabahubhāvaṃ vijāniya;
‘‘ឯតំ ឥម’’ន្តិ ‘‘ឯតានិ, ឥមានី’’តេត្ថ យោជយេ។
‘‘Etaṃ ima’’nti ‘‘etāni, imānī’’tettha yojaye.
២២៩.
229.
ទសាហំ មាសមេកំ វា, បញ្ច វា កថិនត្ថតេ;
Dasāhaṃ māsamekaṃ vā, pañca vā kathinatthate;
បារិបូរត្ថមូនស្ស, បច្ចាសា សតិ មាសកំ;
Pāripūratthamūnassa, paccāsā sati māsakaṃ;
នុប្បាទយតិ និស្សគ្គិំ, នាធិដ្ឋិតវិកប្បិតន្តិ។
Nuppādayati nissaggiṃ, nādhiṭṭhitavikappitanti.
